4
1 Dəhə saka nda Sama'ila tə ɓwanya, njir Isra'ila kwa səhimi da cha.Njir Filisti tə Dləuya Gwarara Mbandəra
Njir Isra'ila tə biya ki pah ka njir Filisti. Njir Isra'ila tə daɓə vu Ebeneza, njir Filisti tsə'u tə daɓə vu Afek. 2 Njir Filisti tə pah njir Isra'ila, ahir pah ɗimiɗimi nda kura njir Isra'ila ga kuɗənda kwa ɗa nji 4,000 tə mbwar pah nda. 3 Nda ləvaləva tə ɓəl shili tə mbwar tsəmdzə kənda, ngə njirawawa'a Isra'ila tə jawa, <<Mya gwa'atə Tlakə tə ngyar njir Filisti tə kura mən ənya? Mən ki shili na Gwarara Mbandər nda vu shilo, aka ga cha ma'i kə'i mən cha dləuya mən ku cha njir dawa kəmən.>>
4 Ngə nja sə nji yi Shilo, ngə nda yi shili na Gwarara Mbandər Tlakə Ndər Gyalkur Dəhəu, inda na ngya ku pama cherubim i'i. Ya nguli shili Eli inda mətlə inda, Hofni ana Finehas, hinda nda ana Gwarara Mbandər nə Hyel nda.
5 Nda gwarara mbandər Tlakə tə shili tə mbwar tsəmdzə nda, dəhə njir Isra'ila tə hya'andə kurakə nda ma'a hə'i tə dzədzi. 6 Nda njir Filisti tə ngatə kurakə ngə nda jawa, <<Kurakə mi ngə kya tə mbwar tsəmdzə njir Ibrani ənga?>>
Nda nda ngabiya ənda gwarara Tlakə shili tə tə mbwar tsəmdzə nda, 7 ngə ləvər tə səya njir Filisti, ngə nda na, <<Vəlvəl hyel shili tə tə mbwar tsəmdzə njir Isra'ila, ku ɓwaɓwatə nə mən! A chul sə wi nə da ta ɗa wa. 8 Sər təhuɗə na mən! Wa kwa dləuya mən ku cha hyel inda na dunama? Na nda ingə hyel inda tə kuɗənda njir Masar na dəhə chulkə təmachi kwa tə dadil takəu. 9 Njir Filisti, ɗa ma na dunama! Mbabiya ma dza hya da ɗa mavi'i njir Ibrani, wi nda nda mavi'i kəmən ɗakaɗa. Mbabiya ma dzə hya pah!>>
10 Ngə njir Filisti tə pah ga kura njir Isra'ila, kala ndə tə təra na hwi kyo madləɓa nyi. Nja kuɗənda njir Isra'ila ɗang gagaɗa, njir Isra'ila tə tar ləvaləva 30,000. 11 Nja dləuya gwarara mbandər Hyel nda, nguli shili Eli inda mətlə inda, Hofni ana Finehas tə kuɗa.
Tər Eli
12 Pəshinda tanyi vanya ndər nyavi Banyami tə hwi tanyi nya pah nda yi Shilo ana lukutə nyi tatanyi ana bərbər ku kəra cha. 13 Nda cha dzəva, kəl janə Eli tə ngya ku hwakə nyi a nya laku cho səka, aka ɗəfwa cha kwa ngi nyi aka gwarara Hyel nda. Nda ndə nda gu ta mələm ga dəkar sə nda ɗa, kəl dəhə mələm tə ghəutə tiwi.
14 Ngə Eli tə ngatə tiwi ga jawa, <<Mi nga ɗa njo tiwa?>>
Ndə nda tə kusa ya da Eli, 15 nda fa nyi dləkumnyi parnya chisəu ya wuləfə cha. 16 Ngə cha nar nyi nə Eli, <<Shili ɗa nə nya pah, ənyan nə ya hwita ɗa.>>
Ngə Eli tə jawa, <<Mya ɗa zər ɗa?>>
17 Ndə nda tə shili na mafakə nda tə na, <<Njir Isra'ila tə hwi tsa njir Filisti, ya a kuɗənda tə nji ɗanghəu, nguli shili nghə inda, Hofni ana Finehas ma'a kuɗə ti, ətsəu a dləuya tə nji Gwarara Mbandər Hyel.>>
18 Nda Eli tə ngatə nyar gwarara Hyel, ngə cha dla tatlətitikər ku hwakə nda a nya lakur gu ta mələm. Wulya cha tə ɓəla, ngə cha tah, aka a haltə cha ya ndər dzə cha gagaɗa. Eli tə nəu na njir Isra'ila fa fwaɗəkumnyi.
19 Aku bəji nda huɗə ku ta sələkənya Eli, mala Finehas ya kaɗə cha yah. Nda cha ngatə ənda a dləuya tə nji gwarara Hyel, ya sələkə nyi ana sal nyi kuɗə ti, ngə ɓəlakəryah tə səya nyi, ngə cha yah, kəl ja, ɓwaɓwatər ɓəlakər yah tə ndiya dunama nyi ngə cha tah. 20 Nda cho kuɗə bəlatəu, ngə mahi'i indo vala nyi inda tə nar nyi, <<Chinda dzəa aka a yah tə kə zər sal!>> Kəl ja, a da cha səhimi da nda wa, abiyakata cha wuma.