7
1 Ngə njir Kiriyat Jeyarim tə shili hətə Gwarara Mbandər Tlakə nda. Nda hətə gyo ki Abinadab kyatə dəgəl ga dzəviya zər sal nyi Eleyazar ka cha ɓəla Gwarara Mbandər Tlakə nda.Sama'ila tə Nəu na Njir Isra'ila
2 Gwarara mbandər Tlakə səkar tə dzə vu Kiriyat Jeyarim, kwa ɗa fa mətləkumnyi, ngə njir Isra'ila tə tiwi nə Tlakəu ka cha vala nda. 3 Ngə Sama'ila tə nar nyi nə dəhə njir Isra'ila, <<Macha ana dəhə ɗufwa hi nə hyo ɓəl shili da Tlakəu, hya təkə na mihiɓir hyel ana Ashtoret hya nə nyi kərnəhi nə Tlakə hya həsəli nə nyi, ya cho dləuya hi ku cha njir Filisti.>> 4 Ngə njir Isra'ila tə pənda Ba'al ana Ashtoret, ga həsəli nə Tlakəu.
5 Ngə Sama'ila tə na, <<Tsəmtə ma dəhə njir Isra'ila vu Mispa, yo pətlənya nə Tlakə ka hi.>> 6 Nda nda tsəmtədzə vu Mispa, nda shili na ɓiti ga pənda mar Tlakəu. Pəshinda nda səmdzən ga dəkəbiya bikə kənda, nda na, <<A mər tə ea səpəla'a nə Tlakəu.>> Sama'ila tsə'u tə ɗa ka gavərma kənda vu Mispa.
7 Nda njir Filisti tə ngatə ənda njir Isra'ila tsəmtə tə dzə vu Mispa, ngə təl i'i nə njir Filisti tə shili ka pah nda. Nda njir Isra'ila tə ngatə ənga ngə ləvər tə səya nda tsa njir Filisti. 8 Nda nar nyi nə Sama'ila, <<Ngwa ka da ta'i na tiwi nə Tlakəu, Hyel kəmən, ka cha dləuya ea ku cha njir Filisti wa.>> 9 Ngə sama'ila tə hətə zər gam ga handa təmachi nə zumu. Cha tiwi nə Tlakə tə dəbar njir Isra'ila, ya ngə Tlakə tə wum nə nyi.
10 Ku bəji nda Sama'ila kwa hatəmachi nə nginda nda, njir Filisti tə shili ləhə ka nda pah ka njir Isra'ila. Kəl ja, pəshinda Tlakə tə dəradliya njir Filisti səya kya huɗamələm na dəradlə ɗimiɗimi, nda tə gwa'atə nda wi kəɓang ga təra na hwi mar njir Isra'ila. 11 Ngə njir Isra'ila tə zəbiya vu Mispa ga gədlə njir Filisti, ndo kuɗə nda, tsa'a vu Bet Kar.
12 Ngə Sama'ila tə hətə hangu ga fiya ku pama Mispa ana Shen. Ngə cha fəndzə nyi Ebeneza, nacha ngə, <<Ba'a ənya Tlakə kwa vala ea.>> 13 Əngə nja kura njir Filisti, ya a da nda zhaka gwa ku ɓəlkər hə'i njir Isra'ila səkə wa.
Ku dəhə ngya Sama'ila, Tlakə kwa mər dawa na njir Filisti. 14 Mələm inda njir Filisti tə dləuya tsa njir Isra'ila fwatə vu Ekron tsa'a vu Gat, tə ɓəla ɗa ka nə njir Isra'ila. Ya njir Isra'ila tsə'u tə dləuya hə'i inda lələhəu ku cha njir Filisti. Ngya mənakə da tsə'u ku pama njir Isra'ila ana njir Amori.
15 Sama'ila tə biyama na nəu na njir Isra'ila ku dəhə ngya nyi. 16 Kala fa cho maka biya ka zhuli mələm hya'atə vu Betel yi Gilgal tsa'a yi Mispa, cho mər nəuma nə nji ku dəhə mələm inga. 17 Kəl ja, cho maka ɓəl shilo ki nyi vu Rama, tangnda cho mər nəuma nə njir Isra'ila. Ngə cha hərtə nyi dzəgana nə Tlakə vu Rama nda.