14
1 Vanya pəchi ngə Jonatan zər Saul tə nar nyi nə tlakala nda kwa hə kar pa nə yi nda, <<Anda ma dləgəlbiya biyo mbwar tsəmdzə njir Filisti.>> Kəl ja, a da cha nar nyi nə ada nyi wa.2 Saul ana ngya biya nya chira mələm Gibiya da kiɗa wur Pomegranet vu Migron. Nji 600 tsə'u tsa'a na cha hinda, 3 Ahija, nda handzə efod ku pama nda. Zər zamənya Ikabod cha, tləm nyi Ahitub zər Finehas jivalnya Eli, pərist nə Tlakəu vu Shilo. A ndə da zəndə nda Jonatan tə təra wa.
4 A tə kala ba nda Jonatan kwa gwa'a cha dləgəlbiya biya tə mbwar tsəmdzə njir Filisti mə dzəgam da, tləmər zhang Bozez, tləmər vanyi Sene. 5 Mə zhang təwa holma a mar Mikmash, vanyi nda tsə'u təwa vwa a mar Geba.
6 Ngə Jonatan tə nar nyi nə tlakala nda kwa hə kar pah nə nyi nda, <<Anda ma dləgəlbiya biya tə mbwar tsəmdzə nji kəla tlatla bədzang inga. Ndara tsə'u Tlakə mər tlər tə nyan ma. A sə do katə Tlakə tsa shili na dləuya, ndara təwa nji ɗanghəu, ndara təwa nji tsaɗə wa.>>
7 Ngə ndər hə kar pah nə nyi nda tə na, <<Mər sənda ku ɗufwa ka, a biyahi nghə ya tsa'anyata.>>
8 Ngə Jonatan tə na, <<Mo dləgəlbiya biya dza nji inga, mo biya char kərnəma tə babal ka nda la'a ma. 9 Ma nda nar ma, <Ta'i ma hinga kəl ea yi da hi,> ba'a ma ta'ita ma tangnda ma ti, a da mo ya da nda wa. 10 Kəl ja, ma nda nar ma, <Anda ma da ea,> ba'a ma gi, aka nacha ngə sə ndo char ənda Tlakə kwa vala ma mo kura nda.>>
11 Kəl ngə kya'anda tə təra ga yi char kərnənda tə mbwar tsəmdzə njir Filisti nda. Nda njir Filisti inda tə la'a nda ngə nda na, <<Ndzama! Janə njir Ibrani kwa zəbiya ku ka'u inda nda mbu kwa.>> 12 Kəl ngə nji inda tə mbwar tsəmdzə nda tə na na kurakə dzəgam dzəgaməu, <<Zədə ma da ea, ma'a hya ɗari wa.>>
Ngə Jonatan tə nar nyi nə ndər hə kar pah nyi nda, <<Nəu ɗa, aka Tlakə wurta tləɗanda nda nə njir Isra'ila.>>
13 Jonatan tə gi na dzaba'a, ndər hə kar pah nə nyi nda tsə'u kwa nəu hi nyi. Ngə Jonatan tə ghəya pah njir Filisti, tə ɗa ndo dla səya hu'i, ndər hə kar pah nə nyi nda tsə'u kwa nəu hi nyi cho kuɗə nda. 14 Aku tangərmar pah na, Jonatan ana ndər hə kar pah nə nyi tə kuɗənda nji kwa ɗa mətləkumnyi a tə vanya babal kwa ɗa mar babal taku.
15 Kəl ləvər tə səya dəhə njir Filisti inda tə babal nda, ana nji inda ku mbwar tsəmdza, ana njir biya ki pah nji, hə'i tə dzədzi, ngə ləvər tə səya nda gagaɗa, Hyel ngə tə gwa'atə ngəna sə tə ɗa.
16 Njir ɓəla nə saul vu Gibiya ku hə'i Banyami tə la'a ləvaləva njir Filisti kwa wiɗə mada abari. 17 Kəl ngə Saul tə nar nyi nə nji inda kə'i cha, <<Jigabiya ma ləvaləva ingə ga hya la'a nji inda tə ngya mən.>> Nda nda jigabiya, kəl nda la'a ka Jonatan ana ndər hə kar Pah nyi ingə pa'a tangnda.
