Dauda ana Mefiboshet
9
1 Ngə Dauda tə jawa, <<Vanya ndə da həyadzə ku ki Saul nda pəlakər yo char nyi ɗanghali tə dəbar Jonatan ya?>> 2 Vanya kadakaliya ki Saul da na tləm nyi Ziba. Ngə nda nga nyi shili mar Dauda, ngə təl tə nar nyi, <<Nakə ngə Ziba ya?>> Ngə cha wum ga na, <<Naya nə aləvari.>> 3 Ngə təl tə jawa, <<Vanya ndə da həyadzə ku ki Saul nda pəlakər yo char nyi mənakəkur ya?>> Ngə Ziba tə wuma, <<Tsəutanyi zər Jonatan, ndə təsəkən cha.>> 4 Ngə təl tə jawa, <<Aman cha?>> Ngə Ziba tə wuma, <<A hyo ki Makir zər Amiyel cha a vu Lodebar.>> 5 Ngə təl Dauda tə sə nja shili na cha hya'atə vu Lodebar, hya'atə ku ki Makir zər Amiyel. 6 Nda Mefiboshet zər Jonatan tə shili da Dauda, ngə cha uzhi ga hətə nyi səli. Ngə Dauda tə na, <<Mefiboshet!>> Ngə cha wuma, <<Aləvari janə mava ngha.>> 7 Ngə Dauda tə na, <<Ngwa ka da ləvər wa, aka a kəpal da wa yo char nghə mənakəkur aka ada nghə Jonatan. Yo ɓəlandə nghə dəhə hə'i aji nghə Saul, ya ko maka səm sərsum tsa'a na ya.>> 8 Ngə Mefiboshet tə uzhi ga na, <<Mi mava nghə təkəra, nda tə gwa'atə ko ɗəngha na həya tətə wi naya?>> 9 Kəl ngə təl tə nga Ziba mava Saul ga nar nyi, <<Dəhə sər Saul, ana dəhə sə nda nə njir ki nyi, a nə nyi tə ya nə Mefiboshet ajinya tlakə ngha. 10 Naka ana nguli ngha ana mavi'i ngha kwa zwa nə njir ki Saul, hya shili na sə zwazwa, tsa'aka ajinya tlakən hi kwa uya sərsuma. Mefiboshet ajinya tlakə nghə tsəu, kwa maka səm sərsum tsa'a na ya.>> (Nguli Ziba da kwabətufəu, ana mavi'i mətləkumnyi.) 11 Kəl ngə Ziba tə nar nyi nə təl, <<Mava nghə kwa mər kala sə nda tlakə ɗa təl tə na ya məra.>> Kəl Mefiboshet kwa maka səm sərsum kə'i nguli təl. 12 Zərsal kushi da tsa Mefiboshet ana tləm nyi Mika, kəl dəhə njir ki Ziba tsə'u tə ɗa ka mavi'i Mefiboshet. 13 Mefiboshet tə ngya vu Urshalima, cho maka səm sərsum ku ki təl, hya cha tsa'akya'a tsə'u gadal.