Kura inda Dauda tə Kura ku Pah
8
1 Ahir əngə tsəu, Dauda tə kura njir Filisti ga dləuya təlkur kənda, cha dləuya mələm Meteg Ammah ku cha njir Filisti. 2 Ətsəu Dauda tə kura njir Mowab. Cha chiu nda kwa na tuku nda piya hu'i ku zotamin, ngə cha go dəkə dzəgamkura zotamin nda na sə'i. Kala nja dəkətə zhaka mətlə na sə'i nda, cho na nja kuɗənda ba ɓəl mbwa nda nja dəkətə nda, ma nja dəkətə makərkunyi cho na nja ngya nda na pi. Njir Mowab tə ɗa da kiɗa təlkur Dauda, ndo ki tsachi nə nyi. 3 Ətsəu, Dauda tə kura Hadadezer zər Rehob, təl Zoba, ku bəji nda Hadadezer tə lakur ma'i ka cha ki ɓəlandə dəl Yufəretis da kiɗa təlkur nyi. 4 Dauda tə səya njir dlə charkaina Hadadezer 1,700 ana ləvaləva ma'i na hi nyi 20,000. Cha ɓəɓəliya dəhə hya taku, kəl taku 100 cha ngyari. 5 Nda njir Suriya tə shili hya'atə vu Damaskus ka vala Hadadezer təl Zoba, Dauda tə kuɗənda nji 22,000 ku huɗa nda. 6 Ngə cha piya dzuku ləvaləva nyi a vu Suriya nə Damaskus, njir Suriya inda ɗa da kiɗa təlkur nyi ndo ki tsachi nə nyi. Tlakə kwa nə nyi kura nə Dauda mada abar ma'i cha. 7 Dauda tə fa'atə ləgə bəjingha njirawawa'a ləvaləva Hadadezer ga shili nə vu Urshalima. 8 Təl Dauda tə fa'atə ndzə 'ual gagaɗa a vu Teba ana Berotai mələm inda da kiɗa təlkur Hadadezer. 9 Manda Toi təl Hamat tə ngatə ənda Dauda kura tə dəhə ləvaləva Hadadezer, 10 ngə cha sə zər nyi Joram yada Dauda ka cha usa nyi cha pətə nyi gula aka cha kura Hadadezer ku pah, aka Hadadezer kwa maka pah Toi wa'atanyi. Joram tə shili na nyi sə inda nja ɓatlə na azurfa ana bəjingha ana ndzəa. 11 Təl Dauda tə dzəviya sə inda nə Tlakəu, wi nda cha mər na azurfa ana bəjingha inda cha fa'aya ku mələm inda cha kura. 12 Dəhə kwazhalɓi inda cha fa'aya ku Edom, ana Mowab, ana tsa njir Amon ana njir Filisti, ana a vu Amalek. Əngə tanyi tsə'u cha dzəviya kwazhalɓi inda cha fa'aya tsa Hadadezer zər Rehob təl Zoba. 13 Tləmər Dauda tə tiwi nda cha shili hya'atə tə mbwar kuɗə njir Edom 18,000 a vu Dakə Wuna. 14 Ngə cha piya dzuku ləvaləva ku dəhə hə'i Edom, ngə dəhə njir Edom tə ɗa da kiɗa təlkur Dauda. Tlakə kwa nə nyi kura nə Dauda ku dəhə banda cha ma'i.Njirawawa'a Patla Təl Dauda
15 Dauda tə səm təlkur təkəra dəhə njir Isra'ila, ga mər nəuma na jiri nə dəhə nji nyi. 16 Joab zər Zeruya ngə dəgal təkəra ləvaləva, Jehoshafat zər Ahilud ngə ndər tsəfə labar. 17 Zadok zər Ahitub ana Ahimelek zər Abiyatar ingə pərist, Seraya ngə ndər tsəfa. 18 Benaya zər Jehoyada ngə təkəra njir Keret ana Pelet, nguli shili Dauda ingə njir dəkə dəma nə nji təltəl.