Dauda ana Batsheba
11
1 Nda vanya fa tə shili bəji nda ka təl ka təl kwa biya ki pah. Dauda tə sə Jaob biya ana njirawawa'a ana dəhə ləvaləva nə njir Isra'ila. Nda kuɗənda njir Amon ga ɓandə Rabah. Kəl ja Dauda tə ngyata nyi vu Urshalima. 2 Vanya pəchi aba akəu Dauda tə hya'atə tə mbwar ɓəlsar nyi cho zhuli kyo kəra pakə nə patla nyi. Ma cha ki nda kəl cha la'a malakə kwa waɗa. Mala nda gumaguma gagaɗa, a 3 kəl ngə Dauda tə sə vanya ndə cha gwa'abiya hya cha, ngə ndə nda na, <<A da Batsheba kwar Eliyam mala Uriya ndər Hiti nə ma?>> 4 Kəl ngə cha sə changhabal i'i nda shili na cha. Cha shili da cha, ngə cha piya na cha. (Ya təka wurandə la'a hyali cha.) Kəl ngə cha ɓəl yo ki. 5 Kəl ngə mala nda tə hətə huɗəu, ngə cha sə ya da Dauda, bəra, <<Huɗə ku ta ya.>> 6 Ngə Dauda tə sə yada Joab bəra, <<Nar nyi nə Uriya ndər Hiti cha shili.>> Ngə Joab tə nar nyi nə Uriya ənda Dauda kwa nga nyi. 7 Nda Uriya tə shili, ngə Dauda tə jau nyi ndara aman Joab, ana ləvaləva i'i, ana ndara aman sə ndo ma'i təkəra pah nda. 8 Ngə Dauda tə nar nyi nə Uriya, <<Ma'i səyo ki ka səya chinda hya ka, ka ɓəliyasar.>> Ngə Uriya tə təra, ahir cha təra, ngə təl tə lətə nyi ga'a. 9 Kəl ja, Uriya tə hanyi tanyi nya lakur go patla nanda kə'i dəhə njir tsakəra patla təl, a da cha ma'i kyo ki nyi wa. 10 Nda nja nar nyi nə Dauda ənda Uriya da ma'i kyo ki nyi wa, ngə cha nga Uriya ga nar nyi, <<Naɗə hya'atə ka, mya gwa'atə a da ka ma'i kyo ki nghə wa?>> 11 Ngə Uriya tə nar nyi nə Dauda, <<Gwarara mbandəra, ana njir Isra'ila ana Yahuda kwa ngya ku madləɓa, ya tlakə ɗa Joab ka nji nda nə tlakə ɗa buruɓə tə babal. Aman yo ɗa na yo ki ɗa ya yi səma ya sa ya piya na mala ɗa? Səmnda tə ya fəla na tləmər Tlakəu, a da yo mər chul ngəna sə wa!>> 12 Ngə Dauda tə nar nyi, <<Ɓəla hanyi zhang tangnə səkəu, əzəkə yo səu nghə ku laku ka ɓələu.>> Ngə Uriya tə ɓəla hanyi vu Urshalima səkə pəshinda. 13 Zəbiya mbudla, ngə Dauda tə nga nyi ka səm sərsuma, cha shili səm ga sa ga wi. Kəl ja, aba akə ngə Uriya tə biya piya tanyi tə daagu nyi ku huɗa njir tsakəra patla təl, a da cha ma'i kyo ki wa. 14 Zəbiya mbudla ngə Dauda tə tsəfətə nyi kainau nə Joab ga sə Uriya ni. 15 Aku kainau nda cha nar nyi nə Joab bəra, <<Ka fiya Uriya biyama tangnda pah tə ɗa ɗimiɗimi ti. Kəl ba'a hya ɗa tsatsal tsa cha, ga nja tsəya nyi.>> 16 Aka ənga, nda ləvaləva Joab tə ɓandə mələm nda, ngə cha fiya Uriya tangnda cha zəndə njir dawa inda ndiya na nau pah ti. 17 Nda njir mələm nda tə biya ka pah na Joab, nda kuɗənda alenya ləvaləva Dauda, dəhə ka ma'a Uriya ndər Hiti nda. 18 Ngə Joab tə sətə nyi labar dəhə sə nda ɗa ku pah nda nə Dauda. 19 Cha nar nyi nə changhabal nda, <<Ma ka wur na par nyi labar pah nə nə təl, 20 huɗa təl kwa nau tla cho jau ngha, <Mya gwa'atə hya yi ləhə dza mələm ka pah? A hya zəndə ndo nau ha hafə təwa kəra ɓangtili ma? 21 Wa tsəya Abimelek zər Jerubesheta? A mala nda vakəya nyi na hangu bərah təwa kəra ɓangtili vu Tebez ngə cha tə ma? Mya gwa'atə hya yi ləhə dza ɓangtili nda?> >> 22 Ngə changhabal nda gu laku, nda cha dzəva Urshalima, ngə cha par nyi dəhə sə inda Joab tə nar nyi ka cha par nyi nə təl nda. 23 Changhabal nda tə nar nyi nə Dauda, <<Njir dawa kəea tə ndiya ea dunama, nda zəbiya pah ea biya tiya mələm, kəl ja, ea gədlə nda gwa nya lakur gu ta mələm. 24 Kəl njir ha na laga tə ta'i ta nda təkəra ɓangtili ndo ha mavi'i ngha, ngə nda kuɗənda alenya mavi'i təl. Ma'a mava nghə Uriya ndər Hiti ma'a a tə ti.>> 25 Ngə Dauda tə nar nyi nə changhabal nda, <<Nar nyi nə Joab ngwa sə ngə da tliya huɗa cha wa, mana a katsakər do ɗəm nji nda cho tsa wa. Mbabiya ma dzə nya ndəla nda, hya pah nda hya dləuya mələm nda. 26 Nda Batsheba tə ngatə ənda tsəya tə nji sal nyi, cha sə'ingu nyi. 27 Nda cha wurandə sə'ingu, ngə Dauda tə hətə nyi yo ki nyi, ngə cha ɗa ka mala nyi ga yiyah nyi zərsal. Kəl ja, huɗa Tlakə tə tla na sə ngə Dauda tə mər nga.