Boaz tə Hə Rut
4
1 Ngə Boaz tə təra ya nya lakur gu ta mələm ga ngyata nyi tangnda. Nda njikə lələhə nda cha na kwa kina hə Rut nda kwa shili, ngə Boaz tə na, <<Anda ka ngyata nghə tangnə bazhi ɗa.>> Ngə cha yi ga uya mbwar ngya.2 Ngə Boaz tə nga njirawawa'a mələm kuma, ga na, <<Ngyata hi ma tangna,>> ngə nda ngya. 3 Kəl ngə cha nar nyi nə ndə nda kwa kina hə Rut nda, <<Janə Na'omi nda tə shili hya'atə vu Mowab, kwa gwa'a cha ɗəlnda fa zamən mən Elimelek. 4 Aka ənga ya shili na ɓwanya ɓwanyanyi nə ngha a huɗə nji inə tangnə na, ana njirawawa'a mələm. Macha ko pəliya ba'a ka pəliya. Kəl ja, ma a da wa, nar ɗa ga ya zəndi. Aka a ndə da na lakur mər wa kəl naka, ahir nakə tsə'u kəl naya.>>
Ngə ndə nda tə na, <<Yo pəliya nyi.>>
5 Ngə Boaz tə na, <<Ma ka ɗəlbiya fa ngə tsa Na'omi, ko hətə malafi nga nacha ngə Rut kwa moab nga, ga ka yanda nyi chuli nə ndə nda tə nda, ga tləmər ndə tətə nda ngya ba'anawa ana ga nda fa'aki nyi.>>
6 A təkəra nga, ndə nda kwa kina hə Rut nda tə na, <<A da yo nau hə Rut wa, aka sər fa'aki na'awa ngulisha'a kwa səwa. Ngya nghə təya nə ka pəliya na kərngha. A da yo nau pəliya wa.>> 7 (Haaɗa sər jival njir Yahuda nə pəliya ana bəla kari ga nja ɗa təkəɗə ənda səsənyi ngya ti, kəl ndər ɗəlnda tə səɗəbiya ɓiɓi nyi ga nə nyi nə ndər ɗəla. Nacha ngə laku nda njo nəu vu Isra'ila ga cha ngya təkəɗəu.)
8 Aka ənga nda ndə nda kwa kina pəl nda tə nar nyi nə Boaz, <<Ɗəlbiya sənghə ka kərngha.>> Ngə Boaz tə səɗəbiya ɓiɓi nyi.
9 Ngə Boaz tə bəziya nyi nə njirawawa'a inda ana dəhə nji cha na, <<Ənya nahi ngə matauli ənda ɗəlbiya təya dəhə kar Elimelek, Kiliyon ana nə Mahlon, tsa Na'omi. 10 Ətsəu, Rut kwa Mowab mala Mahlon nda tə nda ɗa tə ka mala ɗa, aka ga tləmər ndə nda tə nda, ana kar nyi a ngya ba'anawa, tsa tləm nyi da zhazhə ku pama njir ki nyi, ndara ku mələm kənda. Ənya nahi ngə matauli ɗa!>>
11 Kəl njirawawa'a inda ana dəhə nji tə na, <<Naea ngə matauli. Ga Tlakə mərtə mala ngo səgo ki nghə nga cha ɗa wi Rachel ana Liya, nanda nda hərtə ki Isra'ila. Ga Hyel mərtə ka ɗa na gəna vu Efrata, ka fiya tləm nghə vu Baitalami. 12 Ga Tlakə nə nghə ngulisha'a na mala nga, njir ki nghə ɗa wi nə Perez, nda Tamar tə yiyah nyi Yahuda.>>
Təkəɗər Nyandəla Dauda
13 Kəl ngə Boaz tə hə Rut ka mala nyi. Ngə cha gwa da cha, ngə Tlakə tə mərtə cha hətə huɗu, ngə cha yah zərsal. 14 Ngə Mahi'i tə nar nyi nə Na'omi, <<Falə ngyatə nə Tlakəu, nda a da ngya nghə kəla ndə nda kwa kina pəliya nghə wa. Ga Hyel mərtə cha fiya tləm nyi ku Isra'ila. 15 Cha ɗa ka ndə nda kwa nə nghə hirgyaɗi, ndə nda kwa vala nghə ku halhalkur ngha. Aka sələkə ngha, nda kwa nyida ngha, nda tə ndiya nguli shili məɗəfa, nacha ngə tə yah nyi.>>
16 Ngə Na'omi tə hətə zər nda tə dza cha ga tsamartə nyi. 17 Ngə mahi'i inda təwul nyi tə na, <<Na'omi uyatə zərsal.>> Ngə nda fəndzə nyi tləm Obed, tləmər adanya Jesi adanya Dauda.
18 Janə təkəɗər nyandəla jul Dauda. Nja ghəya na Perez,
Ram ngə adanya Aminadab,
20 Aminadab ngə adanya Nahshon,
Nahshon ngə adanya Salmon,
21 Salmon ngə adanya Boaz,
Boaz ngə adanya Obed,
22 Obed ngə adanya Jesi,
Jesi tsəu, nacha ngə adanya Dauda.