Dauda tə Kura Njir Amon
10
1 Ahir nga, ngə təl njir Amon tə tah, ngə zər nyi Hanun tə dləu cha cha ga ɗa ka təl. 2 Ngə Dauda tə na ku jigadəma nyi, <<Yo char nyi mənakəkur nə Hanun zər Nahash, tang wi nda ada nyi tə char ɗa mənakəkur.>> Ngə Dauda tə sə ndə ka nja yi fətənyi ɗufə nə Hanun aka tər ada nyi. Nda nji inda Dauda tə sə inda tə dzəva ku mələm njir Amon, 3 kəl ngə njirawawa'a njir Amon tə nar nyi nə Hanun təl kənda, <<Ko har bəra Dauda kwa la'a səlir ada nghə na gwa'atə cha sə nji ka nja fətə nghə ɗufə ya? A da ga nda shili zhultə mələm nda gwa'abiya ənda mən, ga nda shili dla'a mən nə Dauda sə nda wa ya?>> 4 Aka ənga, ngə Hanun tə səya nji inda Dauda tə sə inda, ga sənda mar shishir təngha kala ndəu, ga tlətlanda ləkutə kənda məlməl na ɗəfər ndəla nda, ga səu nda ku laku. 5 Nda nja nar nyi sə nda tə ɗa nə Dauda, ngə cha sə kadakaliya yada nji inda, aka a mərtə nda tə nji sər həyatəvi 'ual'ualəu. Ngə təl tə na, <<Ngya ma vu Jariko kəl shishir təgha hya həa, ga hya dzəgwa ɓəl shili.>> 6 Nda njir Amon tə la'a ənda pasiya tə nda Dauda, ngə nda ki fa'atə ləvaləva vu Bet Rehob ana a vu Zoba, ləvaləva 20,000 ana təl Ma'aka ka ləvaləva nyi 1,000, ana ləvaləva 12,000 tsə'u hya'atə vu Tob, ga kinda nda. 7 Nda Dauda tə ngatə ənga, ngə cha sə Joab tsa'a kə'i ləvaləva nyi inda kwa nau pah, ka nda ki pah kə'i nji inda. 8 Njir Amon tə zəbiya tiyadzə ka pah a tə lakur go mələm kənda, kəl ja, njir Suriya a vu Zoba ana Rehob ana njir Tob ana Ma'aka tə tiyadzə ku ngulinguli mələm biyatiya mələm. 9 Nda Joab tə la'a ənda njir dawa tə tiyadzə biyama nyi ana a biyahi nyi, ngə cha ɗəmtsə ləvaləva inda ndiya na nau pah vu Isra'ila ka nda pah njir Suriya. 10 Həyadzər ləvaləva inda tsəu, Abishai zamə nyi tə ɗa ka gau kənda, ka nda ki pah njir Amon. 11 Ngə Joab tə nar nda, <<Ma hya la'a njir Suriya kwa ndəɗə dunama ɗa, kəl ba'a hya shili hagwa ɗa chi, ətsəu ma ya la'a njir Amon kwa ndəɗə dunama kəhi, kəl ba'a ya shili hagwa hi chi. 12 Mən ta'i na dunama mən pah, aka nji kəmən ana mələm i'i nə Hyel kəmən. Ga Tlakə mər sə nda tsa'atsa'a nə nyi tə lya cha.>> 13 Kəl ngə Joab ka ləvaləva inda kə'i cha tə ghəzardzə ka nda pah njir Suriya, ngə ləvaləva njir Suriya tə təra na hwi. 14 Nda njir Amon tə la'a njir Suriya kwa hwi, ngə nda təra na hwi mar Abishai ga təra gu ta mələm. Ngə Joab tə shili hya'atə tə mbwar pah njir Amon ga shili vu Urshalima. 15 Ahir nda njir Suriya tə la'a njir Isra'ila kura nda ti, ngə nda ɓəla tsəmtədza. 16 Ngə Hadadezer tə sə nja shili na njir Suriya hya'atə biya tiya dəl, ngə nda təra yi Helam, nanda kə'i Shobak ana gau ləvaləva Hadadezer kwa nəu na nda. 17 Nda Dauda tə ngatə ənga, ngə cha tsəmtə dəhə njir Isra'ila, nda dləgəlbiya Urdən ga biya Helam. Njir Suriya tə tiyadzə ka nda ɓə ka Dauda, ngə nda pah nyi. 18 Kəl ja, njir Suriya tə təra na hwi mar njir Isra'ila, Dauda tə kuɗənda njir dlə charkaina taku 40,000. Ətsəu cha takasiya Shobak gau ləvaləva kənda, ngə cha tə tangnda. 19 Nda dəhə təl inda da kiɗa Hadadezer tə la'a ənda njir Isra'ila kura nda ti, ngə nda ɓatliya ka njir Isra'ila ga ɗa ka mavi'i kənda. Ənga gwa'atə njir Suriya kwa ləvər tsa vala njir Amon səkəu.