Natan tə Guhi Dauda
12
1 Ngə Tlakə tə sə Natan yada Dauda. Nda cha shili da cha, ngə cha na, <<Alenya nji da tsa'a mətlə ku vanya mələm, zhang ndər gəna vanyi nda tsə'u ndər ɗali. 2 Ndər gəna nda, kətəng ka tla da ɗang tsa cha, 3 kəl ja, sə da tsa ndər ɗali nda wa, kəl zər bal'ua nda cha ɗəlbiya. Cha tsamartə nyi, cha hə tsa cha tsa'a kə'i nguli nyi. Cho səm sərsum kə'i cha, cho sa ɓiti ku ɗyaɗika nyi, cho maka piya ku umbwa cha. Cha ɗa wi kwa nyi.4 Vanya pəchi ngə ndər gəna nda tə mər mihiɓi, kəl ja, a da cha i tabiya ku huɗa kətəng nyi ndara tla nyi inda ka cha tagu nyi nə mihiɓi nyi nda wa. A təvira ənga, cha hətə bal'ua ndə ɗaliɗali nda ga tagu nyi nə ndə nda shili da cha nda.>> 5 Nda Dauda tə ngatə ngə huɗa cha tla 'ual'ual təkəra ndə nda, ngə cha na, <<Səmnda tə ya fəla na tləmər Tlakəu, njo kina tsəya ndə nga mər sə nga! 6 Tuku cha kinda bal'ua nda zhaka fwaɗəu, aka cha mər sə ɗimi a təhuɗə da wa.>> 7 Ngə Natan tə nar nyi nə Dauda, <<Nakə ngə ndə nga! Janə sə nda Tlakəu, Hyel njir Isra'ila tə na: <Ya dzəviya nghə ka təl təkəra njir Isra'ila, ngə ya dləuya nghə ku cha Saul. 8 Ya nə nghə ki tlakə ngha, ana mahi'i nyi. Ya nə nghə ki Isra'ila ana Yahuda. Macha dəhə sə ingə da nji nghə wa, yo nda tsakətə nghə ndiya matsa inga. 9 Mya gwa'atə ka həyatə Tlakə təwa mər sə ɗimi tə lya cha? Ka tsəya Uriya ndər Hiti na katsakər ga hətə mala nyi ka nə ngha! Ka tsəya nyi na katsakər njir Amon. 10 Aka ənga, sakana, a tsə'u katsakər do təkə na ki nghə wa, aka ka həyatə ya ga hətə mala Uriya ndər Hiti ka mala ngha.>
11 Janə sə nda Tlakə tə na: <<Yo mərtə vanya ndə ku huɗa njir ki nghə kwa shili na təmachi təkəra ka. A tə lya ka yo fa'atə mahi'i nghə ba'a nə nyi nə təwul ngha, ya cho piya na nda puchi a tə babal. 12 Ka mər sə ngə tə ɗəwa, kəl ja, yo mərtə nghə sə ingə puchi tə lya dəhə njir Isra'ila.> >> 13 Ngə Dauda tə nar nyi nə Natan, <<A mərtə ya səpəla'a mar Tlakəu.>> Ngə Natan tə ɓəlakə nyi, <<Tlakə far tə bikə ngha, a da ko tə wa. 14 Kəl ja, aka ka həyatə Tlakə gagaɗə təwa mər ngəna səpəla'a, zər ngə njo yah ngə kwa tah.>>
15 Ahir Natan tə təra kyo ki, Tlakə tə dəgə zər nda mala Uriya tə yiyah nyi nə Dauda nda na shiləka. 16 Dauda tə gədi Tlakə təkəra zər nda. Cha səmdzən, cha gwa piya tanyi hu'i ku ki həm hanyi. 17 Kəl njirawawa'a patla nyi tə shili da cha ka nda pətiya nyi cha hya'atə hu'i nda, kəl ja, cha ngyari, ga ngyar səm sərsum kə'inda tsəu. 18 Pəshir hanyi məɗəfəkunyi ngə zər nda tah. Njir patla nyi kwa ləvər dəkar nyi ənda zər nda tə ti, aka ndo jigadəma bəra, <<Sakanda tsə'u tanyi zər nda na pi, ea ndər nə Dauda ya a da cha səhimi wa. Amanə eo ɗana nar ənda zər nda tə tah? Cho nau takasiya kərnyi.>> 19 Nda Dauda tə la'a kə'i kadakaliya nyi kwa ɓwanya chihəchihə ku pama kərnənda, ngə cha ngabiya ənda zər nda tə ti. Ngə cha jawa, <<Zər nda tə tə ya?>> Ngə nda wuma, <<Ah, tə tə cha.>> 20 Ngə Dauda tə hya'atə hu'i nda. Ahir cha waɗa, ngə cha ɓəsiya mal ga bəlatə ləkutə nyi, ngə cha təra yo ki Tlakə ga yi hətə nyi səli. Ngə cha təra yo ki nyi ga yi na nja nə nyi sərsuma, ngə cha səma. 21 Ngə kadakaliya nyi tə jau nyi, <<Mya gwa'atə ka mər ənga? Ku bəji nda zər nda na pi, ka səmdzən ga tiwi, ya nə zər na tə tsəu, ngə ka hya'atə ga səm sərsuma!>> 22 Ngə cha wuma, <<Ku bəji nda zər nda na pi, ya səmdzən ga tiwi. Yo jigadəma bəra, <Wa zəndə ndara Tlakə kwa nau char ɗa ɗanghali ba'a ngyar zər ngə na pya?> 23 Manə sakana a tə tə cha ya, mya gwa'atə yo səmdzəna? Kwa nau ya ɓəlandə nyi shili səkə ya? Naya yo tsə'u nəu nyi vanya pəchi, kəl ja, nacha a tsə'u cho ɓəl shili da ya səkə wa.>> 24 Ngə Dauda tə fətə nyi ɗufə nə mala nyi Batsheba, ngə cha gwa da cha ga gwa piya na cha. Ngə cha yiyah zərsal, ngə nda fəndzə nyi tləm Saloman. Tlakə tə nyidatə zər nda, 25 ya aka Tlakə tə nyidatə nyi, ngə cha sə ɓwanya təwa Natan ndər mətakər cha fəndzə nyi tləm Jedidiya. 26 Ngə Joab tə pah Raba mələm njir Amon tangnda təl kənda na ngya ti. Nda kaɗə cha kura mələm nda, 27 ngə Joab tə sə changhabal yada Dauda bəra, <<Ya pah Raba ga dləuya mbwa nda njir mələm kwa uya ɓiti ti. 28 Sakana tsəmtə həyadzər ləvaləva, ka shili dləuya mələm nda. Ma əngə wa yo dləuya na kərɗa, ba'a nja nga nyi na tləm ɗa.>> 29 Aka ənga Dauda tə tsəmtə dəhə ləvaləva ga təra yi Raba, ga yi pah nda, ga dləuya mələm nda. 30 Cha mbəɗəbiya pahuɗə mba kər ku kəra təl kənda, tədəɓəkura cha kwa ɗa talent nə bəjingha zhang, nja ɓatlətə ɓatlə na hangu nda na səli ti, ngə nja mbu nyi ku kəra Dauda. Cha fa'atə kwazhalɓi 'ual ku mələm nda 31 ga fa'atə nji inda ku mələm nda, cha chiu nda ku mər tlər na zarto, ana daɓi la hə'i ana kəm, cha chiu nda ku kaɓə tubali tsəu. Cha mər əngə nə dəhə mələm njir Amon. Ngə Dauda ana dəhə ləvaləva nyi tə ɓəl shili Urshalima.