Mahi'i aka Njir Nyavi Banyami
21
1 Ngə njir Isra'ila tə səmnda fəla vu Mispa ənda, <<A vanya ndə da ku pama ea kwa ɗəunda kwa nyi nə njir nyavi Banyami wa.>>2 Kəl ngə njir Isra'ila tə təra yi Betel ga yi ngya huɗə Talkə ba'a nə pəchir akəu, ndo tiwi 'ual'ualəu ana kurakə dzəgamdzəgaməu. 3 Nda na, <<Yawa Tlakəu, Hyel njir Isra'ila, mya gwa'atə sə na ɗa na Isra'ila? Mya gwa'atə nyavi zhang nə Isra'ila kwa sa ənya?>>
4 Kaɗə mbudla vanya zəkəu, nji inda tə hərtə dzəgana ga handa təmachi nə nginda ana ga'a nə daɓəkər.
5 Ngə njir Isra'ila tə jawa, <<Nyavi manə ngə ku huɗa nyavi njir Isra'ila tə ngyar shili huɗə Tlaka?>> Aka nda səmənda fəla vu Mispa ənda kala ndə nda ngyar shili huɗə Tlakəu, njo tsəya nyi.
6 Njir Isra'ila tə ngatə təhuɗər zamən nda njir nyavi Banyami. Nda na, <<Nyavi zhang biyatə ku huɗa Isra'ila ənya. 7 Aman eo ɗana uya nyi mahi'i nə nji inda həyadza, ya a wurtə ea səmənda fəla na Tlakə ənda ada eo ɗəunda nda ku'i kəea wa?>> 8 Kəl ngə nda jawa, <<Nyavi manə ngə ku huɗa nyavi Isra'ila tə ngyar shili huɗə Tlakə vu Mispa?>> Ngə nda ngabiya ənda a ndə da nda tə hya'atə vu Jabesh Giliyad ga shili tə mbwar daɓədzə nda wa. 9 Aka nda nda jigabiya nji, ngə nda la'a njir Jabesh Giliyad a da tangnda wa.
10 Kəl ngə daɓədzə nda tə sə ləvaləva 12,000 ana tsaubar ənda nda yi Jabesh Giliyad, nda yi kuɗənda nji inda na ngya hinda, dəhə ka mahi'i ka shili. 11 Nda na, <<Janə sə nda hyo məra, hya kuɗənda dəhə shili, ana kala mala nda tə zəndə sal.>> 12 Aku huɗa nji inda na ngya vu Jabesh Giliyad, nda uya ku'imahi'i inda pa'a taa ɓə na sal 400, ngə nda fa'atə nda ya tə mbwar tsəmdzə vu Shilo ku Kan'ana.
13 Kəl ngə dəhə daɓədzə nda tə sətə nyi mafakə piyarɗufə nə njir nyavi Banyami gyo mə Rimon. 14 Ku bəji nda ngə njir nyavi Banyami tə ɓəl shili, ngə nja nə nda ku'imahi'i Jabesh Giliyad inda nja ngyar na pi inda. Kəl ja, a ku'imahi'i inda da nji nda ka nda uya dəhə nda wa.
15 Nji inda tə ngatə təhuɗə njir nyavi Banyami, aka Tlakə kwa nda gwa'a zhazhinda nyavi zhang ku huɗa nyavi njir Isra'ila i'i. 16 Ngə njirawawa'a daɓədzə nda tə na, <<Wi ngə a kuɗənda tə nji mahi'i njir nyavi Banyami ja ya, amanə məno ɗana uya nyi mahi'i nə shili njir nyavi Banyamya? 17 Aka a ɗatə tuku nji inda həyadzə ku nyavi Banyami nda uya njir fa'aki, tsa nja da zhazhənda mada nyavi zhang ku huɗa nyavi njir Isra'ila. 18 Ya a da məno i məna ɗəunda nda ku'imahi'i kəmən wa, manda namən njir Isra'ila wurta səmənda fəla ənda, <Dəhə ndə nda ɗəunda nyi kwa nyi nə njir nyavi Banyami ndə shi'ushi'u cha.> 19 Kəl ja, ndzamə ma, janə ladər ka fa ka fa nə Tlakə vu Shilo, təwa vwa nə Betel, ana təwa zədərpəchi nə laku nda kwa təra gwa Betel bətə gwa Shekem, ana gwa təwa holma nə Lebona.>>
20 Aka ənga nda tsau nyi bar nə njir nyavi Banyami ga na, <<Ma'i ma hya gwa mbutahi ku fa anap inga 21 hya ɓəla. Ma ku'imahi'i Shilo kwa zəbiya utsa, kəl ba'a hya kusa zəbiya ku fa inda, kala ndə cha səya kwamalakə zhang ka mala nyi ku huɗa ku'imahi'i shilo inda, cha ma'ita nyi nə ya tə hə'i Banyami. 22 Ma adan nda ndara aman nda tə huhuni nə ea, eo nar nda, <Mərtə ea ma mənakəkur hya vala ea, aka a da ea uya nda mahi'i ku bəjir pah nda wa, ya nahi tsə'u bikə da tsa hi ku səməfəla nda, mana a da hya ɗəunda nda ku'imahi'i kəhi wa.> >>
23 Nacha ngə sə nda njir nyavi Banyami tə məra. Ku bəji nda ku'imahi'i inda kwa utsa, kala ndə tə səya zhang ga təra nə ka mala nyi. Ngə nda ɓəl ya tə hə'i fa'aki kənda ga ɓəla yi hərtə mələm inda ga ngyata nda kwa.
24 Ku bəji nda njir Isra'ila tə ngyar mbwa nda, ga ɓəl kya da njir nyavi kənda ana njikə nda, kala ndə tə ɓəl kyatə hə'i fa'aki nyi.
25 Aku hanyi inga təl da tsa njir Isra'ila wa, kala ndə kwa mər sə nda tə ɗa nə nyi.