Saul tə Mbəɗandə Mələm Jabesh
11
1 Ngə Nahash ndər Amon tə gi ɓandə Jabesh na pah. Ngə dəhə njir Jabesh tə nar nyi, <<Mən mbandər kə'i ka, naea tsə'u eo ɗa da kiɗa təlkur ngha.>>2 Kəl ja Nahash ndər Amon tə wuma, <<Yo mbandər kə'i hi a təkəra sə zhang, yo chakubiya lir chisəm nə kala ndə tsa'aka njir Isra'ila kwa ɗa ka sər həyati.>>
3 Ngə njirawawa'a nə Jabesh tə nar nyi, <<Nə ea hanyi məɗəfə ea sə changhabal gwa Isra'ila, ma a da ea uya ndə nda dləuya ea wa, eo nə nghə kərnəea.>>
4 Nda changhabal inda dzəva Gibiya tangnda Saul na ngya tə ga dəkar ndana mafakəu, kəl dəhə nda tə tiwi na kurakə dzəgam dzəgaməu. 5 Tsa'a na Saul kwa shili hya'atə ku fa, ga pərma tla nyi, ngə cha jawa, <<Mya ɗana njia? Mi ndo tiwa?>> Ngə nda ɓəla dəkar nyi sə nda njir Jabesh tə na nda.
6 Nda Saul tə ngatə ɓwanya kənda nda, kəl Shanguɗə Hyel tə səya təkəra cha na gyalkur, ngə huɗa cha tla. 7 Ngə Saul tə səya tla mətləu, ga dzədzəya, ga sə changhabal nə mada abari ku Isra'ila, ndo bəzə bəra, <<Dəhə ndə nda pa'a biya ga nəu Saul ana Sama'ila, əngə sə nda njo mər na tla zwa tlakənyi!>> Kəl ləvər Tlakə tə səya nji, kəl ngə nda biya papatə ga daɓtəkər wi ndə zhang. 8 Nda Saul tə tsəmtə nji vu Bezek, nja uya njir Isra'ila 300,000 ana njir Yahuda tsə'u 30,000.
9 Nda nar nyi nə changhabal inda shili nda, <<Nar nyi ma nə njir Jabesh, <Təvi pəchi tangkər zəkəu, hyo uya mbəɗa.> >> Nda changhabal inda yi nar nyi əngə nə njir Jabesh, nda mər hirgyaɗi. 10 Nda nar nyi nə ndər Amon nda, <<Əzəkə eo nə nghə kərnəea, ka mər dəhə sə nda tə ɗa mənakə nə ngha.>>
11 Vanya zəkə ngə Saul tə təkəbiya nji nyi dzuku makərəu, ngə nda gwa pah njir Amon fwatə mbudla ba'a nə pəchi tangkər, nji inda mbəɗə tə wiɗə zhang zhang.
Nja Mbanda Nyi Kər nə Təlkur nə Saul
12 Kəl ngə nji tə nar nyi nə Sama'ila, <<Ka wa inda ɗaka na ənda, <A Saul da kwa ɗa ka təl kəmən wa nda?> Shili ma na nda nə ea, ea kuɗənda nda.>>
13 Kəl ja Saul tə na, <<A ndə da njo tsəya ənya wa, aka ənya nə ngə Tlakə tə dləuya njir Isra'ila.>>
14 Kəl ngə Sama'ila tə nar nyi nə nji, <<Anda ma mən təra yi Gilgal, hi nda məno yi mbanda nyi kər nə təl.>> 15 Kəl dəhə nji tə təra yi Gilgal ga yi mbanda nyi kər təlkur nə Saul a huɗə Tlakəu. Hi nda nda handa təmachi nə daɓəkər a huɗə Tlakəu, ngə Saul kə'i dəhə nji tə səm ladər hirgyaɗi 'ual'ualəu.