Ndər Levi ana Kwatəra Nyi
19
1 Aku hanyi ina təl da tsa njir Isra'ila wa.Vanya ndər Levi da na ngya ku zərzər giwa a kyatə dəgəl hə'i Ifərem, tə hətə kwatəra hya'atə vu Baitalami ku hə'i Yahuda. 2 Kəl ja, kwatəra nda da ɗa na jiri nə nyi wa. Ngə cha ngya nyi ga ma'ita nyi kyo ki ada nyi a vu Baitalami ku hə'i Yahuda. Nda cha ngya hi nda hya fwaɗəu, 3 ngə sal nyi nda tə təra ya da cha ka cha yi pidahuɗəu ka cha ɓəlandə nyi shili. Cha hətə mava nyi ana kwara mətləu. Nda kwatəra nda tə gwa na cha gu ki, ada nyi tə la'a nyi, ga lali nyi na hirgyaɗi. 4 Kəl ngə adanya kwatəra nda, sələkənya ndər Levi, tə mbabiyadzə bəra kəl nda səkardza, ngə cha hanyi makərəu, nda səma ga sa hinda.
5 Pəshir hanyi fwaɗəkunyi, nda hya'atə kaɗə mbudla ga ɓatliya ka təra, kəl ja adanya kwa nda tə nar nyi nə sələkə nyi, <<Ɓəliyasar ka səmtsə sərsuma ga dzugwa ma'i.>> 6 Aka ənga kya'anda tə ngya ga səm ga sa. Ahir nga adanya kwa nda tə na, <<Yo gədi ngha hanyi ka nə nyi məsəɗakəkur nə kərngha.>> 7 Ndə nda hya'atə ka cho təra ngə sələkə nyi tə pətəya nyi, ngə cha hənda hanyi. 8 Əmbudla pəshir tufukunya pəchi, nda nda hya'atə ka ndo təra, ngə adanya kwa nda tə na, <<Ɓəliyasar. Ngyata nghə kəl ma pəchi tə pi!>> Kəl ngə kya'akura nda tə səm sərsuma.
9 Nda ndə nda ana kwatəra nyi ana mava nyi tə hya'atə ka ndo təra, adanya kwa nda sələkə nyi tə na, <<Ndzama, sakana pəchi kaɗə təɗa, akə kaɗə ɗa. Hanyi tangha ka nə nyi məsəɗakəkur nə kərngha. Əzəkə tsəɗakə mbudla ko nau hya'atə ka go lakur yo ki.>> 10 Kəl ja, manda a cho ɓəla i cha hanyi wa, ndə nda tə hya'atə ga go laku, nanda ana kwatəra nyi nda, ba'a kwara mətlə nyi inda, nda təra tahə Jebus, nacha ngə Urshalima.
11 Nda nda ɗa ləhə dza Jebus ya pəchi kaɗə təɗa, ngə mava nda tə na, <<Mən ta'i ku mələm njir Jebus na mən hanyi ta mən.>>
12 Ngə tlakə nyi nda tə wuma, <<A'a, a da məno go mihiɓir mələm nda a da nə njir Isra'ila wa. Mən təra yi Gibiya.>> 13 Ngə tlakə nyi nda tə tsakətə na, <<Mən mbabiyadzə mən yi hanyi ku Gibiya ndara Rama.>> 14 Aka ənga nda biyama na ma'i, ya pəchi təɗə tə təvi nda yi Gibiya ku mətla hə'i Banyami. 15 Hinda nda ta'i ka nda hənda hanyi. Nda təra ga yi ngyata nda tə babal ta mələm nda, aka a ndə da tə nga nda kyo ki nyi ka nda ki hanyi wa.
16 Əvu'i nda, kəl janə vanya ndə halhalə hya'atə kyatə dəgəl hə'i Ifərem, nda na ngya vu Gibiya, tə shili hya'atə tə vir mər tlər ku fa, alenya njir mələm nda njir nyavi Banyami nda. 17 Nda ndə halhalə nda tə la'a mihiɓi tə babal mələm nda, cha jawa, <<Abarna ka? Hya'atə man ka?>>
18 Ngə ndə nda na, <<Hya'atə vu Baitalami aku Yahuda nə ea, eo təra yo mələm kəea kyatə dəgəl hə'i Ifərem. Ya yi Baitalami aku hə'i Yahuda sakana yo təra yo ki. A ndə da nda tə nga ɗa go ki nyi wa. 19 Janə ngan ja, dəhə səu a da tsa ea, sərsum kwara kəea i'i, gwazhilakə ana ɓitir anap ka kwatəra ɗa ana kərɗa ana mava ɗa. A sə da ea tar wa.>>
20 Ngə ndə halhalə nda tə na, <<Yo dləutsə nghə ku ki ɗa, yo nə nghə dəhə sə nda ko gwa'a. Kəda ga cha ɗa a da ko hanyi tə babal nə wa.>> 21 Ngə cha təra na nda go ki nyi ga gwa nə nyi sərsum nə kwara nyi inda. Ahir nda chinda hya nda, nda səm ga sa.
22 Ku bəji nda ndo ngatə məsəɗakəkur kənda, kəl janə alenya nji ɗimi ku mələm nda tə ɓandə ki nda. Ndo dəgə nyavi ndo na nə ndə halhalə nda na kurakə dzəgamdzəgaməu, <<Zəbiya na ndə nda shili ku ki nghə nda, ka ga ea piya na cha.>>
23 Ngə tlakər ki nda tə biya ga nar nda, <<A da ka bazhi ɗa wa, ngwa hya mər chul ngəna sə ɗimi wa. Mana mihiɓir nə ndə na, ngwa hya mər chul ngəna sər kuzhi wa. 24 Ta'i ma, janə kwa ɗa da kwapəlyakəu, ana kwatəra nyi. Əngwa ya zəbiya na hi nda sakana, hya mər sə nda kərahya i na nda. Kəl nda ngwa hya mər chul ngəna sər kuzhi nə ndə nə wa.>>
25 Kəl ja, a nji inda da səhimi da cha wa. Kəl ngə ndər Levi nda tə hətə kwatəra nyi ga lətə nda biya, ngə nda piya na cha na tuku, nda mər sər kuzhi nə nyi həm hanyi, nda kaɗə vi wur ngə nda ngya nyi cha təra. 26 Nda vi tə wura, mala nda tə ɓəl go ki tangnda tlakə nyi na ngya, cha gwa dla nya nyavi ngə cha piya tanyi tangnda kəl nda pəchi tə zədi.
27 Nda tlakə nyi tə hya'atə mbudla ga mbəɗiya nyaki nda ga biya ka cho biyama na ma'i nyi, kəl janə kwatəra nyi nda tə piya nya nyaki nda, ana cha cha tə udzəmər nyaki. 28 Ngə cha nar nyi, <<Hya'atə mən təra.>> Kəl ja, a da cha sha wa. Kəl ngə ndə nda tə fətə nyi tə ya kwara ga gu laku ka təra kyo ki.