Hanatu tə Usaku Tlakəu
2
1 Kəl ngə Hanatu tə pətlənya ga na:<<Ɗufwa ya kwa mər hirgyaɗi ku Tlakəu,
hirgyaɗi tsa ya aka sənda cha mərtə ɗa!
ya kwa gyaɗi njir dawa ɗa,
ya kwa mər hirgyaɗi 'ual'ualəu aka Hyel tə vala ɗa.>>
2 <<A ndə karti da wi Tlakə wa,
a ndə da pabiya da cha wa,
a ndər ɓəla da wi Hyel kəmən wa.>>
3 <<Ngwa tsə'u hya ndər hyo bu kərnəhi
ndara hya ɓwanya hyo hə kəra kərnəhi wa,
aka Hyel Tlakə kwa zəndi,
ya nacha ngə kwa mərtə nyi nəuma nə dəhə nji təkəra sə'inda ndo məra.>>
4 <<Laga ləvaləva inda na dunama a ɓəɓəlti,
kəl ja, nji kəla dunama kwa ɗa na dunama.
5 Nji nda na sərsum haaɗa, sakana kwa ngatə huɓa,
nji nda kwa ngatə huɓə tsəu, huɓə wurti.
Mala kəla ya, yiya tə ngulisha məɗəfa,
mala nda na ngulisha'a ɗang tsəu, a tsə'u da nda wa.>>
6 <<Tlakə ngə kwa shili na tah ana pi,
nacha kwa yi na nji ku hwa, nacha tsə'u kwa hya'andə nda.
7 Tlakə ngə kwa shili na ɗali ana gəna,
nacha kwa tashiya səlir ndəu, nacha kwa hətə səlir ndə tsəu.>>
8 Nacha kwa hya'andə njir ɗali ku bərbər
cho hya'andə njir tari tsə'u ku ɓwaɓwatə kənda,
ba'a cha njinda nda tə mbwar zhang ka zər təl,
cho fiyanda tə vir ngya nda na səli.
Aka shimbal ghəyar hə'i, nə Tlakə nga,
a təkəri ngə cha fətə dunəya.
9 Cho ɓəlatə pya nji nyi nda chichinyi ya ana jiri,
kəl ja, nji kəməngar kwa ngya ku kutla.
<<A da dunamar ndə ngə kwa gwa'atə ndə kwa kura wa.
10 Njo kuɗənda njir mər dawa na Tlakəu.
Tlakə kwa gwa'atə dəradlər par kwa səya kya huɗamələm, ga cha char gyalkur nyi.>>
<<Tlakə kwa tlanda nyi nəuma nə dəhə dunəya.
Cho nə nyi gyalkur nə təl nda cha tabiya,
cho mərtə təl nda cha dzəviya kwa kura.>>
11 Ngə Elkana tə təra yo ki vu Rama, kəl ja, zər nda tə ngya vu Shilo, cho mər tlər Talakəu a tə kiɗa pərist Eli.
Nguli Shili Eli
12 Nguli shili Eli tsə'u shi'ushi'u nyi, a da ndo la'a səlir Tlakə wa. 13 Sə nda pərist kwa kina məra, nacha ngə, ma nja shili na sər hatəmachi, ku bəji nda kum kwa tsafə tə hu'u, kadakaliya pərist kwa shili na sər chaku sə dəgal nda na nya cha makər ku cha cha. 14 Kəl cho chiu gu təm kum nda, kala sə nda cha chakuya a ɗatə ka nə pərist. Kəl ja, janə sə nda ndo mər nə dəhə njir Isra'ila nda tə shili hatəmachi vu Shilo. 15 Tsəu kəla nja taa nginda mal, kadakaliya pərist kwa shili nar nyi nə ndə nda kwa hatəmachi nda, <<Gwa'arə nyi kum nə pərist ka cha tsagu, a da cho dləu ɓwaɓwanyi tsa kə wa, kəl katla'u nyi.>>
16 Ma ndə nda nar nyi, <<Əngwa mal nga ngi gwadagəu, ka dzəgwa hətə kala sə nda ko i,>> kəl kadakaliya nda kwa wuma, <<A'a, na'a sakana, ma a da wa, yo hətə na tuku.>>
17 Chul ngəna səpəla'a nguli shili Eli, tə ɗa 'ual gagaɗə tə lya Tlakəu, aka ndo həyatə sər hatəmachi Tlakəu.
18 Kəl ja, madangə Sama'ila zər cha, cha biyama na mər tlər mar Tlakəu, ana efod linən dzə nyi. 19 Kala fa ama nyi kwa mbətə nyi ləkutə daɗədaɗa, cho yi na nyi ma ndo yi hatəmachi nə ka fa ka fa na nda na sal nyi. 20 Eli kwa səkə nyi papa'akur nə Elkana ana mala nyi cho na, <<Ga Tlakə nə hi ngulisha'a na mala na, ga nda hətə məngya nə cha pətlənya kar ga nə nyi nə Tlakə na.>> Kəl ba'a nda təra kyo ki. 21 Tlakə tə ɗa na ɗanghali təkəra Hanatu, cha hətə huɗə ga yah nguli shili makərəu ana ku'imahi'i mətləu. Sama'ila tsə'u tə həa a huɗə Tlakəu.
