Dauda tə Ɗa ka Təl Njir Isra'ila
5
1 Dəhə nyavi njir Isra'ila tə shili da Dauda vu Hebron ga na, <<Naea mashi nghə ea. 2 A ya hi, ku bəji nda Saul təl təkəra ea, nakə ngə ndə nda tə nəu na ləvaləva Isra'ila ku pah. Ya Tlakə tə nar nghə ənda, <Ko ɗa ka ndər ɓəla nji ɗa njir Isra'ila, ya ko ɗa ka təl kənda.> >> 3 Nda dəhə njirawawa'a nə Isra'ila tə shili da təl Dauda vu Hebron, ngə cha mbandər kə'i nda vu Hebron a mar Tlakəu, ngə nda dzəviya Dauda ka təl təkəra dəhə njir Isra'ila. 4 Fa Dauda makərkumnyi ma cha ɗa ka təl, ngə cha səm təlkur fa fwaɗəkumnyi. 5 A vu Hebron cha səm təlkur təkəra Yahuda fa məɗəfa ana hya kwah, a vu Urshalima tsə'u cha səm təlkur təkəra Isra'ila ana Yahuda fa makərkumnyi parnya makərəu.Dauda tə Kwasə Urshalima
6 Təl ana nji nyi tə təra gwa Urshalima ka nda gwa pah ka njir Jebusi inda na ngya ku nda. Njir Jebusi tə nar nyi nə Dauda, <<A da ko səgwa nə wa; mada njir wulfə ka njir gadal kwa gədlə nda ngha.>> Aka ndo har ənda Dauda da kwa nau gu nda wa. 7 Təwa ənga, Dauda tə kwasə Sihiyona mələm nda nja pati, nda njo nga Mələm Dauda. 8 Vanya bəji Dauda tə na, <<Kala ndə nda kura njir Jebusi tuku cha nəu təwa lakur ɓiti ga cha gya da <Njir gadal ingə ka njir wulfə inga,> nda njir dawa Dauda.>> Nacha gwa'atə ndo na, <<Ka <njir wulfə ka njir gadal,> do go Mbwa'alə wa.>> 9 Dauda tə ngyata nyi ku mələm nda nja patə nda ga nga mbwa nda Mələm Dauda. Cha hərtə mbwa inda dzəri, cha ghəya təwa Millo a gwa. 10 Kəl tsakə cho tsakə na gyalkur, aka Hyel Tlakə Ndər Gyalkur tsa'a na cha. 11 Kəl ngə Hiran təl Taya tə sə changhabal i'i yada Dauda, ana udzəm wur seda, ngə njir fiɗə wua, ka njir hər na hangu tə hərtə nyi patla nə Dauda. 12 Kəl ngə Dauda tə zəndə ənda Tlakə kukuya nyi tə ka təl təkəra njir Isra'ila ga mərtə səlir təlkur nyi 'ualəu tə dəbar njir Isra'ila. 13 Ahir nda cha ngyar Hebron, Dauda tə fa'atsə mahi'i ka kwatəra ɗang vu Urshalima, ya ngə nda yiyah nyi alenya nguli shili ka ku'imahi'i. 14 Ja'inə tləmər ngulisha'a nda nja yiyah nyi vu nda: Shamuwa, Shobab, Natan, Saloman, 15 Ibhar, Elishuwa, Nefeg, Jafiya, 16 Elishama, Eliyada ana Elifelet.
Dauda tə Kura Njir Filisti
17 Nda njir Filisti tə ngatə ənda fiya tə nji Dauda ka təl təkəra njir Isra'ila, ngə nda biya dəhə nda ka gwa'a nyi, kəl ja, Dauda ngatə tə ti, ga təra tanyi səya tə mbwar mbua. 18 Njir Filisti tsə'u tə shili ga wiɗiyadzə ku dakə Refem. 19 Ngə Dauda tə jau Tlakəu, <<Ya ma'i ki dla'a njir Filisti ya? Ko mərtə yo kura nda ja?>> Ngə Tlakə tə wum nə nyi, <<Ma'i aka vəlvəl yo mərtə ko kura njir Filisti.>> 20 Kəl ngə Dauda tə təra yi Ba'al Perazim, hinda cha kura nda. Cha na, <<Tlakə tə fa'anda njir dawa ɗa ma ɗa, wi ngə mandza kwa məra.>> Aka ənga cha nga mbwa nda Ba'al Perazim, nacha ngə <Tlakə ndər ka laku.> 21 Njir Filisti tə ngyar katə kənda i'i hinda, ngə Dauda ka nji nyi tə fa'ati. 22 Njir Filisti tə biya wiɗiyadzə ku dakə Refem nda səkəu. 23 Ngə Dauda tə jau Tlakəu, ngə Tlakə tə wum nə nyi, <<Ngwa ka gi dzən nda gang wa, kəl ja, ka nəu təwa hin nda ka dla'a nda biyamar wur balsam inga. 24 Ma saka nda ka ngatə gyang kwa sə kyo wur balsam inda, ma'i yi kuskusəu, aka a char tə ənda Tlakə tərabiya tə ma ngha ka ga cha pah ləvaləva njir Filisti.>> 25 Ngə Dauda tə mər wi nda Tlakə tə nar nyi, cha gədlə njir Filisti fwatə vu Gibiyon tsa'a vu Geza.