10
1 Ngə Sama'ila tə hətə təkə na mal kwa ga pəu nyi ku kəra Saul ga gapətə nyi, cho na, <<A Tlakə da dzəviya nghə ka təl təkəra nji nyi ma? 2 Ma ma təkə ənya, ko ɓə na nji mətlə ləhə dza hu Rachel a vu Zelza a tə ɓəlkər hə'i Banyami. Ndo nar ngha, <Kwara inda ka biya ka ki gwa'a nda, a uya nda tə nji. Ya sakana ada nghə ngyar tə jigadəma təkəra nda ga go ɗəngha ngha. Cho jawa, <<Mi yo mər təkəra zər ɗa ja?>> >3 <<Ma ka biyama na ma'i kəl ka həya wu dəgal nə Tabor. Ko ɓə ka nji makər kwa ma'i gya da Hyel ki Betel hinda. Ndə zhang na nguli kua ana vanya ndə nda na gwazhilakə takwara makərəu, vanya ndə tsə'u na salakam ɓitir anapəu. 4 Ndo usa nghə ba'a ɗa nghə gwazhilakə takwara mətləu, kəl ba'a ka dləutsi.
5 <<Ahir nga ko gi Gibiya nacha ngə dəgəl Hyel tangnda mbwar daɓdzə nə ləvaləva njir Filisti. Ma ko go mələm tsəu, ko ɓə na daɓdzər njir mətakər kwa səya hya'atə kya tə mbwar həsəli kya tə dəgəl ndo tsa gədzəgədzi, ndo mbəɗə mbalau ndo tsa zəmbəl ndo na miya. 6 Shanguɗə Hyel kwa səya təkəra ka ana gyalkur, ya ku takər kə'i nda, ko ɗa ka vanya ndə paməu. 7 Ma dəhə sə ingə tə ɗa, kəl ba'a ka mər sə nda ɗufwa ka nar nghə ka məra, Aka Hyel tsa'a na ka.
8 <<Ko ghəya yi Gilgal təkəra ya, tangnda yo həya nghə ba'a lətə ga'a təwa hatəmachi nə nginda ana nə daɓəkər. Ka ngya hinda hanyi məɗəfa kəl ya shili par nghə sə nda ko məra.>>
Nja Fiya Saul ka Təl
9 Nda Saul tə sha cho ngyar sama'ila, ngə Hyel tə nə nyi taɗər ɗufə nə Saul. Ya dəhə sə inda Sama'ila tə na nda tə ɗa pəshinda. 10 Nda nda dzəva Gibiya, kəl janə daɓdzər njir mətakər tə ɓə kə'i nda. Ɗəɗəu tanyi kəl Shanguɗə Hyel tə səya kəra cha na dunama, ngə cha daɓətə kər kə'i nda ndo na miya ndo pə kurakəu. 11 Ma dəhə nji nda zəndə nyi tə la'a nyi cho na miya ka njir mətakər, kəl ndo jau kərnənda, <<Mi nə chul sə na ɗa na zər Kish na? Saul ndan ya, ku huɗa njir mətakər cha ya?>>
12 Kəl vanya ndə nda na ngya tangnda tə wuma, <<Alenya nji ingə tsə'u wa adan nda?>> Kəl ngə ɓwanya ngə tə ɗa ka karapəu, bəra, <<Saul ya ndər mətakər cha ma'a nacha ya?>> 13 Ahir Saul tə wur na na miya ana pə kurakəu, ngə cha təra gya tə mbwar hatəmachi kya tə dəgəl.
14 Ngə zamənya adanya Saul tə jau Saul ana mava nyi nda, <<Abar ma'i hya?>> Ngə Saul tə na, <<Ea ki gwa'a kwara inda, kəl ja, nda ea la'a a da ea uya nda wa, ngə ea təra yada Sama'ila.>>
15 Ngə zamənya adanya Saul tə na, <<Par ɗa sə nda Sama'ila tə nar ngha.>>
16 Ngə saul tə ɓəlakə nyi, <<Cha par ea tə babal ənda a uya tə nji kwara inda.>> Kəl ja, a da cha par nyi sə nda Sama'ila tə nar nyi təkəra nyar təlkur wa.
17 Sama'ila tə tsəmtə njir Isra'ila huɗə Tlakə a vu Mispa 18 ga nar nda, <<Janə sə nda Tlakəu, Hyel njir Isra'ila tə na, <Ya zəbiya na njir Isra'ila vu Masar, ya dləuya hi ku cha njir Masar ana dəhə alenya təlkur inda kwa nə hi ɓwaɓwatəu.> 19 Kəl ja, a ngyar tə hi Hyel kəhi sakana, nacha nda mbəɗandə hi ku dəhə ɓwaɓwatə kəhi ana ku təmachi, ya janə hya ngya ɗa tə ənya ga na, <A'a tabiya ea təl nda kwa ɗa təkəra ea.> Aka ənga, shili ma huɗə Tlakə ja ka chuli ka chuli ana ka nyavi ka nyavi.>>
20 Nda Sama'ila tə shili na dəhə nyavi njir Isra'ila ləhəu, ngə nja tabiya nyavi Banyami. 21 Ngə cha nar nyi nə njir nyavi Banyami inda nda shili ka njir ki ka njir ki, ngə nja tabiya njir ki Matri. A tə bata ngə nja tabiya Saul zər Kish. Kəl ja, ma nja gwa'a nyi a da nja uya nyi wa. 22 Nda jau Tlakəu, <<Vanya ndə da səkə ya?>>
Ngə Tlakə tə wuma, <<Ah, janə cha mbu tanyi biyahir kar ngə nja ɓutə nga.>>
23 Ngə nda hwi ga ki shili na cha, nda cha ta'i ku pama nji tə ɗa dzəgam nacha tsa kala ndəu. 24 Ngə Sama'ila tə nar nyi nə nji, <<A la'a tə hi ndə nda Tlakə tə tabiya ja? A vanya ndə da wi nacha wa.>> Kəl ngə nji tə har kurakə ga na, <<Hyella təɗar pya təl!>>
25 Ngə Sama'ila tə dəkəbiya nyi gadlagadla təlkur nə nji. Cha tsəfətə ku likatəkatə ga fiya huɗə Tlakəu. Ngə Sama'ila tə səu kala ndə ku laku kyo ki nyi.