3
1 Pah nda ku pama ləvaləva inda kwa mbasar nə njir ki Saul, ana inda kwa mbasar nə Dauda tə hətə bəji 'ualəu. Kəl tsakə njir ki Dauda kwa tsakə ɗa na dunama, njir ki Saul tsə'u kəl təutə ndo təuta. 2 Nja yiyah nyi nguli shili nə Dauda vu Hebron, Zə'ualə nyi tləm nyi Amnon zər Ahinowam kwa Jezrel. 3 Mətləkunya zərsal nyi tləm nyi Kiliyab zər Abigel mala Nabal ndər Karmel nda tə nda. Makərkunya zərsal nyi tləm nyi Absalom zər Ma'aka kwar Talmai təl Geshur. 4 Fwaɗəkunya zərsal nyi tləm nyi Adonija zər Hagit, tufəkunya zərsal nyi tləm nyi Shefatiya zər Abital. 5 Ngə mala nyi Egla tə yiyah nyi kwahkunya zərsal tləm nyi Itreyam. Dəhə nda a vu Hebron nja yah nda.Abna tə Yada Dauda
6 Aku bəji nda ləvaləva Saul ana ləvaləva Dauda kwa pah, kəl tsakə dunamar dəgalkur Abna kwa tsakə ku ki Saul. 7 Vanya kwatəra Saul da tləm nyi Rizpa kwar Aiya. Ngə Ishboshet tə nar nyi nə Abna, <<Mya gwa'atə ka piya na kwatəra ada ɗa?>> 8 Huɗa Abna tə tla gagaɗa aka sə nda Ishboshet tə na nda, ngə cha wuma, <<Ko har bəra naya ndə kəla jiri ya ya? Ko har ənda naya ndər mbasar nə Yahuda ya ya? Fwatə haaɗa ya ɗa kəriwa nə ki ada nghə saul ana nə njir ki nyi ka bazhi nyi. A ya taa tləɗanda hi nə Dauda wa. Ya janə ko tsətsəkwa ɗa təkəra mala na. 9 Ga Hyel shi'unda ɗa ma a da ya vala Dauda cha uya sə nda Tlakə tə mərtə nyi alkawal ku səmfəla wa. 10 Yo ɓəlandə nyi təlkur ki Saul nə Dauda, ba'a kukuya dzəga təlkur Dauda təkəra Isra'ila ana Yahuda, fwatə vu Dan tsa'a vu Biyersheba.>> 11 Ishboshet da nau shau Abna wa, aka cho ləvəra. 12 Ngə Abna tə sə changhabal tə dəbar nyi, nja yi nar nyi nə Dauda, <<Nə wa ngə hə'i nga? Mərtə ɗa alkawal, naya tsə'u yo vala ngha, ga dəhə njir Isra'ila nəu ngha.>> 13 Ngə Dauda tə na, <<Tsa'atsa'a ngan ja, yo mbadər na ka. Kəl ja, sə zhang da yo gwa'a ka mərtə ɗa, ngwa ka tsə'u shili huɗə ɗa wa, kəl macha ko shili na Mikal kwar Saul ma ko shili da ya.>> 14 Ngə Dauda tə sə changhabal i'i yada Ishboshet zər Saul bəra, <<Na'a mala ɗa Mikal, nda ya kinda gəna gadlə nyi ana zhumbulum njir Filisti 100.>> 15 Kəl ngə Ishboshet tə na nja dləuya Mikal tsa sal nyi Paliel zər Laish. 16 Sal nyi tə nəu nyi cho tiwi hi nyi tsa'a vu Bahurim. Ngə Abna tə nar nyi, <<Ɓəl yo ki!>> Ngə cha ɓələu. 17 Abna tə ɓwanya kə'i njirawawa'a Isra'ila bəra, <<A səkar tə dzə hyo i hya fiya Dauda ka təl kəhi. 18 Sakan ja, mər ma! Aka Tlakə tə mər alkawal nə Dauda bəra, <Təwa mava ɗa Dauda yo dləuya nji ɗa Isra'ila ku cha njir Filisti ana ku cha dəhə njir dawa kənda.> >> 19 Ngə Abna tsə'u tə ɓwanya nə njir nyavi Banyami. Ngə cha təra yada Dauda yi Hebron ka cha yi dəkar nyi dəhə sə inda njir Isra'ila ana njir nyavi Banyami kwa gwa'a nda məra. 20 Nda Abna ana nji mətləkumnyi kə'i cha tə yada Dauda vu Hebron, ngə Dauda tə ɓatliya nda ladər. 21 Ngə Abna tə nar nyi nə Dauda, <<Əngwa ya təra, ya yi tsəmtə dəhə njir Isra'ila nə tlakə ɗa tələu, ka ga nda mbandər na ka, nakə tsə'u ka mər təlkur na nda wi sə nda ko chima.>> Kəl ngə Dauda tə səu Abna ku laku, ngə cha təra ku piyarɗufəu.
