Njir Isra'ila tə Pah Njir Nyavi Banyami
20
1 Kəl ngə dəhə njir Isra'ila fwatə tə njir nyavi Dan tsa'a vu Biyersheba, ana hya'atə tə hə'i Giliyad, tə tsəmtədzə huɗə Tlakə vu Mispa. 2 Njirawawa'a nə dəhə nyavi njir Isra'ila tə uya mbwar ngya ku huɗa daɓədzər njikə Hyel, ɗangkura ləvaləva kwa ɗa 400,000 ana katsakər kənda. 3 Nda njir nyavi Banyami tə ngatə ənda dəhə alenya njir Isra'ila təra tə yi Mispa. Ngə njir Isra'ila tə jau ndər Levi nda, ga na, <<Par ea ənda chul ngəna sə ɗimiɗimi tə ɗa.>>4 Kəl ndər Levi nda, sal kwatəra nda nja tsəya nda tə na, <<Naya ana kwatəra ɗa tə shili Gibiya ku mələm njir nyavi Banyami ka ea hənda hanyi. 5 Əvu'i kəl njir Gibiya tə shili ɓandə ki nda, ndo gwa'a nda tsəya ɗa. Ngə nda piya na kwatəra ɗa na tuku, ngə cha tah. 6 Ngə ya hətə kwatəra ɗa, ya tlətlau katsəkatsə ga lətə nyi nə kala mələm fa'aki nə Isra'ila, aka nda mər sə ɗimi ana sər kuzhi ku Isra'ila. 7 Mana dəhə hi nə tangnə na, njir Isra'ila hi, mi sə nda məno mər na chul ngəna səa?>>
8 Kəl dəhə nji inda tə hya'atə ka zhang ga na, <<A ndə zhang da ku huɗa mən kwa təra kyo madləɓa nyi wa, ya ndə do ɓəl kyo ki nyi wa. 9 Janə sə nda məno mərtə nyi nə njir Gibiya, Mən ɓəlshiu mən ɗəmtsə nji inda kwa yi pah nda. 10 Məno ɗəmtsə nji kuma ku gharu ku kala nyavi njir Isra'ila, ka nda nə nyi sərsum nə həyadzər ləvaləva. Həyadzər ləvaləva tsə'u nda təra yi Gibiya, nda yi mərtə nda sə nda tsa'atsa'a, aka dəhə sə ɗimi nda nda mər vu Isra'ila.>> 11 Kəl ngə dəhə njir Isra'ila tə mbatə nya ka zhang təkəra mələm nda.
12 Njir nyavi Isra'ila tə sətə nji nə dəhə njir nyavi Banyami nda na, <<Chul sə ɗimi man nə hya mər ənə ja? 13 Lətə ea nji ɗimi nə Gibiya inga, ea kuɗənda nda ga ea zhazhibiya ɗimikur vu Isra'ila.>>
Kəl ja, njir nyavi Banyami da səhimi da kuvanda njir Isra'ila wa. 14 Ngə njir nyavi Banyami tə zəbiya ku mələm kənda vu Gibiya ka pah njir Isra'ila. 15 Təma njir nyavi Banyami tə ɓatliya ləvaləva pah na katsakər 26,000 ku mələm kənda i'i, matsa nji ɗəmɗəm 700 inda na ngya vu Gibiya inda. 16 Aku huɗa dəhə ləvaləva inga, njir matsal 700 da, nda nja ɗəmtsi, kala ndə ku pama nda kwa nau vakəya shishir kəra ndə na gavərndəng a do tyatinda wa.
17 Alenya njir Isra'ila matsa njir nyavi Banyami inda, tə tsəmtə ləvaləva pah na katsakər 400,000 dəhə nda njir nau pah.
Pah ka Nyavi Banyami
18 Ngə njir Isra'ila tə təra yi Betel ga yi jau Hyel. Nda na, <<Wa ku pama ea kwa ma'i tangərma ka ki pah njir nyavi Banyamya?>>
Ngə Tlakə tə wum ga na, <<Yahuda kwa ma'i tangərma.>>
19 Vanya zəkə əmbudla njir Isra'ila tə hya'atə ga tsəmtədzə ləhə dza Gibiya. 20 Ngə njir Isra'ila tə biya ka pah njir nyavi Banyami ga tiyadzə vu Gibiya. 21 Njir nyavi Banyami tə zəbiya vu Gibiya ga kuɗənda njir Isra'ila 22,000 pəshinda. 22 Kəl ja, njir Isra'ila tə tsətə nyi ɗufə nə kərnənda ga ɓəla tiyadzə tangnda nda tiyadzə tə tangərma nda. 23 Njir Isra'ila tə təra ga ki tiwi nə Tlakə ba'a tə bəjir akəu, nda jau Tlakə nda na, <<Ea ɓəl ya tə mwar pah, ea yi pah njir nyavi Banyami zamən ea ya?>>
Ngə Tlakə tə wuma, <<Ma'i ma yi pah nda.>> 24 Kəl ngə njir Isra'ila tə təra ya kəra njir nyavi Banyami səkəu. 25 Njir nyavi Banyami tsə'u tə zəbiya vu Gibiya ga kuɗənda ləvaləva njir Isra'ila inda kwa nau pah 18,000 ana katsakər.
