Tlakə tə Nga Sama'ila
3
1 Zər nda, Sama'ila, kwa zəba nə Tlakə da kiɗa Eli. Aku biji nda Tlakə da kwa maka ndər na nji wa, ya a takər nda ɗang wa.2 Vu'i zhang, Eli nda kaɗə wulfa, tə piya tanyi tə mbwar piya nyi nda cha tsəl ni. 3 Təkəsə nə Hyel tsəutanyi kwa gəɗa, ana Sama'ila tə piya ku mbwa'alə Tlakəu, mbwanda gwarara alkawal Hyel ti. 4 Təma ngə Tlakə tə nga Sama'ila.
Kəl ja, Eli tə na, <<A da ya nga nghə wa, ɓəl ka yi piya tangha.>> Kəl ngə cha ɓəl ga yi piya tanyi.
6 Ngə Tlakə tə ɓəla nga nyi səkəu, <<Sama'ila!>> Ngə Sama'ila tə hya'atə ga ya da Eli, ga na, <<Janə ya, ka nga ɗa.>>
Ngə Eli tə na, <<Zər ɗa, a da ya nganghə wa, ɓəl ka yi piya tangha.>>
7 Sakanda a Sama'ila nda ta zəndəbiya Tlakə wa: A nja ta biyandə nyi ɓwanya Tlakə tə babal wa.
8 Ngə Tlakə tə nga Sama'ila makərkunyi, ngə Sama'ila tə hya'atə ga ya da Eli, ga na, <<Janə ya, ka nga ɗa.>>
Təma ngə Eli tə ngabiya ənda Tlakə ngə kwa nga zər nga. 9 Kəl ngə Eli tə nar nyi nə Sama'ila, <<Ɓəl ka yi piya tangha, macha ɓəla nga ngha, ka na, <Ɓwanya, Tlakəu, aka kadakaliya nghə kwa sə himi.> >> Kəl ngə Sama'ila tə ɓəl ga yi piya tanyi tə mbwar piya nyi.
10 Ngə Tlakə tə shili ga ta'i tangnda, ga nga wi nda cha nga zha makər inda, <<Sama'ila! Sama'ila!>>
Təma ngə Sama'ila tə na, <<Ɓwanya, aka kadakaliya nghə kwa sə himi.>>
11 Ngə Tlakə tə nar nyi nə Sama'ila, <<La'a, yo mər vanya sə vu Isara'ila, nda ma kala ndə nda hima cha tə ngati, ləvər kwa səya nyi. 12 Pəshi nda yo mərtə nyi sə nda ya na nə Eli ana njir ki nyi, fwatə tə ghəya nyi tsa'a tə udiya nyi. 13 Aka a nar nyi tə ya ənda yo tlanda nyi nəuma nə njir ki nyi ba'anawa aka nguli shili nyi tə pə ɓwanya ɗimi təkəra ya, ya Eli zəndəti, ngə cha ngyar tsə nda tsari. 14 Aka ənga, a səmnda nyi tə ya fəla nə ki Eli ənda, <Hatəmachi ndara lə ga'a da kwa hənda ɓwaɓwatər səpəla'a ki Eli wa.> >>
15 Sama'ila tə piya kəl nda vu'i tə wura ngə cha mbəɗiya nyaki Tlakəu. Ləvər tə səya nyi tsa dəkar nyi takər nda nə Eli, 16 kəl ja, Eli tə nga nyi ga na, <<Zər ɗa, Sama'ila.>> Ngə Sama'ila tə wuma, <<Janə ya.>>
17 Ngə Eli tə jau nyi ga na, <<Mi Tlakə tə nar ngha? Par ɗa, ngwa ka da hiwanda ɗa wa. Tlakə kwa nə nghə ɓwaɓwatə ma a da ka par ɗa dəhə sə nda cha par nghə wa.>> 18 Ngə Sama'ila tə par nyi dəhə səu, a na cha hiwanda madami tsa cha wa. Ngə Eli tə na, <<Nacha ngə Tlakəu, əngwa cha mər sə nda mənakə tə lya cha.>>
19 Sama'ila tə həa, Tlakə tsə'u tsa'a na cha, ya a da cha ngyar nyabiya ɓwanya nyi mada zhang wa. 20 Dəhə Isra'ila fwatə tə hə'i Dan, tsa'a tə hə'i Biyersheba tə ngabiya ənda Sama'ila ndər mətakər Tlakə nga. 21 Tlakə tə biyama na chabiyadzə vu Shilo, ya hinda cha chabiya nyi kərnyi nə Sama'ila təwa ɓwanya nyi.