Nja Ɓəlandə Gwarara Hyel yi Isra'ila
6
1 Gwarara Tlakə nda tə ngya ku hə'i njir Filisti hya məɗəfa, 2 njir Filisti tə nga ka pərist ka yakə kənda ga na, <<Mi məno mər na gwarara Tlakə na? Par ea ma ənda məno ɗana ɓəlandə ya tə mbwar ngya nyi.>>3 Ngə nda wuma, <<Ma hyo ɓəl na gwarara Hyel njir Isra'ila, əngwa hya ɓəlndə jwajwa wa, dəhə ənda cha ɗa, hya lətə tsa'a na ga'a ka səpəla'a kəhi. Təwa ənga hyo mbəa, ya hyo zəndə sə nda gwa'atə cha nə hi ɓwaɓwatəu.>>
4 Ngə njir Filisti tə jawa, <<Chul ga'a manə eo ləta?>>
Ngə nda wuma, <<Səlirma mbəlkəɗimi tufəu nə bəjingha ana səlirma ungi tufəu nə bəjingha, məlməl na təl i'i nə njir Filisti, aka təmachi zhang ngə tə uya hi ana təl inga. 5 Hya mərtə səlirma mbəlkəɗimi ana nə ungi inda tə səwandə hə'i nda, hya nə nyi səli nə hyel njir Isra'ila. Ndara tsə'u cha hənda təmachi nyi təkəra hi ana hyel kəhi ana hə'i kəhi. 6 Mya gwa'atə hya mərtə ɗufwa hi ɓaɓal wi nda njir Masar ana Fir'auna tə məra? Nda Hyel tə nə nda ɓwaɓwatə ya, a da nda ngyar njir Isra'ila nda biya ku hə'i nda ma?
7 <<Sakana ɓatlətə ma taɗər charkaina tla, ana tla mətlə inda mapiɗi ya a nja ta fətə nda gang wa, hya mbatə nda charkaina tla nda, kəl ja, hya gəziya ngulinguli nyi ku ki. 8 Hya hətə gwarara Tlakə nda hya fəu ku charkaina tla nda, hya pəu səlirma mbəlkəɗimi ana nə ungi inda ku vanya gwarara hya fəndzi. Hya fəu nda ku laku hya ngyar cha təra sənyi, 9 kəl ja, hya fiya lya hi hya ndzama. Ma cha dləutsə laku yi Bet Shemesh, yau nacha nga gwa'atə Tlakə tə fəkə mən təmachi dəgal na. Ma a da tsə'u wa, məno zəndə ənda a da nacha ngə wa, bəjir təmachi tanyi ngə tə ɗa sənyi.>>
10 Kəl ngə nda mər wi nda. Nda hətə chulkə tla inda ga mbatə nda charkaina ga gəziya ngulinguli nyi ku ki. 11 Nda fəu gwarara Tlakə nda ku charkaina nda tsa'a na gwarara nda na səlirma ungi ana nə mbəlkəɗimi kwa nda. 12 Kəl tla inda tə təra tisang gi Bet Shemesh, ndo ma'i ndo tiwi, a da nda sha təwa chisəm ndara matsal wa. Təl nə njir Filisti inda tə nəu nda tsa'a ku ɓəlkər Bet Shemesh.
13 Aku bəji nda njir Bet Shemesh kwa mər uhi kənda ku dakəu, nda nda har lya nda ga la'a gwarara nda, nda mər hirgyadi gagaɗa. 14 Charkaina tla nda tə go fa Joshua ndər Bet Shemesh, tangnda cha ta'i a dza vanya mə dəgaləu. Nji inda tə huhuɓəya charkaina tla nda ga tlakər wulya təkəra tla inda ga handa təmachi nə nginda nə Tlakəu. 15 Njir Levi tə hətə gwarara Tlakə nda ana gwarara nda na səlirma i'i nə bəjingha kwa nda, ga fiya tə mə dəgaləu. Pəshi nda njir Bet Shemesh tə lə ga'a nə nginda ga hatəmachi nə Tlakəu. 16 Təl njir Filisti tufu inda tə la'a dəhə sə inga ga ɓəl yi Ekron pəshinda tanyi.
17 Ja inə səlirma nə mbəlkəɗimi nə bəjingha inda njir Filisti tə lətə ka hənda səpəla'a nə Tlakəu, zhang ka Ashdod zhang ka Gaza, zhang ka Ashkelon zhang ka Gat ana zhang ka Ekron. 18 Ətsəu nda lətə səlirma ungi bəjingha məlməl na ɗangkura mələm təl tufu nə njir Filisti inda, mələm inda ku ɓangtili ana inda biya tiya cha. Mə dəgal nda nda fiya gwarara Tlakə tə nda, tsəutanyi ba'a ənya tə fa Joshua ndər Bet Shemesh.
19 Kəl ja, Tlakə tə dəgə alenya njir Bet Shemesh, ga kuɗənda nji məɗəfəkumnyi aka nda ndzamar gu ta gwarara mbandər nə Tlakə nda. Nji inda tə mər sə'ingu 'ual'ualəu, aka Tlakə tə kuɗənda nji ɗang ku huɗa nda, 20 ngə njir Bet Shemesh tə jawa, <<Wa kwa nau ta'i mar Tlakəu, Hyel karti na? Abar gwarara nə kwa ma'i ga cha təkə na ea?>>
21 Kəl ngə nda sə changhabal yada njir Kiriyat Jeyarim bəra, <<Njir Filisti ɓəlandə tə gwarara mbandər Tlakə nda. Anda ma hya hətə hya təra ni.>>