Alkawal Hyel nə Dauda
7
1 Ahir təl vaviya tə mbwar ngya ku patla nyi, ya Tlakə nə nyi tə ɓəlsar tsa dəhə mjir dawa nyi, 2 ngə cha nar nyi nə Natan ndər mətakər, <<Jan ya na ngya ku patla durdur nə seda, kəl ja, Gwarara Mbandər Hyel ku madləɓa.>> 3 Natan tə ɓəlakənyi nə təl, <<Ma'i ka ki mər dəhə sənda ku jigadəma ngha, aka Tlakə tsa'a naka.>> 4 Əvu'i nda tanyi ɓwanya Tlakə tə shili nə Natan bəra, 5 <<Ma'i ka yi nar nyi nə mava ɗa Dauda, <Jan sə nda Tlakə tə na: Nakə ndə nda kwa hərtə ɗa ki yo ngya kwa ya? 6 Fwatə tə bəji nda ya zəbiya na njir Isra'ila vu Masar a ya taa ngya ku ki wa. Ma'i tanyi ngə yo ma'i ka mbwa ka mbwa, ana madləɓa nda tə ɗa ka mbwar ngya ɗa. 7 Dəhə ba nda ya ma'i ka njir Isra'ila ti, taa ya nar nyi nə kala gavərma nda ya fiya ka ɓəla nji ɗa Isra'ila, <<Mya gwa'atə a da ka hərtə ɗa ki durdur nə seda wa ya?>> >8 <<Nar nyi nə mava ɗa Dauda sakana, <<Jan sə nda Tlakə Ndər Gyalkur Dəhə tə na: <Ya hətə nghə tə mbwar ɓəla kətəng ga fiya nghə ka səm təlkur təkəra nji ɗa Isra'ila. 9 Ya ngya tsa'a na ka ku dəhə ba nda ka ma'i ti, ya gədlə nda njir dawa nghə biyama ngha. Sakana, yo mərtə ko fiya tləm nghə wi nə nji kwalkwal nə dunəya. 10 Yo gwa'ar nyi mbwa nə na'awa nji Isra'ila, ya yo chiya nda aka ga nda uya hə'i kərnənda nda a tsə'u njo tsəka nda wa. Nji ɗimi tsə'u da kwa nə nda ɓwaɓwatə səkə wi nda nda mər tangərma nda wa, 11 fwatə tə bəji nda ya fiya gau i'i təkəra nji ɗa Isra'ila. Ətsəu yo nə hi ɓəlsar tsa njir dawa kəhi.
<< <Tlakə tə nar nghə ənda Tlakə na kərnyi kwa mərtə nyandəla ka kwa səm təlkur ahir ka tah. 12 Ma hanyi nghə tə wura, ya ngə ka tah, yo hya'andə nyandəla ka, nda tə biya ku dza ka cho ɗa tə məngya ngha, ya yo mərtə təlkur nyi na dunama. 13 Nacha ngə ndə kwa hərtə ki aka tləm ɗa, ya yo kukuya dzəga təlkur nyi ba'anawa. 14 Yo ɗa ka Ada nyi ya cho ɗa ka zər ɗa. Macha mər sə nda kəla tsatsa'a yo ɓu nyi wi nda nji kwa məra, yo tlatə nyi na wuɗa wi nda nji kwa məra. 15 Kəl ja, a nyida ɗa da kwa təkə na cha wi nə Saul nda ya həbiya ku təlkur təvi nakə wa. 16 Ki ngha ana təlkur nghə kwa ngya ba'anawa ma ɗa, dzəga təlkur nghə kwa ngya ba'anawa.> >> 17 Ngə Natan tə dəkar nyi dəhə ɓwanya mafakə shi'uni puchi nda nə Dauda.
Pətlənya Dauda
18 Kəl ngə Dauda tə təra ga gwa ngya huɗə Tlakəu, ga pətlənya bəra, <<Naya wa ya ja Tlakə Ndər Gyalkur Dəhəu? Aa mi njir ki ɗa təkər nda tə gwa'atə ka hətə ea gi tə chul dəgalkur na? 19 Dəhə ka əngə nganə ma'a Tlakə Ndər Gyalkur Dəhəu, wi dəhə sə ngə ka mər ngə da nyabiya lya kə wa, ka ɓwanya təkəra ki mava nghə ənda cho hətə bəji 'ualəu. Ənnə sə nda ka tsəlna mər nə nji ja Tlakə Ndər Gyalkur Dəhəa?
20 <<Mi sə nda Dauda kwa ɓəla nar nghə səka? Tlakə Ndər Gyalkur Dəhəu, kwa zəndə kə mava ngha. 21 Aka ɓwanya ngha ana sə nda ko i, ka mərtə sə dəgal wi na ga chabiya nyi nə mava ngha.
22 <<Ndər səli ka Tlakə Ndər Gyalkur Dəhəu! A vanya ndə da wi nakə wa, ya a vanya Hyel da wa kəl naka, wi nda ea ngatə na hima ea. 23 Wa wi nji nghə Isra'ila? Nyandəla nji nda Hyel tə biya ka cha dləuya nda ka kərnyi, ga mər sə wawa'a ana sər məngəl təwa gədlənda nyandəla alenya nji ana katə kənda biyamar nji ngha, inda ka dləuya zəbiya vu Masara? 24 Ka mərtə njir Isra'ila ka nji nghə ba'anawa, nakə tsə'u Tlakəu, ka ɗa ka Hyel kənda.
25 <<Yawa Hyel Tlakəu, sakan ja, ka nyabiya alkawal nda ka mər təkəra mava ngha ana ki nyi ba'anawa. Mər wi nda ka mər alkawal, 26 ga nja hətənyi səli nə tləm nghə ba'anawa. Təwa ənga nji kwa na, <Tlakə Ndər Gyalkur Dəhəu, Hyel njir Isra'ila nga!> Ya ki mava nghə Dauda kwa kukuyadzə a ma ngha.
27 <<Yawa Tlakə Ndər Gyalkur Dəhəu, Hyel njir Isra'ila, a chabiya nyi tə kə sənə nə mava ngha, ka na, <Yo hərtə nghə ki.> Aka ənga mava nghə uya tə dunama ka pətlənya nə nə ngha. 28 Yawa Tlakə Ndər Gyalkur Dəhəu, Hyel ka! Ko nyabiya ɓwanya nghə mada sakamani, ya nakə nə tə mərtə nyi alkawal sə mənakə inə nə mava ngha. 29 Sakan ja, maka i ka səkə nyi papa'akur nə ki mava ngha, ga ki nyi ngya huɗə nghə ba'anawa, yawa Tlakə Ndər Gyalkur Dəhəu, a ɓwanya tə ka, ya təwa papa'akur ngha, ki mava nghə kwa ɗa na papa'akur ba'anawa.>>