Amnon ana Tamar
13
1 Kwamənya Absalom zər Dauda da na tləm nyi Tamar, a gumaguma nda wa, ngə Amnon tə ghəya nyida Tamar. 2 Aka Amnon kwa i cha piya na kwamənyi Tamar tə gwa'atə shiləkə tə səya nyi, aka kwapəlyakə cha, ya cho la'a kwa ɗa dza'u nə Amnon cha uya nyi. 3 Bazhinya Amnon da na tləm nyi Jonadab zər Shimiya, zamənya Dauda. Jonadab ndər dəma cha gagaɗa. 4 Ngə cha jau Amnon, <<Manə zər təl əna? Mya gwa'atə huɗəma kə ndalndalnyi mbudla na akəa? A ko dəkar ɗa ma?>> Ngə Amnon tə nar nyi, <<Yo i Tamar kwamənya zamə ɗa Absalom.>> 5 Ngə Jonadab tə na, <<Ma'i gwa piyata nghə tə gangər ngha, ka mərtə kərnghə wi a da kə yiying wa, ma ada nghə tə shili ka usa ngha, ka nar nyi, <<Yo gwa'a kwamə ɗa Tamar cha shili na'a sərsuma. Yo i cha shili mərtə sərsum ngə tə lya ya yo ndzamə nyi, ana tsə'u cha hanya ɗa.> >> 6 Aka ənga, Amnon tə piya tanyi ga mərtə kərnyi wi a da cha yiying wa. Nda təl tə shili ka cha usa nyi, ngə Amnon tə nar nyi, <<Yo i kwamə ɗa Tamar shili mərtə ɗa waina tə lya ya, cha hanya ɗa.>> 7 Ngə Dauda tə sətə nyi mafakə nə Tamar bəra, <<Ma'i yo ki zamə nghə Amnon ka yi mərtə nyi sərsuma.>> 8 Kəl ngə Tamar tə təra yo ki zamə nyi Amnon, tangnda cha tə piya ti. Cha hətə upə ga zukuti, ga mərtə nyi waina tə lya cha. 9 Ngə cha hətə kyawa ga gwa'arə nyi kwa, kəl ja, cha ngyar kwasa. Ngə Amnon tə na, <<Nar nyi nə dəhəkura nji nda təra biya.>> Kəl ngə kala ndə tə təra biya. 10 Ngə Amnon tə nar nyi nə Tamar, <<Səgwa na sərsum ngə ku vi piya ɗa məlna ko hanya ɗa.>> Ngə Tamar tə hətə waina nda cha mərtə nda ga təra nə go vi piya zamə nyi Amnon. 11 Kəl ja, nda cha gwa na sərsum nda ka cha səma, ngə cha səya nyi ga na, <<Anda ka piya na ya kwamə ɗa.>> 12 Ngə Tamar tə na, <<Mi ngə zəm zamə ɗa! Ngwa ka da chiu ɗa na tuku ku sə nda pa'a njo kina mər vu Isra'ila wa! Ngwa ka da mər chul ngəna sər kuzhi ɗimiɗimi wa. 13 Naya saka ngə ma ya mər sə ngə ya, abar yo biya tsa kuzha? Nakə tsə'u ko ɗa wi zhang ku huɗa ndə ɗimi nda kəkəng vu Isra'ila. Maki ndər nə təl, a da cho katə nghə həbiya ɗa ka ya ɗa ka mala nghə wa.>> 14 Kəl ja, Amnon da səhimi da cha wa, ya manda ndiya nyi tə cha dunama, ngə cha piya na cha na tuku. 15 Ahir ənga Amnon tə ngya nyi, a tsə'u cho i cha la'a nyi pa'a wa, tə ɗa ngya nyi nda cho ngya nyi, ndiya tə i nyi nda cha ɗaka i nyi haaɗa. Ngə Amnon tə nar nyi, <<Hya'atə ka təra biya!>> 16 Ngə cha na, <<A'a! Ma ka gədlənda ɗa ko dzəgwa mər sə ɗimi ndiya matsa sə nə ka mər na.>> Kəl ja, a da cha səhimi da cha wa. 17 Ngə cha nga kadakaliya nda kwa mər tlər nə nyi ga na, <<Həbiya mala nə ku na, ka haɗənda ɗa nyavi.>> 18 Kəl kadakaliya nda tə mbəlabiya nyi ga haɗənda nyavi. Tamar tə handzə ləkutə nda na ɓatlə gaɗagaɗa ti, aka nacha ngə ləkutə kwar təl ya kwapəlyakə kwa ha. 19 Tamar tə pəu pətsəɗə ku kəra cha ga tətanda ləkutə nda na ɓatlə gaɗagaɗa nda cha handzə nda. Cha pəu chi ku kər ga təra cho tiwi na kurakə dzəgamdzəgaməu. 20 Ngə zamə nyi Absalom tə nar nyi, <<Zamə nghə Amnon tə piya na kə ya? Bəgə ɗi kwamə ɗa, zamə nghə nga. Ngwa ka ɗəngha wa.>> Ngə Tamar tə ngya ku ki zamə nyi Absalom zhang tanyi. 21 Nda təl Dauda tə ngatə ngəna səu, ngə huɗa cha tla 'ual'ualəu. 22 Absalom da ndər nə Amnon wa, ndara cha pə ɓwanya ɗimi, ndara mənakə nyi wa, a tsə'u cho i cha la'a Amnon wa, aka cha mərtə nyi sər kuzhi nə kwamə nyi Tamar.Absalom tə Tsəya Amnon
