Nja Tsəya Ishboshet
4
1 Nda Ishboshet zər Saul tə ngatə ənda Abna tə tə vu Hebron, ngə shanguɗa cha tləa, ngə ləvər tə səya dəhə njir Isra'ila. 2 Nji mətlə da tsa Ishboshet inda gau nə ki dla'a. Zhang tləm nyi Ba'ana, ana vanyi nda Rekab, nguli Rimon ndər Biyerot hya'atə ku nyavi Banyami, aka Biyerot ku hə'i Banyami cha. 3 Aka njir Biyerot tə hwita nda yi Gitayim, ga ngya mihiɓikur hinda ba'a ənya. 4 Ajinya Saul zər Jonatan da na tləm nyi Mefiboshet, nda a da kwa nau ma'i wa. Fa nyi tufəu ma nja uya labar tər Saul ana Jonatan vu Jezrel. Ndər ngya na cha tə hətə nyi ka ndo hwita nda, kəl ja, nda cho hwi na cha ngə cha təɗa, nacha gwa'atə cha ɗa gadal. 5 Ngə Rekab ana Ba'ana nguli Rimon ndər Biyerot, tə dləutsə lakur yo ki Ishboshet, ngə nda dzəva hinda pəchi kwa gwa'a ɗa tangkər, ku bəji nda cho ɓəlsar nyi. 6 Ngə nda təra gu ki nda gwa da gwa wi ndo gwa gwa'arə alkama, ngə nda dzaviya nyi tə ta cha. Ngə Rekab ana zamə nyi Ba'ana tə ngwaɗəta nda. 7 Nda go vi hanyi Ishboshet tə cha tə piya tə gangər nyi. Ahir nda dzaviya nyi ga tsəya nyi, ngə nda tlanda kəra cha. Nda hətə kəra cha nda ga ma'i tahə Araba vu'i vu'i. 8 Nda shili na kəra Ishboshet nda nə Dauda vu Hebron ga nar nyi nə təl Dauda, <<Janə kəra Ishboshet zər Saul, ndər dawa nghə nda tə gwa'a cha tsəya nghə nda. Tlakə kinda nyi tə səkur tə Saul ana nyandəla cha nə tlakə ɗa təl.>> 9 Ngə Dauda tə wum nə Rekab ana zamə nyi Ba'ana nguli Rimon, <<Səmnda tə ya fəla na tləmər Tlakəu, nda həbiya ɗa ku dəhə təmachi, 10 nda nja nar ɗa ənda <Saul tə ti,> ndə nda nar ɗa nda har ənda mafakə mənakə nda cha shili ni, ya səya nyi ga tsəya nyi vu Ziglag. Wazəba nda ya nə nyi ka mafakə nda nga! 11 Abiyakata nahi nda nji ɗimi, nda tə tsəya ndə kəla bikə ku ki nyi a tə gangər nyi, a da yo kina gwa'a bikər pənda mashi nyi tsa hi, ya hənda hi tə dunəya ma!>> 12 Ngə Dauda tə nar nyi nə nji nyi nda kuɗənda nda. Nda tlanda cha nda ka hya nda ga hakəya gundəɓər dza nda nya dəl vu Hebron. Kəl ja, nda hətə kəra Ishboshet nda ga haɗiya ku hu Abna vu Hebron.