22 Eli tsə'u tə hala, ya kwa ngatə cha dəhə sə inda nguli shili nyi kwa mər nə dəhə njir Isra'ila ana ənda nda piya na mahi'i inda kwa mər tlər tə lakur gu Madləɓa Tsəmədza. 23 Ngə cha nar nda, <<Mya gwa'atə hyo mər chul ngəna səa? Aka dəhə nji kwa ɓwanya təkəra ɗimkura sənda məra hi. 24 Miɗa ma nguli ɗa! Ngyar ma sə nga! A da sə mənakə nə yo ngatə kwa ma'i, njikə Tlakə kwa pə təkəra hi wa. 25 Ma ndə tə mərtə nyi səpəla'a nə kuvanyi, Hyel kwa ta'i ka cha, kəl ja, ma ndə tə mərtə nyi səpəla'a nə Tlakəu, wa kwa ta'i ka cha?>> Dəhə ka ənga, ngulisha'a inda da səhimi da adən nda wa, aka Tlakə wurtə ɓatliya ka cho kuɗənda nda.
26 Sama'ila tə biyama na həa, ana uya kwambiyakur tsa Tlakəu ana nji.
Takər Təkəra Ki Eli
27 Kəl vanya ndər mətakər tə shili da Eli ga nar nyi, <<Janə sə nda Tlakə tə na, <A da ya chabiya nyi kərɗa nə jival nghə ku bəji nda nda vu Masar tə kiɗa Fir'auna ma? 28 Ya tabiya njir ki jival nghə ku pama dəhə nyavi njir Isra'ila, ka nda ɗa ka pərist ɗa, ka nda gya tə dzəgana, ka ngi sə nda kwa shiuni kwitəkwitəu, ana ka nda handzə efod huɗə ɗa. Ətsəu ya dləukər nda uya mbaɗə kənda aku dəhə sərhatəmachi nda njir Isra'ila kwa ha. 29 Mya gwa'atə hyo kamu'u sər hatəmachi ɗa ana ga'a nda ya na nja shili na? Mya gwa'atə ko hətə səlir nguli nghə matsa ya təwa ngya nda nda kwa səmnya mbaɗə nda ndiya na mənakə ku sər hatəmachi nda njir Isra'ila tə shili na?>
30 <<Aka ənga naya Tlakəu, Hyel njir Isra'ila a mər tə ya alkawal ənda, <Naka ana njir ki ngha, ana njikə hi kwa mər tlər pərist na'a ba'anawa.> Kəl ja, sakana nji inda kwa la'a səli ɗa, yo la'a səli kənda. Nji inda kwa həyatə ya yo tashiya nda. 31 Bəji kwa shili nda yo kuɗənda nguli tlakala ku huɗa njir ki ngha ana njikə hi, nda a tsə'u njo uya nji halhal ku huɗa njir ki nghə wa. 32 Ya ko ngya na sələkəkur təkəra papa'akur nda yo səkə nyi nə njir Isra'ila, kəl ja, a tsə'u ndə da kwa ngya na pi kwa hal ku huɗa njir ki nghə wa. 33 Dəhə ka ənga, yo ngyar nyandəlakə zhang, ya cho mər tlər pərist na'a. Kəl ja, cho wuləfa, ya cho ɗa ndə kəla fəkər da dəhə səu. Dəhə alenya nyandəka kwa kuɗə tsə'u kəla nda taa hala.
34 << <Nguli shili nghə mətlə inga, Hofni ana Finehas kwa kuɗə pəchi zhang, nacha ngə sə nda kwa char ənda sə ngə ya dəkə nga kwa nyabiyadza. 35 Yo tabiya nyi təkəɗər pərist nə kərɗa, nda kwa mər sə nda ku ɗufwa ya ana ku jigadəma ɗa. Ətsəu, yo mərtə nyandəla cha kwa mər tlər mar ndə nda ya dzəviya wa'atanyi. 36 Kala ndə nda tə həyadzə ku nyandəla ka kwa shili uzhi huɗə nyi aka gədi kwaba ana sərsuma, cho gədi nja ngya nyi cha vala ka pərist ga cha uya sə nda cho səma.> >>