Sama'ila tə Dzəviya Dauda
16
1 Ngə Tlakə tə nar nyi nə Sama'ila, <<Ba'asakamanə ko sə'ingu Saul ya a tsə'u yo i nyi ka təl təkəra njir Isra'ila wa? Nyandə tələm nghə na mal ka go laku, yo sə nghə ya da Jessi ndər Baitalami. A tabiya tə ya zhang ku huɗa nguli shili nyi, ka cha ɗa ka təl.>>2 Kəl ja, Sama'ila tə na, <<Amanə yo maea? Saul kwa ngatə mafakə ya cho tsəya ɗa.>>
Ngə Tlakə tə na, <<Hətə malamalar zər tla ka na, <Ya shili ka hatəmachi nə Tlakə na.> 3 Ka nga Jessi ya tə mbwar hatəmachi nga, yo char nghə sə nda ko məra. Ko pəu nyi mala ku kəra ndə nda yo char ngha.>>
4 Sama'ila tə mər sə nda Tlakə tə na. Nda cha dzəva vu Baitalahmi, njirawawa'a mələm tə dləutsə nyi dza nda kwa tsamətlaɗəu. Ngə nda jawa, <<Ku piyarɗəfu nə shili ka?>>
5 Ngə Sama'ila tə ɓəlakə nda, <<Ah, aku piyarɗufəu, ya shili ka ya hatəmachi nə Tlakəu. Chinda ma kərnəhi hya shili məna hatəmachi kə'i hi.>> Ngə cha chinda Jessi ka nguli shili nyi ga nga nda shili ka hatəmachi.
6 Manda nda shili, ngə Sama'ila tə la'a Eliyab ngə cha har ku jigadəma nyi ənda, <<Vəlvəl janə ndə nda Tlakə tə tabiya.>>
7 Kəl ja, Tlakə tə nar nyi nə Sama'ila, <<Ngwa ka da ɗəngha na ngyakəngyar ndəu, ndara dzəgamkur yi wa, aka a ngya nyi tə ya. Tlakə do ndzamə sə nda ndə kwa ndzam wa. Ndə kwa ndzam ngyakəngyar ndə biyabibiya, kəl ja, Tlakə kwa ndzamə ɗufəu.>>
8 Ngə Jessi tə nga Abinadab ga shili ta'ində nyi mar Sama'ila. Kəl ja, ngə samaila tə na, <<A Tlakə da tabiya nənnə ma'a wa.>> 9 Ngə Jessi tə nga Shama tə shili, kəl ja, Sama'ila tə na, <<Nənnə ma'a Tlakə da tabiya wa.>> 10 Jessi tə shili na nguli shili nyi məɗəfa huɗə Sama'ila, kəl ja, Sama'ila tə na, <<A Tlakə da tabiya inə wa.>> 11 Kəl ngə cha jau Jessi, <<Wurkənya nguli shili nghə inə ya?>>
Ngə Jessi tə wuma, <<Tsəu tanyi adahir ɗa, kəl ja, cho ɓəla kətəng.>>
Ngə Sama'ila tə na, <<Sə nja ki nga nyi, a məno ngya ka səm wa, kəl cha shili.>>
12 Kəl ngə cha sə nja ki shili na cha. Janə cha gumaguma yiyinghəu, ana lya cha ɗyaɗyanghəu.
Kəl ngə Tlakə tə na, <<Hya'atə ka dzəviya nyi, nacha ngə təl.>>
13 Ngə Sama'ila tə hətə tələm nyi nda na mal kwa nda, ga dzəviya nyi mar ka zamənyi i'i, ya fwatə tə pəchi nda Shanguɗə Tlakə tə səya təkəra Dauda, ana gyalkur. Ngə Sama'ila tə ɓəl tanyi yi Ramah.
Dauda tə Go Mər Tlər nə Saul
14 Kəl ngə Shanguɗə Tlakə tə ngyar Saul, ya ngə shanguɗə ɗimi hya'atə tsa Tlakə tə nə nyi ɓwaɓwatəu.
15 Ngə kadakaliya Saul i'i tə nar nyi, <<Ndzama, janə shanguɗə ɗimi hya'atə tsa Tlakə kwa nə nghə ɓwaɓwatəu. 16 Aləvari! Nə ea tsubar ea ki gwa'arə nghə ndə tlalwa ku tsa zəmbəl, ma shanguɗə ɗimi hya'atə tsa Hyel tə shili dzə ngha, cho dəgar nghə zəmbəl ya ko ngatə dama.>>
17 Ngə Saul tə nar nyi nə kə'i kadakaliya nyi inda, <<Gwa'arə ma ndə nda kwa nau zəmbəl mənakəu, hya shili na cha na'a.>>
18 Ngə zhang ku huɗa kadakaliya inda tə na, <<Kwa zəndə fa vanya zər Jessi ndər Baitalami nda kwa nau dəgə zəmbəl mənakəu. Ndə kwalkwal cha, ndər nau pah. Kwa nau ɓwanya, ya gumaguma cha. Ya Tlakə tsa'a na cha.>>
19 Kəl ngə Saul tə sə changhabal ya da Jessi ga na, <<Sətə ɗa zər nghə Dauda, nda kwa ɓəla kətəng cha shili.>> 20 Ngə Jessi tə hətə kwara ga fa'atə sərsum ti, ana salakam ɓitir anap, ana zər kua, ga sə zər nyi Dauda nə ya da Saul.
21 Dauda tə shili da Saul ga ghəya mər tlər nə nyi. Saul kwa i nyi gagaɗa, tə gwa'atə Dauda tə ɗa zhang ku huɗa njir hə kar pah nə nyi. 22 Kəl ngə Saul tə sətə nyi mafakə nə Jessi ga na, <<Ngyar Dauda cha ngya ka mər tlər na'a tangna, yo ngatə məsəɗakə na cha gagaɗa.>>
23 Kala bəji nda shanguɗə ɗimi hya'atə tsa Tlakə tə səya təkəra Saul, kəl Dauda kwa hətə zəmbəl ba'a dəgar nyi. Ya kəl Saul kwa tatla, ya kəl cho ngatə dama, shanguɗə ɗimi nda tsə'u kwa ngya nyi.