18 Ngə Saul tə nar nyi nə Ahija, <<Anda na gwarara Hyel.>> Aka ku bəji nga gwarara Hyel tsa njir Isra'ila. 19 Ku sakanda Saul kwa ɓwanya na pərist, kəl tsakə kurakə kwa tsakə kya tə mbwar tsəmdzə njir Filisti. Kəl ngə Saul tə nar nyi nə pərist, <<Ngyar sə ngə ko mər nga!>>
20 Ngə Saul ana dəhə nji nyi tə tsəmtə dzə ga təra ki pah. Nda həya njir Filisti wi tə kəɓanghəu, ndo gəga kərnənda na katsakər. 21 Njir Ibrani inda tsa'a ka njir Filisti ɗakaɗa, inda tə nəu nda kya tə mbwar tsəmdzə tə ɓəl ta nda ga daɓətəkər kə'i Saul ana Jonatan, ba'a alenya ləvaləva njir Isra'ila inda. 22 Nda dəhə njir Isra'ila inda tə mbuta nda ku hə'i nda kya tə dəgəl nə Ifərem tə ngatə ənda njir Filisti kwa hwi, ngə nda biya pah nda, ndo gədlə nda tsa'anyata. 23 Əngə Tlakə tə dləuya njir Isra'ila pəshinda. Ləvaləva njir Isra'ila tə gədlə njir dawa kənda bətə biyamar Bet Aven.
Jonatan tə Sa Mwamwa
24 Pəshinda njir Isra'ila sa tə ɓwaɓwatəu, aka Saul tə səmfəla ga na, <<Ndə shi'ushi'u ngə ndə nda səm sərsum təvi akə ɗa, təvi ya kisəkur tə njir dawa ɗa!>> Aka ənga, ndə da tə ɗar sərsum wa.
25 Nda dəhə ləvaləva inda tə go lya wua, kəl janə mwamwa mada abari. 26 Nda nda gu lya wua, kəl janə mwamwa mada amani, kəl ja, a ndə da hau cha cha kwa ga naɗənya wa, aka ndo ləvər tsa səmfəla da səya nda. 27 Kəl ja, a Jonatan da zəndə ənda ada nyi mbiya tə nji na səmfəla wa, aka ənga cha har zəwa nda ku cha cha nda ga chiu nyachira zəwa nyi nda gu tlavə mwamwa. Nda cha gi nə gyo nya cha kəl ngə cha uya dunama. 28 Kəl zhang ku huɗa ləvaləva inda tə nar nyi, <<Ada nghə tə mbiya nji na səmfəla ɗimiɗimi, cha na, <Ndə shi'ushi'u ngə ndə nda tə səm sərsuma təvi pəchi təɗa!> Nacha gwa'atə nji tə ɗa kəla dunama.>>
29 Ngə Jonatan tə na, <<Ada ɗa fəutə hə'i ku ɓwaɓwatəu. La'a ənda lya ya mbəɗə nda ya ɗar mwamwa nə kushiu. 30 Mi kwa nda ɗa ma nji tə səm kwazhalɓi inda nda fa'aya tsa njir dawa kənda? A njo nda kuɗənda njir Filisti ndiya ənə ma?>>
31 Pəshinda ahir njir Isra'ila tə kuɗənda njir Filisti fwatə vu Mikmash tsa'a vu Aijalon, a həɗa tə nda. 32 Kəl ngə nda go fifi kwazhalɓi inda ga fa'atə ka kətəng, tla ana nguli tla, nda tlakər wulya ga ɗə kumkumnyi dəhə ka mashi. 33 Kəl vanya ndə tə na, <<Ndzama, janə nji kwa mər səpəla'a huɗə Tlakə təwa ɗə kum na mashi kwa.>>
Ngə cha na, <<A ɓəliya tə hi jirikur, dangəltə ma hangu dəgal shili tangnə sakana.>> 34 Kəl ngə cha na, <<Ma'i biya ku huɗa nji ingə ka nar nda, <Kala ndə cha shili na tla ana kətəng cha shili tlakər wulya tangnə cha ɗinya. Ngwa hya mər səpəla'a huɗə Tlakə təwa ɗə kum nda tsəutanyi na mashi nyi kwa wa.> >>
Kəl kala ndə tə shili na tla nyi əvu'i nda ga tlakər wulya tangnda. 35 Ngə Saul tə hərtə nyi dzəgana nə Tlakəu, nacha ngə tangərmar dzəgana nda cha hərəya.
