Sama'ila tə Tsə Saul
13
1 Fa Saul makərkumnyi ma cha ɗa ka təl ga səm təlkur təkəra njir Isra'ila fa fwaɗəkumnyi parnya mətləu.2 Saul tə ɗəmtsə nji 3,000 ku huɗa njir Isra'ila, nji 2,000 tə ngya tsa'a ka cha vu Mikmash ana hə'i nda kya tə dəgəl Betel, nji 1,000 tsə'u ka Jonatan vu Gibiya ku hə'i Banyami. Hədzər nji inda ngə cha səu nda ku laku kyo ki kənda.
3 Kəl ngə Jonatan tə tsəya vanya ndər nəu na pah nə njir Filisti a vu Geba, njir Filisti tsə'u ngatə tə mafakəu. Ngə Saul tə sə nja mbəɗiya papam nə nga nji ka pah mada amanə ku hə'i nda. 4 Njir Isra'ila dəhə tsə'u ngatə tə mafakə ənda Saul tə tsəya ndər nəu na pa nə njir Filisti, ana ənda njir Isra'ila ɗa tə ka sə hiɗaɗa tə lya njir Filisti. Kəl ngə nji tə wum nga nda, ngə nda təra ya da Saul vu Gilgal.
5 Ngə njir Filisti tə tsəmtədzə ka pah njir Isra'ila, ana charkaina taku 3,000, ana njir dlə charkaina taku 6,000, ana ləvaləva wi mishi'ua nya fa'a. Nda təra ga gi tsəmtədzə vu Mikmash, təwa zədərpəchi nə Bet Aven. 6 Njir Filisti tə pah njir Isra'ila, ngə njir Isra'ila tə gu ɓwaɓwatə ɗimiɗimi, ngə nda mbu ta nda ku ka tləl, məa, ka'u ana ka'ur ɓiti. 7 Alenya njir Ibrani ma'a tə dləgəlbiya dəl Urdən ya tə hə'i Gad ana Giliyad.
Saul tə ngya vu Gilgal, ya dəhə ləvaləva inda tsa'a ka cha kwa dzədzə na ləvaəra. 8 Cha səkə hanyi məɗəfa, bəji nda Sama'ila tə fiya, kəl ja, Sama'ila da shili Gilgal wa, ngə nji tə ghəya wiɗa. 9 Ngə cha na, <<Shili ma na sər hatəmachi təwa nginda ana nə daɓəkər.>> Ya ngə Saul tə handa təmachi nə nginda. 10 Ma Saul kwa wurandə hatəmachi kəl janə Sama'ila, ngə Saul tə biya ka lali nyi.
11 Ngə Sama'ila tə jawa, <<Mi nə ka məra?>>
Ngə Saul tə wuma, <<Nda ya la'a nji kwa wiɗa, ya a da ka shili ku bəji nda ka na ko shili wa, ya janə njir Filisti kwa tsəmdzə vu Mikmash, 12 ngə ya har ku kəra ya ənda, <Sakana njir Filisti kwa səya pah ɗa vu Gilgal, ya a da ya taa gwa'a kwambiyakur tsa Tlakə wa.> Aka ənga ya la'a a ɗatə tuku ya handa təmachi nə nginda.>>
13 Ngə Sama'ila tə na, <<A mər tə kə kəkəngkur, a da ka ɓəlatə tsaubar nda Tlakəu, Hyel nghə tə nə nghə wa, macha nda tə ka ɓəlati, ta'ir nda tə cha kukuya təlkur nghə təkəra njir Isra'ila ba'anawa. 14 Kəl ja, sakana a tsə'u təlkur nghə do ngya wa, Tlakə tabiya tə ndə nda səya tə ɗufwa cha ga fiya nyi ka təl nda kwa nəu na nji nyi, aka a da ka ɓəlatə tsaubar Tlakə wa.>>
15 Kəl ngə Sama'ila tə ngyar Gilgal ga təra gi Gibiya ku hə'i Banyami, ngə Saul tə jigabiya nji inda kə'i cha, kəl janə nji 600.
16 Ngə Saul ana zər nyi Jonatan ana nji inda kə'i nda inda, tə ngya vu Gibiya ku hə'i Banyami, njir Filisti tsə'u tə daɓə vu Mikmash. 17 Kəl dzuku ləvaləva makər nə njir Filisti tə zəbiya hya'atə tə mbwar tsəmdzə kənda. Dzuku zhang tə təra yi təwa Ofra ku hə'i Shuwal, 18 vanya dzuku tə təra yi təwa Bet Horon, makərkunya dzuku nda tsə'u tə təra yi təwa ɓəlkə hə'i nda kwa ndzam Dakə Zeboyim təwa dadil takəu.
19 Aku bəji nga a tsə'u yakə dlə da ku dəhə hə'i Isra'ila wa, aka njir Filisti katə tə njir Ibrani tsa dlə katsakər ka masəu. 20 Aka ənga dəhə njir Isra'ila kwa səya da njir Filisti ka tasə nya gələ'u zwa tla, gələ'u, kəm ana tlaku kənda. 21 Kwaba tasə nya gələ'u zwa tla ana gələ'u, azurfa mətləu, kwaba tasə nya kəm ana lyang gələ'u zwa na tla.
22 Aka ənga pəshir pah nda a ləvaləva da mada zhang nda na katsakər ndara masə ku cha cha ku pama ləvaləva inda kə'i Saul ana Jonatan inda wa.
Jonatan tə Pah Njir Filisti
23 Kəl ngə dzuku ləvaləva njir Filisti inda tə biya ku lakur gwa Mikmash.