23 Ahir fa mətləu, tə bəji nda njo tsəɗə shishi dzər kətəng ti, Absalom vu Ba'al Hazor nda ləhə dza Ifərem, Absalom tsə'u tə gədiya dəhə nguli shili təl ka nda yi nda. 24 Absalom tə təra yada təl ga yi na, <<Aləvari, njir tsəɗə shishi dzər kətəng tə shili ka mər tlər na'a. Yo gədi nghə kə'i njirawawa'a nghə hya shili ku ladər nga.>> 25 Ngə təl tə ɓəlakə nyi, <<A'a zər ɗa, a da eo yi dəhə ea wa, tsa ea da ɗa ɗang nə ngha.>> Madangə Absalom tə mbambiyadzər gədi nyi ka cha yi, ba'a saka nga, cha ngyar yi, kəl ja, cha səkənyi papa'akur. 26 Ngə Absalom tə na, <<Macha a da ko yi wa, ngyar Amnon cha ma'i kə'i ea.>> Ngə təl tə jau nyi, <<Mya gwa'atə cho ma'i tsa'a na ka?>> 27 Kəl ja, Absalom tə mbabiydzər gədi, kəl nda təl tə dləukəri, ngə Amnon ana dəhə nguli shili təl tə təra kə'i Absalom. 28 Ngə Absalom tə tsau nyi bar nə kadakaliya nyi i'i, cha na, <<Hya ɓəla ma bəji nda Amnon tə nda wi na ɓitir anap ti, ma ya na, <Dəgə ma Amnon,> kəl ba'a hya tsəya nyi. Ngwa hya da ləvər wa, aka naya nga nar hi, hya ɗa na tsə ɗufəu, hya char salkur.>> 29 Kəl ngə kadakaliya Absalom tə mərtə wi sə nda Absalom tə tsau nda bar. Kəl dəhə nguli shili təl tə hya'ati, kala ndə tə gitanyi tə ya sərshishi nyi ga təra na hwi. 30 Ma tsə'u nda ku laku, ngə mafakə tə həya Dauda bəra, <<Absalom kuɗənda tə dəhə nguli shili təl, mada zhang da həyadzə wa.>> 31 Ngə təl tə hya'atə ga tətanda ləkutə nyi ga piya tanyi hu'i, ngə dəhə kadakaliya nyi inda tangnda kə'i cha tə tətanda ləkutə kənda. 32 Kəl ja, Jonadab zər Shimiya, zamənya Dauda tə na, <<Ngwa tlakə ɗa da har ənda dəhə nguli shili təl ngə nja kuɗənda wa, kəl Amnon ngə nja tsəya. Nacha ngə sə nda Absalom tə ɓatliya ku ɗufwa cha fwatə ku bəji nda Amnon tə piya na kwamə nyi Tamar na tuku nda. 33 Aka əngə ja, ngwa tlakə ɗa da ɗəngha na mafakə ngə bəra dəhə nguli shili təl kuɗə tə wa. Kəl Amnon sənyi nga tah.>> 34 Ku bəji nda Absalom hwi tanyi ti. Kəl ləvaləva nda tə ta'i kwa ɓəla nda tə ndzamar ga la'a nji ɗang kwa shili təwa zədərpəchi, ndo səya ki təwa dəgəl. Ngə ndər ɓəla nda tə təra ga yi nar nyi nə təl bəra, <<Ya la'a nji təwa Horonayim, tə sara dəgəl.>> 35 Ngə Jonadab tə nar nyi nə təl, <<Nguli shili təl ingə kwa shili wi nda ya nar ngha.>> 36 Ma cho wur na ɓwanya nda, kəl nguli shili təl tə səgwa, ngə nda ghəya tiwi, təl tsəu, ana dəhə kadakaliya nyi tə tiwi 'ual'ualəu. 37 Absalom tə hwi tanyi ga təra yada Talmai zər Amihud, təl Geshur. kəl ja, Dauda kwa sə'ingu zər nyi kala pəchi. 38 Ahir Absalom tə hwi tanyi ga təra yada Geshur, cha yi ngya hinda fa makərəu. 39 Ahir təl tə wur na sə'ingu tər Amnon ga fiya ɗufəu, kəl cha go chim yada Absalom.