Sama'ila tə Ɓwanya nə Nji
12
1 Ngə Sama'ila tə nar nyi nə dəhə njir Isra'ila, <<Janə ya səndzə tə himi da dəhə sə nda hya na, ga fiya hi tə təl. 2 Sakana təl da tsa hi nda kwa nəu na hi. Naya a haltə ya twal na shishi pərtəu, ya nguli shili ɗa tangngə kə'i hi. Ya ɗa ka ndər nəu na hi fwatə ku tlakalakur ɗa ba'a nə ənya. 3 Janə ya man hi. Par ɗa ma huɗə Tlakəu ana a huɗə ndə nda nja fiya ka təl. Tla wa ya taa dləuya? Kwara wa ya taa dləuya? Wa ndə nda ya taa ɗiya? Wa ndə nda ya nə nyi ɓwaɓwata? Vanya ndə da ya taa dləu vangula tsari ya? Macha taa ya mər mada zhang ku sə inga, par ɗa ma, yo ɓəlandi.>> 4 Ngə nji tə na, <<A da ka taa ɗiya ea ndara ka nə ea ɓwaɓwatə wa, ya a da ka taa dləuya madami ku cha madawa wa.>>5 Ngə Sama'ila tə nar nda, <<Tlakə ngə matauli ənya, ana tsə'u ndə nda cha dzəviya, ənda a da hya uya ɗa na bikər madami wa.>>
Ngə nda wum ga na, <<Ah, Tlakə ngə matauli.>>
6 Ngə Sama'ila tə nar nyi nə nji, <<Tlakə ngə ndə nda tabiya ka Musa ana Haruna nda zəbiya na jival kəhi zəbiya vu Masar. 7 Sakan ja, ta'i ma tangngə hya bəgə ɗiu, yo ɓwanya nə hi təkəra tlər dləuya inda Tlakə tə mər ka hi ana aka jival kəhi.
8 <<Ahir Jakop ka nguli nyi tə dzəva Masar, nda tiwi nə Tlakə ka gwa'a vala, ya ngə Tlakə tə sə Musa ana Haruna, nda gwa zəbiya na jival kəhi vu Masar, ga fiya nda tə hə'i na.
9 <<Kəl ja, nda far na Tlakəu, Hyel kənda, aka ənga cha tləɗanda nda nə Sisera, dəgal ləvaləva nə njir Hazor, ana a nə njir Filisti ana təl Mowab, inda tə pah nda. 10 Nda tiwi nə Tlakə ga na, <A mər tə ea səpəla'a, ea ngyar Tlakə ga həsəli nə ka Ba'al ana Ashtoret. Kəl ja, sakana dləuya ea ku cha njir dawa kəea, eo həsəli nə ngha.> 11 Ngə Tlakə tə sə Jeruba'al, Barak, Jefta ana Sama'ila, ya ngə cha dləuya hi ku cha njir dawa kəhi ku kala laku, ga hya ngya ɓəlaɓəla nyi.
12 <<Kəl ja, nda hya la'a Nahash təl njir Amon kwa gwa'a pah hi, ngə hya ngyar Tlakə nda təl kəhi ga nar ɗa, <Eo i nja fiya ea təl ndo mər təlkur na ea.> 13 Ya sakana janə təl nda hya tabiya, nahi ngə tə gwa'a, ya janə Tlakə nə hi tə təl. 14 Macha hyo ləvər Tlakəu hyo həsəli nə nyi, hyo nəu nya cha ya a da hya ngyar nəu tsaubar nyi wa, ətsəu ma hya nəu Tlakəu dəhə hi ka təl nda kwa mər təlkur na hi, dəhə sə kwa ɗa tsa'atsa'a nə hi. 15 Kəl ja ma hya ngyar nəu nya Tlakəu, ga ngyar nəu tsaubar nyi, tlakə kwa mər dawa na hi wi nda cha ɗaka mər dawa na ka jival kəhi inda.
16 <<Sakan ja, ta'i ta hi ma tangnda hi tə hyo la'a sər məngəl inda Tlakə kwa mər tə lya hi! 17 A hyapuchi nə sakanə ma? Yo gədi Tlakə cha shili na dəradlər par ana par. Ya hyo zəndə sə ɗimi dəgal nda hya mər tə lya Tlakəu, aka hya gədi nja fiya hi təl.>>
18 Kəl ngə Sama'ila tə gədi Tlakəu, pəshinda tanyi Tlakə tə sətə dəradlər par ana par. Kəl dəhə nji tə ɗa na ləvər Tlakəu ana Sama'ila.
19 Ngə dəhə nji tə nar nyi nə Sama'ila, <<Pətlənya nə Hyel Tlakə ngha, a tsa mavi'i nghə da kuɗa, aka sakana a ngabiya tə ea ənda, a mərtə ea səpəla'a, matsa alenya səpala'a kəea, aka ea gwa'a nja fiya ea təl.>>
20 Kəl ngə Sama'ila tə nar nda, <<Ngwa hya da ləvər wa, aka a wurtə hya mər sə ɗimi, dəhə ka ənga ngwa hya da ngyar nəu Tlakə wa, kəl nda hya hətə nyi səli na dəhə ɗufwa hi. 21 Ngwa hya shata hi tsa Hyel ka nəu katə kəla sakəda ingə wa. A da ndo nau mərtə hi sə mənakə wa, ya a da ndo nau dləuya hi wa, aka sə kəla sakəda inga. 22 Aka Tlakə do ngyar nji nyi wa, aka kwa i cha cha mərtə hi ka nənyi na nji, aka ga nja la'a səlir tləm nyi. 23 Kəl nda naya na'a, Hyella kanda ya mərtə nyi səpəla'a nə Tlakə təwa tsau pətlənya aka hi. Ya yo dlədləɓətə hi sə inda mənakə inda tsa'atsa'a. 24 Kəl ja, vəlvəl ləvər ma Tlakə hya hətə nyi səli na ta zhang ana dəhə ɗufwa hi, hya ɗənghatə na sər məngəl inda cha mərtə hi inda. 25 Dəhə ka ənga ma hya biyama na mər sə ɗimi, njo zhazhinda hi dəhə hi ka təl kəhi.>>