Saul tə ɗa ka Təl
9
1 Vanya ndər gəna da hya'atə ku nyavi Banyami, tləm nyi Kish zər Abiyel, zər Zeror, zər Bekorat, zər Afiya. 2 Vanya zər nyi da tləm nyi Saul, zər tlakala gumaguma a wi sə wa, a vanya ndə da wi nacha na gumagumakur ana dzəgamkur ku huɗa njir Isra'ila wa.3 Kəl ngə kwara Kish adanya Saul tə sa i'i, ngə Kish tə nar nyi nə zər nyi Saul, <<Hətə zhang ku huɗa mavi'i inga hya ma'i kya'a hi hya ki gwa'a kwara inga.>> 4 Nda tərabiya tahə hə'i inda tə dəgəl ga tərabiya ku Shalisha, kəl ja, a da nda uya nda wa. Ngə nda nəu təwa hə'i Sha'alim, kəl ja, kwara inda da hinda wa. Ngə nda tərabiya tahə təwa hə'i Banyami, kəl ja, a da nda uya nda wa.
5 Nda nda yi ku hə'i Zuf, ngə Saul tə nar nyi nə mava nda tsa'a na cha nda, <<Anda ma ɓəlta ma, ma'a əngəwa ada ɗa kwa ngyar jigadəma təkəra kwara inga, cho go ɗəngha na ma.>>
6 Kəl ja mava nda ɓəlakə nyi, <<Ndzama, ku mələm na vanya ndəkə Hyel da, njo la'a səli nyi gagaɗa, ya kala sə nda cha na kwa ɗa vəlvələu. Mi yi da cha sakana, kustanyi cho par ma mbwa nda kwara ingə ti.>>
7 Ngə Saul tə nar nyi nə mava nyi nda, <<Ma ma yi ja ya, mi mo yi nə nyi nə ndə nda? Sərsum kəma wurti. A ga'a da tsa ma nda mo yi nə nyi nə ndəkə Hyel wa. Aa vanya sə da tsa ma ya?>>
8 Ngə mava nda ɓəlakənyi səkəu, <<Ndzama, zər Azurfa da tsa ya, yo nə nyi nə ndəkə Hyel ga cha dəkar ma mbwa nda mo uya nda ti.>> 9 Haaɗa ku Isra'ila, ma ndə tə ma'i ka ki jau Hyelləu, cho na, <<Anda mən təra kya da ndər la'a səu,>> aka njir mətakər zamin na njo maka nga nda njir la'a səu.
10 Ngə Saul tə nar nyi nə mava nyi nda, <<A ɗa tə mənakə ngan ja, shili ma ma'i.>> Ngə nda go laku a yo mələm nda ndəkə Hyel kwa nda.
11 Aku bəji nda ndo gya tə dəgəl yo mələm nda, ngə nda ɓə ka alenya ku'imahi'i ndo zəbiya ka gə ɓiti, ngə nda jau nda, <<Ndər la'a sə nda tangnaa?>>
12 Ngə nda wuma, <<Ah tangə cha, jangə cha biyaman hi ma'a. Kusa ma ja, shilikura cha ngə ku mələm kəea ənya, aka ənya nji kwa hatəmachi tə dzəgana kyatə dəgəl. 13 Gwakura hi ku mələm, hyo gwa həya nyi təvi cho təra gya tə mbwar həsəli kya tə dəgəl ka səm sərsuma. A nji do ghəya səm wa kəl cha shili, aka tuku kəl cha səkər papa'akur təkəra sər hatəmachi, ahir ənga, nji inda nja gədiya kwa dzugwa səma. Ma'i ma gi sakana hyo gi həya nyi ku bəji na.>>
14 Ngə nda təra gyo mələm nda, nda ndo gwa, kəl janə Sama'ila kwa shili təwan nda, cho təra gya tə mbwar həsəli kya tə dəgəl nda.
15 Vanya zəkə Sama'ila kwa shili, kəl ngə Tlakə tə chabiya nyi dzə nə sama'ila. 16 Cha nar nyi, <<Saka nənnə zəkə yo sətə nghə vanya ndər nyavi Banyami, ka dzəviya nyi ka təl təkəra njir Isra'ila. Cho dləuya nji ɗa ku cha njir Filisti. A la'a tə ya ɓwaɓwatə nda nji ɗa kwa, aka tiwi kənda həya ɗa ti.>>
17 Nda Sama'ila tə la'a Saul, ngə Tlakə tə nar nyi, <<Janə ndə nda ya ɓwanya nə nghə təkər nda, cho səm təlkur təkəra nji ɗa.>>
18 Saul tə ya da Sama'ila a nya lakur go mələm ga jawa, <<Amanə ki ndər la'a səa?>>
19 Ngə Sama'ila tə nar nyi, <<Naya ngə ndər la'a sə nga, ma'i biyama mən təra gya tə mbwar hatəmachi kya tə dəgəl, aka ənya hyo səm sərsum na ya. Əmbudla zəkə yo dəkar nghə dəhə sə inda ku jigadəma ngha, ahir nga yo səu nghə ku laku. 20 A təkəra kwara kəhi inda tə sa hanyi makər nga tərabiya nga, ngwa hya ɗəngha təkəra nda wa, a uya nda tə nji. Kəl ja ya, wa njir Isra'ila dəhə kwa fəkər da matsa naka ana dəhə njir ki ada ngha?>>
21 Ngə Saul tə wuma, <<Naya ndər nyavi Banyami ya, nyavi nda ndiya na kushikur ku Isra'ila. Ya njir ki kəea nga ndiya na tsaɗəkur ku huɗa njir ki alenya njir nyavi Banyami. Mya gwa'atə ka par ɗa chul ngəna ɓwanya?>>
22 Kəl ngə Sama'ila tə gwa na Saul ana mava nyi nda go vi tsəmdza, ga gwa nginda nda biyamar mihiɓi inda nja nga, kwa ɗa nji makərkumnyi. 23 Ngə Sama'ila tə nar nyi nə ndər tatəm, <<Anda na kum nda ya nə nghə nda, nda ya nar nghə ka fiya pam nda.>>
24 Kəl ndər tatəm nda tə hətə hi ana eah ga fiya biyamar Saul. Ngə Sama'ila tə na, <<Ndzama, janə sə nda nja fiya ngha. Səma, aka a nə nghə nə nja fiya ka ga ka səm ku bəji na, nahi ka mihiɓi inda ya nga.>> Pəshinda Saul tə səm sərsum tsa'a na Sama'ila.
25 Ahir nda səyo ta mələm hya'atə kya tə mbwar həsəli kya tə dəgəl nda, ngə nja ɓatliya nyi sərpiya nə Saul kya tə kəra ki. 26 Nda hya'atə kaɗə mbudla ngə Sama'ila tə nga Saul kya tə kəra ki nda cha na, <<Ɓatliya kərnghə ya səu nghə ku laku.>> Nda Saul tə ɓatliya kərnyi, nacha ana Sama'ila tə təra biya kya'anda. 27 Nda ndo biyahir mələm, ngə Sama'ila tə nar nyi nə Saul, <<Nar nyi nə mava nga cha təra biyama,>> ngə mava nda mər wi nda. Ngə Sama'ila tə nar nyi, <<Ta'i tangnə kushiu ka ga ya dəkar nghə mafakə nda Hyel tə na'a ya par ngha.>>