Pah ka Njir Amalek
15
1 Ngə Sama'ila tə nar nyi nə Saul, <<Naya ngə ndə nda Tlakə tə sə ka ya dzəviya nghə ka təl təkəra nji nyi Isra'ila, aka ənga səya himi da mafakə hya'atə tsa Tlakə sakana. 2 Janə sə nda Tlakə tə na, <Yo nə nyi ɓwaɓwatə nə njir Amalek aka sə nda nda mərtə nyi nə njir Isra'ila nda nda gwa'a nda katə nda ya tə hə'i alkawal ku bəji nda nda zəbiya vu Masar nda. 3 Ma'i ma sakana hya yi pah njir Amalek hya kuɗənda dəhə sə nda nəkənda. Ngwa hya ngya nda wa, kuɗənda ma shili ka mahi'i, ngulisha'a ana nguli dizəu, tla ana kətəng, dləgwam ana kwara i'i.> >>4 Ngə Saul tə tsəmtə ləvaləva inda cha jigabiya vu Telem nda, ləvaləva 200,000 hya'atə vu Isra'ila, ana 10,000 hya'atə vu Yahuda. 5 Ngə Saul təra yo mələm Amalek ga mbuya nda mwabu ku mbəta. 6 Ngə nda nar nyi nə njir Keni, <<Təra ma, ngyar ma njir Amalek tsa ya da kuɗənda hi tsa'a ka nda, aka hya char nyi mənakəkur nə njir Isra'ila ku nda nda zəbiya vu Masar nda.>> Kəl ngə njir Keni tə biyata nda ku huɗa njir Amalek.
7 Ngə Saul tə pah njir Amalek fwatə vu Havila tsa'a vu Shur, təwa zədərpəchi nə Masar. 8 Cha səya Agag təl njir Amalek na pi, ga kuɗənda dəhə nji nyi na katsakər. 9 Kəl ja, Saul ka ləvaləva nyi tə ngyar Agag na pi, ətsəu ka tla ka kətəng ka nguli mbugul ka gam inda gumaguma, a da nda i kuɗənda wa, kəl ja, nda kuɗənda inda a da yiying wa ana inda pa'a na dunama.
10 Kəl ngə ɓwanya Tlakə tə shili da Sama'ila, 11 <<Huɗaya tla tə nda fiya Saul ka təl, aka cha shata nyi tsa ya ga ngyar nəu tsaubar ɗa.>> Huɗa Sama'ila tə tla, ngə cha tiwi nə Tlakəu həm hanyi.
12 Tsəɗakə mbudla Sama'ila tə hya'atə ga ya da Saul, Kəl ja, nja nar nyi, <<Saul təra tə yi Karmel. Hinda cha hərtə sə nda njo maka ɗənghatə nyi ti, ana səli nyi, ga tərabiya yi Gilgal.>>
13 Ngə Sama'ila tə təra yada Saul, nda Saul tə la'a Sama'ila ngə cha na, <<Papa'akur Tlakə ngya tsa'a na ka! A nəubiya tə ya tsaubar Tlakəu.>>
14 Kəl ja, Sama'ila tə jau nyi, <<Ya manə yo ngatə tiwi kətəng ka tla ku hima ya?>>
15 Ngə Saul tə wum ga na, <<Ləvaləva inga shili nə hya'atə tsa njir Amalek, nda ngyar kətəng ka tla ka nda hatəmachi nə Tlakəu, Hyel ngha, kəl ja, a kuɗənda tə ea həyadzə nyi.>>
16 Ngə Sama'ila tə nar nyi nə Saul, <<Ta'i! Əngwa ya par nghə sə nda Tlakə tə nar ɗa ku vu'i nə məna biya kwa na.>>
Ngə Saul tə na, <<Par ɗa.>>
17 Ngə Sama'ila tə na, <<Madangə ko la'a kərnghə wi a da kə vanya sə wa, a da ka ɗa ka ndər nəu na nyavi njir Isra'ila ma? Tlakə tə fiya nghə ka təl təkəra njir Isra'ila. 18 Ngə cha sə nghə ka ki mər tləra, cha na, <Ma'i ka ki kuɗənda njir Amalek, nji ɗimi ingə pa'apa'a, ka pah nda kəl ka kuɗənda nda papatəu.> 19 Mya gwa'atə a da ka nəu nya Tlakə wa? Mya gwa'atə ka kusa fa'aya kwazhalɓi ga mər sə ɗimi tə lya Tlaka?>>
20 Ngə Saul tə na, <<A nəu tə ya nya Tlaəkəu, aka a ma'i tə ya ga ki mərtə sə nda cha nar ɗa. Ya kuɗənda njir Amalek papatəu, ga səya təl kənda Agag. 21 Ləvaləva tə fa'atə kətəng ka tla inda mənakəu ku huɗa kwazhalɓi inda nda fa'aya, nda shili nə ka ga nda hatəmachi nə vu Gilgal nə Tlakəu, Hyel ngha.>>
22 Kəl ja, Sama'ila tə wuma,
<<Mi sə nda Tlakə tə ndiya ngatə məsəɗakə na?
