Nja Dzəviya Dauda ka Təl Yahuda
2
1 Ahir nga, Dauda tə jau Tlakəu, <<Ya ma'i kyo zhang ku huɗa mələm Yahuda ya?>> Ngə Tlakə tə nar nyi, <<Ma'i.>> Ngə Dauda tə jawa, <<Abar yo ma'i ja?>> Ngə Tlakə tə na, <<A yi Hebron.>> 2 Kəl ngə Dauda tə təra yi nda tsa'a na mahi'i nyi mətlə inda, Ahinowam kwa Jezrel ana Abigel mala Nabal ndər Karmel nda ɗaka tə nda. 3 Ətsəu Dauda tə təra kə'i nji inda kə'i cha, kala ndə na njir ki nyi, ga gwa ngya tə hə'i Hebron. 4 Ngə njir Yahuda tə shili da Dauda vu Hebron, ga shili dzəviya nyi ka təl təkəra Yahuda. Nda nja nar nyi nə Dauda bəra njir Jabesh Giliyad ingə tə haɗiya Saul, 5 ngə cha sə kadakaliya yada njir Jabesh Giliyad cha yi nar nda, <<Ga Tlakə səkə hi papa'akur aka mənakəkur ngə hya mərtə nyi nə tlakən hi Saul, ga haɗiya nyi nga. 6 Ga Tlakə char hi mənakəkur ana tsa'atsa'akur, naya ma'a, yo char hi kwambiyakur aka sə ngə hya mər nga. 7 Sakan ja, ɗa ma na tsə ɗufəu hya mər salkur, aka tlakən hi Saul tə ti, ya njir Yahuda dzəviya ɗa tə ka təl təkəra nda.>>Ishboshet tə Ɗa ka Təl Isra'ila
8 Abna zər Ner dəgal ləvaləva Saul tə hətə Ishboshet zər Saul ga təra na cha yi Mahanayim. 9 A hinda cha yi fiya nyi ka təl təkəra Giliyad, Ashuri ana Jezrel, ana tsə'u a təkəra Ifərem, Banyami ana dəhə Isra'ila. 10 Fa Ishboshet zər Saul fwaɗəkumnyi ma cha ɗa ka təl təkəra Isra'ila, cha səm təlkur fa mətləu. Kəl ja, njir Yahuda tə nəu Dauda. 11 Dauda tə səm təlkur fa məɗəfa ana hya kwah, a təkəra Yahuda a vu Hebron. 12 Abna zər Ner tsa'a na ləvaləva Ishboshet zər Saul, tə ngyar Mayanayim ga təra yi Gibiyon. 13 Ngə Joab zər Zeruya ana ləvaləva Dauda tə biya, ngə nda biya ɓə nya ganga ɓiti Gibiyon. Nda ngya nya ganga nda, alenya dzuku bangətiti, ana alenyi tsə'u bangətiti. 14 Ngə Abna tə nar nyi nə Joab, <<Mi gwa'arə alenya nji ku huɗa tlakala inga nda ɓəgadla man ma.>> ngə Joab tə na, <<Yau, nda ghəya ja.>> 15 Ngə nja ɗəmtsə nji kwabəmətlə ku huɗa nji nda nə Banyami ana Ishboshet zər Saul, kwabəmətlə tsə'u ku huɗa nji nda nə Dauda. 16 Kəl ngə kala ndə tə səya bazhi ɓəgadla nyi tə kəra cha, ngə kala ndə tə dzaviya yimbəlya kuvanyi na katsakər, ngə nda dla səya hu'i dəhə nda mətləkumnyi parnya fwaɗə inda. Ngə nja nga mbwa nda vu Gibiyon, Helkat Hazurim, nacha ngə babal katsakər. 17 Pah nda tə ɗa ɗimiɗimi pəshinda, ngə nji nda nə Dauda tə kura Abna ana njir Isra'ila. 18 Nguli Zeruya makərəu, Joab, Abishai ana Asahel tangnda. Asahel kwa nau hwi wi kanyaɗəu. 19 Ngə cha ghəya gədlə Abna na hwi a cha tyati təwa chisəm ndara matsal wa. 20 Ngə Abna tə sha biya hi ga na, <<Asahela, nakə ngə ya?>> Ngə cha wuma, <<Naya na.>> 21 Ngə Abna tə nar nyi, <<Sha təwa chisəm ndara matsal ka nəu zhang ku huɗa tlakala inga, ka dləuya kar pah nyi.>> Kəl ja, Asahel da ngyar gədlə nyi wa. 22 Ngə Abna tə ɓəla nar nyi, <<Ngyar nəu ɗa! Ma ya tsəya nghə ya, aman eo shi ɓə na Joab zamə ngha?>> 23 Kəl ja, Asahel da ngyar gədlə nyi wa, ngə Abna tə dzaviya nyi na ndəla masə nyi tə ta cha, kəl masə nda tə biya paf mafiɗadeng təwa dagərya cha. Ngə cha dla ga tə tangnda. Kala ndə ma cha shili tangnda Asahel tə dla ga tə nda, kəl cha ta'i. 24 Kəl ja, Joab ana Abishai tə gədlə Abna, nda pəchi kwa təɗa, nda shili tə dəgəl Ammah, ləhə dza Giya a tə lukur gwa tə dadil takə Gibiyon. 25 Kəl ngə njir nyavi Banyami tə tsəmtə dzə ga mbatə nyi sar nə Abna nda ɗa dzuku zhang, ngə nda gi shukuriya dzə kya tə dəgəl. 26 Ngə Abna tə nga Joab ga na, <<Məna ngya ka kuɗə kərnəmən ba'anawa ya? A ka zəndə ənda udiyanyi kwa nda ɗa na huɗatla ma? Sakaman ko nar nyi nə nji nghə nda ngyar gədlə ka zamən nda?>> 27 Ngə Joab tə wum ga na, <<Səmnda tə ya fəla na tləmər Hyel, macha a ka nda ɓwanya wa, nji ɗa kwa nda biyama na gədlə ka zamən nda tusə pəchi.>> 28 Aka ənga ngə Joab tə mbəɗiya papam, kəl dəhə nji inda tə ta'i, a nda ɓəla gədlə njir Isra'ila wa, ya a nda ɓəla pah wa. 29 Abna kə'i nji nyi tə ma'i tahə Araba ku dəhə vu'i nda. Nda dləgəlbiya Urdən, nda biyama na ma'i fwatə mbudla kəl nda pəchi tə gi tangkər, nda tərabiya Bitron, ga shili Mahanayim. 30 Nda Joab tə ɓəl shili hya'atə tə mbwar gədlə Abna, ngə cha tsəmtə ləvaləva nyi dəhəu. Nda nja jigabiya kəl nja la'a matsa Asahel, ləvaləva Dauda kwabədlə da wa. 31 Kəl ja, ləvaləva Dauda tə kuɗənda nji 360 ku huɗa njir nyandəla Banyami inda kə'i Abna. 32 Ngə nda hətə Asahel ga ki haɗiya nyi ku hu ada nyi vu Baitalami. Ngə Joab ka nji nyi tə ma'i vu'i vu'i ga dzəva vu Hebron əmbudla.