Gwarara Hyel ku Pama Njir Filisti
5
1 Ahir njir Filisti tə dləuya gwarara Hyel vu Ebeneza, nda hətə ga yi nə vu Ashdod. 2 Ngə nda fəu gwarara nda gu mbwa'alə katə kənda Dagon, ga fiya ləhə dza Dagon. 3 Nda njir Filisti tə hya'atə kaɗə mbudla vanya zəkəu, kəl janə Dagon tsupətənya hu'i, a huɗə gwarara tlakə nda. Ngə nda ɓəla hətə Dagon ga fəya tə mbwar ngya nyi səkəu. 4 Kəl ja, əmbudla ma nda hya'ati, kəl janə Dagon tsuətənya hu'i a huɗə gwarara Tlakə nda. Kəra cha ana hya cha tsəpə biyo gwarnyvi tə ɓəlɓəla, kəl zumkura dza cha ngə tə həyadza. 5 Nacha gwa'atə ba'a ənya a vanya pərist nə Dagon ndara vanya ndə da nda ma cho gwa gu mbwa'alə Dagon nda vu Ashdod nda, kwa fə hya cha ku gwarnyavi wa.6 Tlakə tə nə nyi ɓwaɓwatə nə njir Ashdod 'ual'ualəu, cha ləvərandə nda, ga nə nda ɓwaɓwatə na mbəlkəɗimi, dəhə ka nji inda lələhəu. 7 Nda njir Ashdod tə la'a sə inda kwa ɗa, ngə nda na, <<Ngwa məna i gwarara Hyel njir Isra'ila ngya kə'imən tangnə wa, aka janə cha shili tə na ɓwaɓwatə nə mən ana nə hyel kəmən Dagon.>> 8 Kəl ngə nda nga dəhə ka təl nə njir Filisti ga jau nda, <<Mi məno mər na gwarara Hyel njir Isra'ila na?>>
Ngə nda wuma, <<Hətə nji gwarara Hyel nə njir Isra'ila ngə yi Gat.>> Aka ənga nda təra na gwarara Hyel njir Isra'ila nda.
9 Kəl ja, nda gwarara nda yi nda, Tlakə tə nə nyi ɓwaɓwatə nə njir mələm nda gagaɗa. Cha nə nda ɓwaɓwatə na mbəlkəɗimi nda tə biya dzər dəhə njir mələm nda, tlakala ana nji halhala. 10 Ngə nda lənda gwarara Hyel nda yi Ekron.
Nda gwarara Hyel kwa go Ekron, ngə njir Ekron tə ghəya tiwi ndo na, <<A shili tə nda na gwarara Hyel njir Isra'ila, ga cha kuɗənda mən dəhə mən.>> 11 Aka ənga nda nga dəhə təl nə njir Filisti, ga nar nda, <<Lənda ma gwarara Hyel njir Isra'ila yi nda cha hya'atə ti, ma'a əngə wa cho kuɗənda mən dəhə mən ka njikə mən.>> Aka ləvər səya tə nji 'ual'ualəu, aka ɓwaɓwatə 'ual'ual nda Tlakə tə nə nda. 12 Nji inda pa'a tə kuɗa, mbəlkəɗimi tə biya dzən nda, ya kurakər tiwi njir Ekron həya tə huɗamələm.