Joab tə Tsəya Abna
22 Ma Abna kwa təra kəl janə Joab ana alenya ləvaləva Dauda tə shili hya'atə tə mbwar ki dla'a, nda shili na kwazhalɓi 'ual gagaɗa. Kəl ja, tsə'u Abna da tangnda dza Dauda vu Hebron wa, aka Dauda səu nyi tə ku laku, ya təra tə cha ku piyarɗufəu. 23 Nda Joab ana dəhə ləvaləva inda tə dzəva, ngə nja nar nyi ənda Abna zər Ner tə shili da təl, ana ənda təl səu nyi tə ku laku ya təra tə cha ku piyarɗufəu. 24 Kəl ngə Joab tə gwa da təl ga na, <<Mi nə ka mər ja? Abəra Abna tə shili da ka! Mya gwa'atə ka ngya nyi cha təra? Sakana, jan cha təra ti! 25 A zəndə tə ka Abna zər Ner, cha shili ka cha shandə nghə kər nga, ga cha zəndə gwa ngha ana biya ngha, ana ga cha zəndəbiya dəhə sə nda ko məra.>> 26 Kəl ngə Joab tə ngyar Dauda ga sə changhabal nda nəu Abna, ngə nda həya nyi nya dəl Sira, ngə nda ɓəla shili na cha. Kəl ja, Dauda da zəndə wa. 27 Nda Abna tə ɓəl shili Hebron, ngə Joab tə təra na cha ya nya lakur gu ta mələm wi cho i cha ɓwanya na cha tə nda səkənda. A tangnda Joab tə dzaviya nyi tə ta cha ga cha kibiya səkur nə mashi zamə nyi Asahel, ngə cha tah. 28 Ahir nda Dauda tə ngatə sə nga, ngə cha na, <<Naya ana təlkur ɗa, bikə da təkəra ya mar Tlakə təkəra pənda mashi Abna zər Ner wa. 29 Ga Hyella mərtə bikər pənda mashi nyi səya təkəra Joab ana a təkəra ki ada nyi! Ga Hyella mərtə ngwa ja tar ndə ku nyandəla cha nda na shilkə nda kwa mərtə ndə hiɗahiɗa, ndara bibi, ndara ndə nda kwa dzaba'a na zəwa, ndara ndə nda nja tsəya ku pah, ndara ndə nda kwa tar sərsuma wa.>> 30 Təwa ənga Joab ana zamə nyi Abishai tə tsəya Abna aka cha tsəya zamən nda Asahel aku pah a vu Gibiyon. 31 Kəl ngə Dauda tə nar nyi nə Joab ana dəhə nji inda kə'i cha, <<Tətanda ma ləkutə kəhi hya handzə guzhalguzhal hya sə'ingu Abna.>> Təl Dauda tsə'u tə nəu hir ndə tətə nda. 32 Nda haɗiya Abna vu Hebron, ngə təl tə tiwi na kurakə bang kya tə hu nda. Dəhə nji inda tsə'u tə tiwi. 33 Ngə təl tə tiwi məsazau nə Abna cho na, <<Mya gwa'atə Abna tə butəbuta? 34 Cha kə da tə mba wa, a nja datə nghə dahi wa. Ka dla wi ndə nda nji pəla'a tə tsəya.>> Kəl dəhə nji tə ɓəla tiwi nyi səkəu. 35 Pa'a pəchi nja gwa'a Dauda cha səm sərsuma, kəl ja Dauda tə səmnda fəla cha na, <<Ga Hyella tsəya ɗa ma ya səm sə təvi pəchi təɗa!>> 36 Ngə dəhə nji tə ngabiya sə nda Dauda tə mər nda, ga dləukər ni, ɗufwa nda tsə'u tə ɗa twasə na dəhə sə inda təl tə məra. 37 Aka ənga, pəshinda dəhə nji ana njir Isra'ila tə zəndə ənda cha təl da ku tər Abna zər Ner wa. 38 Ngə təl tə nar nyi nə nji nyi, <<A hya zəndə ənda zər təl, ya ndəradəgal tə ti ənya vu Isra'ila ma? 39 Ya ənya madangə təl mbamba kər ya, dza ya tətənyi, ya nguli Zeruya inə ndiya tə dunama ɗa. Ga Hyella kinda nyi ɗimikur nə ndə ɗimi, tsa'atsa'a na ɗimikur nyi.>>