Njir Isra'ila tə Gədi Nja Fiya Nda Təl
8
1 Nda Sama'ila tə hala, ngə cha mbanda nyi kər nə nguli shili nyi ka njir nəuma nə njir Isra'ila. 2 Tləmər zə'ualə nyi Joel ana tləmər mətləkunya zər nyi Abija, nanda ingə njir nəuma vu Biyersheba. 3 Kəl ja, a nguli shili nyi inda da nəu dərpə nyi wa. Nda sha ta nda təwa i kwaba, nda biyama na dləu vagula, ya a da ndo nəu jiri wa.4 Ngə dəhə njirawawa'a Isra'ila tə tsəmətədzə tə mbwarzhang ga shili da Sama'ila vu Rama. 5 Nda nar nyi, <<A hal tə ka, ya a nguli nghə da nəu dərpə nghə wa, fiya ea təl ndo nəu na ea wi nə alenya hə'i inga.>>
6 Kəl ja, nda nda na, <<Fiya ea təl ndo nəu na ea,>> Sama'ila da ngatə mənakə nə wa, aka ənga, cha pətlənya nə Tlakəu. 7 Ngə Tlakə tə nar nyi, <<Mər dəhə sə inda nji tə gwa'a ka mərtə nda, a da nakə ngə nda ngyar wa, kəl ja, naya ngə a ndo i ya ɗa ka təl kənda wa. 8 Əngə tanyi ngə nda mər fwatə tə pəchi nda ya zəbiya na nda vu Masar tsa'a tə pəchi nə ənya, nda ngya ɗa ga həsəli nə katəu, ya əngə ngə ndo mər nə ngha. 9 Sakana mərtə nda tanghə sənda nda gwa'a, kəl ja, ka təɗəhimi nə nda 'ual'ualəu, ka dəkəbiya nda nda zəndə chul sə inda təl nda kwa səm təlkur təkəra nda kwa mərtə nda.>>
10 Sama'ila tə pə nda dəhə ɓwanya Tlakə ngə nə nji inda kwa gwa'a cha fiya nda təl nda. 11 Cha na, <<Janə chul sə nda təl nda kwa səm təlkur na hi kwa məra, cho fa'atə nguli shili kəhi ka ləvaləva nyi, alenya nguli shili kəhi kwa mər tlər na charkaina taku ana taku i'i, alenyi kwa hwi biyamar charkaina taku nyi. 12 Alenyi cho mərtə nda ka gau nə dəbu dəbu ana tufəkumnyi tufəkumnyi, alenyi tsə'u kwa ɗa ka njir zwa fa nyi ana mər fa nyi, əsəkə tsə'u alenyi ka ɓatlə kar pah ana kar tlər nə charkaina taku nyi. 13 Cho fa'atə ku'imahi'i kəhi ka ɓatlə sə inda kwa shiuni kwitəkwitəu ana njir tatəm ana ka səl səu. 14 Cho dləuya fa anap kəhi i'i ana fa kəhi i'i ana fa zaitun kəhi i'i ba nə nyi nə kadakaliya nyi i'i. 15 Cho dləutsə zhang ku kumə nə sə uhiuhi kəhi ana anap kəhi ba'a nə nyi nə njirawawa'a nyi ana kadaliya nyi i'i. 16 Cho dləuya mavi'i kəhi ana kwatəra kəhi i'i ana tla kəhi inda ndiya na mənakəu ana kwara ka mər tlər nyi. 17 Cho dləutsə zhang ku kumə nə sərshishi kəhi, ya nahi təkərnəhi kwa ɗa ka mavi'i nyi. 18 Ma bəji ngə tə shili, hyo tiwi aka təl nda hya tabiya nyi nə kərnəhi, ya Tlakə do wum nə hi pəshi nda wa.>>
19 Kəl ja, nji inda tə ngyar səhimi da Sama'ila, nda na, <<Dəhə ka ənga, eo i təl nda kwa ɗa təkəra ea. 20 Təwa ənga, eo ɗa wi alenya hə'i inga, ana təl kwa səm təlkur təkəra ea, ana cha nəu na ea kyo pah i'i.>>
21 Nda Sama'ila tə ngatə dəhə sə inda nji inda tə na, ngə cha ɓəla nar nyi nə Tlakəu. 22 Ngə Tlakə tə wuma, <<Dləukər na sənda nda na, ka fiya nda təl.>>
Ngə Sama'ila tə nar nyi nə njir Isra'ila, <<Kala ndə cha ɓəl kyo mələm nyi.>>