Nja Shili na Gwarara vu Urshalima
6
1 Dauda tə tsəmtə nji ɗəmɗəm ku huɗa njir Isra'ila 30,000 dəhə dəhəu. 2 Nacha ana nji nyi tə təra yi Ba'ala nə Yahuda ka nda yi shili na gwarara Hyel hinda, nda njo nga na tləmər Tlakə Ndər Gyalkur, nda na ngya ku pama cherubim inda tə gwarara nda. 3 Nda hətə gwarara ku ki Abinadab nda kyatə dəgəl ga fətə tə taɗər charkaina tla. Uza ana Ahiyo nguli Abinadab kwa nəu na charkaina tla nda. 4 Ana gwarara nda ti, Ahiyo kwa ma'i biyamar charkaina tla nda. 5 Dauda kə'i dəhə njir Isra'ila kwa mər hirgyaɗi mar Tlakəu, nda na miya ndo dəgə zəmbəl, gulum, gədzəgədzi, werwer ana simbal. 6 Nda nda shili tə lar Nakon, ngə Uza tə ha cha cha ga tsa'u gwarara Hyel nda, aka tla inda tə tləhi. 7 Ngə huɗa Tlakə tə tla tsa Uza aka cha tsəkar gwarara nda, aka ənga Tlakə tə dəgə nyi ngə cha tə tangnda dza gwarara Hyel nda. 8 Kəl huɗa Dauda tə tla aka huɗatlar Tlakə nda tə səya təkəra Uza nda, nacha gwa'atə ba'a ənya njo nga mbwa nda Perez Uza. 9 Ngə ləvər tə səya Dauda tsa Tlakə Pəshinda ngə cha na, <<Təwa bari yo ɗana gəziya gwarara Tlaka?>> 10 Aka ənga Dauda da zhaka dləukər cha hətə gwarara Tlakə nda yo Mələm Dauda wa. A təvira ənga cha hətə yo ki Obed Edom ndər Gat. 11 Gwarara Tlakə tə ngya ku ki Obed Edom ndər Gat hya makərəu, ngə Tlakə tə səkənyi papa'akur nə Obed Edom, dəhə ka njir ki nyi.12 Nja nar nyi nə təl Dauda, <<Tlakə səkə nyi tə papa'akur nə Obed Edom ana dəhə sə nda tsa cha, aka gwarara Hyel nda.>> Ngə Dauda tə səya həbiya gwarara Hyel nda ku ki Obed Edom, ga shili nə ku Mələm Dauda ana hirgyaɗi. 13 Nda nji nda kwa hə gwarara nda tə bəlabiya hya nda kwah, ngə Dauda tə handa təmachi na hahaldi tla ana daləu ngalngala. 14 Dauda tə handzə efod nə lilin, cho utsə na dunama mar Tlakəu. 15 Təwa ənga nacha ana dəhə nji tə shili na gwarara Tlakəu ana kurakəu, ana kurakər tələm i'i. 16 Nda njo gwa na gwarara Tlakə nda go Mələm Dauda, Mikal kwar Saul kwa ndzam təwa kagapəu. Nda cha la'a təl Dauda kwa utsə mar Tlakəu, ngə cha həyatə cha ku ɗufwa cha. 17 Nda shili na gwarara Tlakə nda ga fiya tə mbwar ngya nyi ku madləɓa nda Dauda tə liya kari, ngə Dauda tə handa təmachi nə nginda ana nə daɓkər a mar Tlakəu. 18 Ahir cha wurandə hatəmachi nə nginda ana nə daɓkər nda, ngə cha səkənyi papa'akur nə nji ku tləmər Tlakə Ndər Gyalkur Dəhəu. 19 Ətsəu ngə cha nə nyi gwazhilakəu, kaɓəkaɓər anap 'ul'ula, ana tlatlar kum tsatsa nə kala ndə ku dəhə dlama njir Isra'ila nda, mahi'i ka shili. Ngə dəhə nji tə təra kyo ki kənda. 20 Nda Dauda tə ɓəl yo ki nyi ka ga cha yi səkənyi papa'akur nə njir ki nyi, ngə Mikal kwar Saul tə biya ka ɓə na Dauda, cha nar nyi, <<Vəlvəl təl njir Isra'ila fiya tə tləm nyi ənya! Cha char dura'akur nyi mar kwatəra nyi i'i wi nda nji kəkəng kwa məra.>> 21 Ngə Dauda tə nar nyi nə Mikal, <<A mar Tlakə nda ya məra, nacha nda tabiya ɗa matsa ada ngha ndara vanya ndə ku ki nyi, cha fiya ɗa ka təl təkəra nji nda nə Tlakəu. Aka ənga yo biyama na hirgyaɗi. 22 Yo mərtə kərɗa ka sər həyatə ndiya matsa nə ma'a, njo həyatə ya tə lya ya. Kəl ja, kwatəra ingə ka na nga, kwa hətə ɗa səli.>> 23 Fwatə pəshir yah Mikal kwar Saul, tsa'a tə bəji nda cha tə ti, a da cha yah wa.