36 Ngə Saul tə na, <<Mən təra səya da njir Filisti əvu'i, məna səya fa'a kwazhalɓi tsa'a nə wurəvi, əngwa məna ngyar mada ndə zhang na pi wa.>> Kəl ja, pərist tə na, <<Ta'i ma mən jawar Hyel tangna.>>
37 Ngə Saul tə jau Hyel, <<Ya səya pah njir Filisti ya? Ko tləɗanda nda nə njir Isra'ila ja?>> Kəl ja, a Hyel da wum nə nyi pəshinda wa.
38 Aka ənga Saul tə na, <<Anda ma tangna, dəhə hi nahi njir nəu na ləvaləva, məna gwa'abiya ndara mi səpəla'a nda nja mər ənya. 39 Vəlvəl dəhə ndə nda tə mər bikəbikənyi njo tsəya nyi, mada zər ɗa Jonatan nga.>> Kəl ja, madawa da shau wa.
40 Kəl ngə Saul tə nar nyi nə dəhə njir Isra'ila, <<Ta'i ma biya nga, naya ana zər ɗa Jonatan kwa ta'i tangna.>> Ngə nji tə wuma, <<Mər sə nda tə ɗa tsa'atsa'a nə ngha.>>
41 Ngə Saul tə pətlənya nə Tlakəu, Hyel njir Isra'ila, <<Wum na'a tsa'atsa'a, macha naya ndara zər ɗa Jonatan ngə tə mər bikə nga, char ea.>> Ngə wum nda Hyel tə wum tə char ənda Jonatan ana Saul nga, ngə nji tə ɗa chichinyi tsa bikəu. 42 Ngə Saul tə na, <<Ɓəl ma shiu ku pama ea na zər ɗa Jonatan.>> Kəl ngə ɓəlshiu tə ta'i tə Jonatan.
43 Kəl ngə Saul tə nar nyi nə Jonatan, <<Par ɗa sə nda ka məra.>> Ngə Jonatan tə nar nyi, <<Ya ɗar mwamwa kushiu ana nyachira zəwa ɗa. Sakan ya, a ɗatə tuku ya tə ya?>>
44 Ngə Saul tə na, <<Ga Hyella tsəya ɗa Jonatan ma a da nja tsəya nghə wa.>>
45 Kəl ja, nji tə nar nyi nə Saul, <<Njo tsəya Jonatan ndə nda tə shili na nyi dləuya dəgal nə Isra'ila? A do ɗa wa! Vəlvəl mada shishir kəra cha zhang do təɗə səya hu'i wa, sə nə cha mər ənya na, ana vala Hyel ngani.>> Kəl ngə nji tə dləuya Jonatan, a da nja tsəya nyi wa.
46 Kəl ngə Saul tə ngyar gədlə njir Filisti, ga ɓəlta nda ya tə hə'i kənda.
47 Ku bəji nda Saul tə ɗa ka təl njir Isra'ila, cha pah njir dawa kənda mada təwabari. Cha pah ka njir Mowab, Amon, Edom, ka təl Zoba ana njir Filisti. Dəhə ba nda cha ma'i ki pah kəl cho kura. 48 Cha char salkur ga kura njir Amalek ga dləuya njir Isra'ila ku cha nji inda tə dla'a nda.
Njir Ki Saul
49 Nguli shili Saul nanda ingə, Jonatan, Ishvi ana Malkishuwa. Tləmər kwa nyi nda dəgaləu nacha ngə Merab, kushi nyi tsə'u tləm nyi Mikal. 50 Tləmər mala nyi Ahinowam kwar Ahimaz. Tləmər gau ləvaləva nyi Abna zər Ner, ya Ner tsə'u zamənya adanya Saul cha. 51 Kish adanya Saul ana Ner adanya Abna nguli Abiyel inga.
52 Saul tə pah ɗimiɗimi ka njir Filisti ku dəhə ngya nyi, ya kala bəji nda Saul tə la'a ndər dunama ana ndə kwalkwala, cho hətə nyi ka ləvaləva nyi.