26 Kəl ngə dəhə njir Isra'ila tə təra yi Betel, nda yi ngyata nda ndo tiwi huɗə Tlakəu. Pəshinda nda səmdzən ba'a nə akəu, ga hatəmachi nə nginda ana lə ga'a nə daɓəkər nə Tlakəu. 27 Ngə nda jau Tlakəu, aku bəji nga Gwarara Mbandər nə Hyel tangnda vu Betel nda. 28 Finihas zər Eliyazar zər Haruna, kwa mər tlər pərist, nda jawa, <<Ea ɓəla ma'i ki pah ka njir nyavi Banyami zamən ea səkə zəma aa ngwa ea da ma'i wa?>>
Ngə Tlakə tə wuma, <<Ma'i ma, aka əzəkəu yo nə hi nda ku cha hi.>>
29 Ngə njir Isra'ila tə mbuya nda mwabə ga ɓandə Gibiya. 30 Nda yi tiyadzə ka pah njir nyavi Banyami, pəshir makərkunya hanyi wi nda haaɗa nda. 31 Nda njir nyavi Banyami tə zəbiya ngə nja pətəbiya nda tsa mələm. Nda ghəya tsa njir Isra'ila wi nda nda tsəlni, ngə a ɗa njir Isra'ila makərkumnyi tə dla tə babal ana a nya laku nda kwa təra yi Betel ana nda kwa təra yi Gibiya.
32 Kəl njir nyavi Banyami kwa na, <<Janə məno kura wi sə nda məna tsəlni,>> njir Isra'ila kwa na, <<Mən hwi, mən pətənda nda tsa mələm biya ku laku.>>
33 Nda yi Ba'al Tamar, ngə nda sha ka pah njir nyavi Banyami, nji inda ku mwabə inda tsə'u tə zəbiya təwa təɗərpəchi nə Gibiya. 34 Ləvaləva njir Isra'ila inda kwa nau pah 10,000 tə pah njir Gibiya. Papanyi tə ɗa dza'u, njir nyavi Banyami da zəndə ənda təmachi nda kwa shili kəra nda wa. 35 Tlakə tə panda njir nyavi Banyami mar njir Isra'ila, pəshinda njir Isra'ila tə kuɗənda njir nyavi Banyami 25,100 inda kwa nau pah. 36 Njir nyavi Banyami tə la'a ənda a kura nda tə nji.
Njir Isra'ila tsə'u tə ɓəlta nda hir njir nyavi Banyami, aka a fətə tə nda kər na mwabu nda nda mbuya nda ləhə dza Gibiya nda. 37 Ngə nji inda ku mwabu nda tə kusa təra go Gibiya, nda wiɗə ga kuɗənda njir mələm nda. 38 Njir Isara'ila ɓatliya tə ka njir mwabu inda ənda nda ɗəzətə ear ku ta mələm, 39 ma njir Isra'ila tə la'a ear nda, ndo ɓəl ba'a gwa pah njir nyavi Banyami. Kəl ja, təvi nda la'a ear nda, njir nyavi Banyami kuɗənda tə njir Isra'ila kwa ɗa makərkumnyi, ngə nda na, <<Janə məno kura nda wi nda parang.>> 40 Kəl ja, nda ear tə ghəya hya'atə ku ta mələm, njir nyavi Banyami tə sha ga la'a ənda ear ndaltə tə dzə ku dəhə mələm kwa ɗəzə shi huɗamələm. 41 Kəl ngə njir Isra'ila tə sha ya kəra nda na pah, kəl ləvər tə səya njir nyavi Banyami, aka a ngabiya tə nda ənda təmachi shilitə təkəra nda. 42 Aka ənga nda hwita nda tsa njir Isra'ila gwa təwa dadil takəu, kəl ja a da nda mbəɗə wa. Njir Isra'ila inda tə zəbiya ku ta mələm tə kuɗənda nda tangnda. 43 Nda ɓandə njir Nyavi Banyami, nda gədlə nda a ta'i da wa, fwatə vu Menuha tsa'a dza Gibiya təwa zədərpəchi. 44 Pəshinda njir nyavi Banyami 18,000 tə kuɗa, dəhə nda njir nau pah. 45 Nda ndo sha ndo hwi gwa təwa dadil takə gyo mə Rimon, njir Isra'ila tə kuɗənda nji 5,000 ku laku. Nda biyama na nəu nji inda həyadza tsa'a vu Gidom ga kuɗənda nji 2,000 səkəu.
46 Pəshinda njir katsakər 25,000 nja kuɗənda, dəhə nda njir nau pah. 47 Kəl ja, nji 600 tə hwita nda gyo mə Rimon, kinda nda gi ngya hya fwaɗəu. 48 Njir Isra'ila tə ɓəl ya da njir nyavi Banyami ga kuɗənda nji dəhə ka sərshishi ana dəhə alenya sənda nda uya. Kala mələm nda nda həya nda hakətə nyi hu'u.