Rut tə Ɓə na Boaz
2
1 Vanya njikə salnya Na'omi da, ndər gəna ana ndə nda njo la'a səli nyi, hya'atə ku nyavi ka Elimelek, tləm nyi Boaz.2 Kəl ngə Rut kwar mələm Mowab nda tə nar nyi nə Na'omi, <<Əngwa ya təra kyo fa kala ndə nda ya uya kwambiyakur tə lya cha, ya ki vaɗa.>>
Ngə Na'omi tə nar nyi, <<Ma'i kwa ɗa.>> 3 Ngə Rut tə təra ga gwa ghəya vaɗə hir njir mər fa nda. Kəl ngə cha ngabiya ənda ku fa Boaz hya'atə ku nyavi ka Elimelek nda cho mər tləra.
4 Kəl janə Boaz shilitə hya'atə vu Baitalami ga usa nda, <<Tlakə ngya tsa'a na hi!>> Ngə nda wuma,
<<Tlakə səkə nghə papa'akur!>>
5 Ngə Boaz tə jau kadakaliya nyi, <<Kwar wa ngə kwa ndannda?>>
6 Ngə kadakaliya nda tə wuma, <<Kwar mələm Mowab nga, na nda na Na'omi ngə tə shili. 7 Cha na, <Maki ngyaɗa ma ya vaɗə hir njir mər fa.> Nda ghəya cha mər tlər fwatə mbudla nga, saka nə ngə cha dzugwa gwa da kiɗa wu ka cha ɓəliyasar kushiu.>>
8 Ngə Boaz tə nar nyi nə Rut, <<Kwa ɗa, ngati, ngwa ka da ma'i kyatə vanya fa ka vaɗə wa, ya ngwa ka ngyar mbwa nə wa. Ngya ka nəu hir kwatəra ɗa inga. 9 Ka ɓəla mbwa inda ndo mər tlər tə ku fa nga ka nəu nda. A nar nyi tə ya nə tlakala inga ngwa nda da tsəka nghə wa. Ma hila tə nghə tsəu, ma'i ka yi satsə ku giɗa ingə mavi'i tə nyandə inga.>>
10 Ngə Rut tə uzhi na nyama cha hu'i ga nar nyi, <<Mya gwa'atə ya uya chuli nəna kwambiyakur tə lya ka, naya nda mihiɓya?>>
11 Ngə Boaz tə wuma, <<A dəkar ɗa tə nji dəhə sə inda ka mər nə sələkə ngha fwatə tə bəji nda sal nghə tə tah, a ngatə tə ya ənda ka ngyar ada ngha ana ama ngha ana hə'i ngha, ga shili ngya kə'i nji inda ɗakaɗa a da ko zəndə nda wa. 12 Ga Tlakə kinda nghə aka sə ngə ka mər nga. Ga Tlakəu Hyel njir Isra'ila, ndə nda ka shili da kiɗa babəka cha ka gwa'a mbwar mbua, cha nə nghə wazəba 'ualəu.>>
13 Ngə cha wuma, <<Ta'i ya biyama na uya kwambiyakur tə lya kə tlakə ɗa. A fətə ɗa təkə ɗufu ga pə ɓwanya mənakəkur nə mava ngha, madangə a da ya nji ka ɗa wi zhang ku huɗa kwatəra nghə i'i wa.>>
14 A tə bəjir səm sərsum Boaz tə nar nyi nə Rut, <<Anda tangna. Janə gwazhilakə ka njamə ɓitir anap mwamwal ngə ni.>>
Manda cha kə'i njir mər tlər inda, ngə cha nə nyi uhi tsatsa. Cha səm ga nyi, nga həyadza. 15 Nda cha hya'atə ka cho vaɗa, ngə Boaz tə nar nyi nə nji nyi, <<Mada cha vaɗə ku pama dəmadəma inga, ngwa hya ka nyi wa. 16 Hya maka tsəbiya alenyi ku mbambanyi inga, hya ngyar cha pəpa cha ɗəmti, ya ngwa hya tsə nyi wa.>>
17 Rut tə vaɗə ku fa nda ba'a akəu. Nda cha dəgənda ga pibiya sə nda cha vaɗətsi, kəl jan cha uya tə kwa ɗa shala gwadəl mətləu. 18 Cha hətə ga təra gu ta mələm, ga gwa char nyi nə sələkə nyi. Ngə Rut tə həbiya sərsum nda cha səm tə həyadzə ga nə nyi nə sələkə nyi.
19 Ngə sələkə nyi tə jau nyi, <<Tangman ka vaɗə ənya? Tangman ka mər tləra? Ndər Papa'akur ngə ndə nga tsamartə nghə nga!>>
Ngə Rut tə dəkar nyi tləmər ndə cha vaɗə tə fa nyi nda nə sələkə nyi cha na, <<Tləmər ndən ya vaɗə tə fa nyi na, Boaz.>>
20 Ngə Na'omi tə nar nyi nə sələkə nyi. <<Ga Tlakə səkə nyi papa'akur! Tlakə nda a da cha ngyar cha mənakəkur nyi nə nji nda na pi ana nji kuɗəkuɗə wa.>> Cha ɓəla na, <<Ndə nda njikə ea nda lələhəu, zhang cha ku huɗa nji nda kwa kina pəliya ea.>>
21 Kəl Rut kwar mələm Mowab nda tə na, <<Matsa ngə ma'a cha nar ɗa, <Ka ngya kə'i njir mər tlər ɗa kəl bəji nda nda wurandə mər fa ɗa nga.> >>
22 Ngə Na'omi tə nar nyi nə Rut sələkə nyi, <<Tsa'atsa'a tanyi kwa ɗa, ka maka nəu kwatəra nyi inga, aka ma ka ma'i kya tə fa vanya ndə paməu, njo nau mərtə nghə sər həyatəvi.>>
23 Kəl ngə Rut tə ngya tsa'a ka kwatəra Boaz inda cho vaɗa kəl bəji nda tlər mər fa uhi nda njo nga bale ana alkama tə wura. Ətsəu cha ngya na sələkə nyi.