Lə ga'a ka hatəmachi zəma, aa nəu nya cha?
Nəu nya cha a ndiya tə hatəmachi
na kətəng inda ndiya na mənakəu.
23 Aka tləmwali wi səpəla'a hakəzə cha,
kəla ngatəndərkur tsə'u wi həsəli nə katə cha.
Aka ka ngyar səhimi da ɓwanya Tlakəu,
a tsə'u cho i nghə ka təl wa.>>
24 Kəl ngə Saul tə nar nyi nə Sama'ila, <<A mər tə ya səpəla'a, ya ngyar nəu gadlagadla Tlakəu ana tsaubar ngha. Ya ngatə ləvər tsa nji, nacha gwa'atə ya nəu nə kənda. 25 Sakana yo gədi ngha, farbikə ɗa ka ɓəl tsa'a na ya, aka ga ya hətə nyi səli nə Tlakəu.>>
26 Kəl ja, Sama'ila tə nar nyi, <<A da yo ma'i na kə wa. Ka ngyar ɓwanya Tlakəu, ya Tlakə tsə'u do i nghə ka təl təkəra njir Isra'ila wa!>>
27 Nda Sama'ila kwa sha ka cho təra, ngə Saul tə gəzəya nyachira ləkutə nyi, ngə a ta. 28 Ngə Sama'ila tə nar nyi, <<Tlakə tau tə təlkur Isra'ila tsa kə ənya, ga nə nyi nə nyi nə ndə nda ndiya ngha. 29 Aka Ndər Gyalkur Dəhə nə Isra'ila do tla gəzhi ndara cha shar jigadəma nyi wa, aka a da cha ndə nda pəlakər kwa bəlatə sə ndo jigadəma nyi wa.>>
30 Ngə Saul tə wuma, <<A mərtə ya səpəla'a. Kəl ja, maki mərtə ɗa ya ɗa na səli mar njirawawa'a nə nji ɗa ana a mar njir Isra'ila, anda ma təra ya ki hətə nyi səli nə Tlakəu, Hyel ngha.>> 31 Aka ənga, Sama'ila tə təra tsa'a na Saul, ngə Saul tə hətə nyi səli nə Tlakəu.
32 Kəl ngə Sama'ila tə na, <<Anda ma na Agag təl njir Amalek.>> Ngə Agag tə shili da cha a da na kərmətlə wa, cho jigadəma ənda, <<Vəlvəl ɓwaɓwatər tah tərabiya ti.>>
33 Kəl ja, Sama'ila tə nar nyi nə Agag,
<<Wi nda katsakər nghə tə shandə mahi'i ka mahi'i kəla ngulisha'a,
əngə tanyi tsə'u ama nghə kwa ɗa mala kəla ngulisha'a ku pama mahi'i.>>
Ngə Sama'ila tə tsəya Agag a huɗə Tlakə vu Gilgal.