Nyavi Dan tə Ngya vu Layish
18
1 A ku hanyi inda a təl da tsa njir Isra'ila wa.Ya ku bəji nda nyavi Dan kwa gwa'a mbwar ngya nə kərnənda tangnda ndo ngya, aka a da nda taa uya nəkənda na sər fa'aki ku huɗa njir Isra'ila wa. 2 Kəl nyavi Dan tə sə njir nau pah tufu hya'atə vu Zora ana Eshtawol ka nda gwa'abiya hya mələm nda. Nji inda tə ɗa təvira dəhə nyandəla nda. Nda nar nda, <<Ma'i ma hya yi gwa'abiya hya mələm nga.>>
Nji inda tə gwa ku mələm nda kya tə dəgəl hə'i Ifərem nda ga shili ku ki Mika, tangnda nda hanyi. 3 Nda nda ɗa ləhə dza ki Mika, ngə nda ngabiya kuraka tlakala ndər Levi nda, ngə nda ta'i ga jau nyi, <<Wa shili na kə tangna? Mi ko mər tangna? Mya gwa'atə tə kə tangna?>>
4 Ngə cha par nda sə nda Mika tə mərtə nyi, cha na, <<Mika tə hətə ɗa ka tlər wazəba, ka ya ɗa ka pərist nyi.>>
5 Ngə nda nar nyi, <<Maki jawar Hyel ndara ma'i kəea nə kwa ɗa mənakəu.>>
6 Ngə pərist nda tə wuma, <<Ma'i ma ku piyarɗufu, Tlakə tsa'a kə'i hi.>>
7 Nji tufə inda tə ngyar mbwa nda ga yi Layish, nda yi la'a nji inda kwa ngya kənda gangkərtəyi wi njir Sidon, a ləvər da wa. Ya manda a nda tar madami ku hə'i kənda wa, nda ɗa na biyama. Ətsəu ndo ngya kənda naɗə tsa njir Sidon ya a sə do ɗaɓə nda ka kala ndə wa.
8 Manda nda ɓəl shili Zora ana Eshtawol, ngə ka zamənda tə jau nda, <<Mi labar ma'i kə hya?>>
9 Ngə nda wuma, <<Hya'atə ma mən yi pah nda! A la'a tə ea mələm nda mənakəu. Mya gwa'atə hyo ngya tangnə ɓwa'atanya? Ngwa tsə'u hya ngya ka mər vanya sə wa, mən kusa yi dləuya hə'i nga. 10 Ma hya yi nda, hyo yi həya nji inda a da kwa har wi vanya sə kwa nau ɗa wa, ana hə'i mənakə nda Hyel tə nə hi ku cha hi, hə'i nda pa'a tə tar madami.>>
11 Kəl nji 600 ku nyavi Dan tə ɓatliya ka pah, nda hya'atə vu Zora ana Eshtawol. 12 A ku lakur ma'i ngə nda tsəmtədzə vu Kiriyat Jeyarim ku hə'i Yahuda. Nacha gwa'atə nja nga mbwa nda təwa təɗərpəchi nə Kiriyat Jiyarim nda, Mahane Dan ba'aka ənya. 13 Hya'atə tangnda nda təra gya tə dəgəl hə'i Ifərem ga shili ku ki Mika.
14 Kəl nji tufu inda tə gwa'abiya hya mələm Layish inda tə nar nyi nə kə'i zamən nda, <<A zəndətə hi ənda, efod, alenya hyel i'i, katə fiɗəfiɗa ana katə hərhər da ku zhang ku huɗa ki ina? Mi sə nda məno kina məra?>> 15 Kəl ngə nda sha ga gwa ku ki nda tlakala ndər Levi kwa nda, gu ki Mika, ngə nda usa nyi. 16 Njir nyavi Dan 600 inda tə ɓatliya ka pah inda, tə ta'ita nda ku laku. 17 Ngə nji tufə inda tə gwa'abiya hya mələm nda tə gwa ga hətə səlirma fiɗəfiɗa, efod ana vanya katə fətəfətə nə ki nda. Ngə pərist nda tsə'u kə'i nji 600 inda tə ɓatliya ka pah inda, tə ta'ita nda tə lakur go nyaki.
18 Nda nji inda go ki Mika ga gwa hətə səlirma fiɗəfiɗa, efod ana vanya katə fətəfətə nə ki nda, ngə pərist tə nar nda, <<Mi nə hyo məra?>>
19 Ngə nda wum nə nyi, <<Bəgə ɗiyu! ngwa ka ɓwanya wa. Nəu ea ka ɗa ka ndər dəkə dəma ana pərist kəea. A da ndiya nghə vi ka mər tlər pərist nə nyavi nji vu Isra'ila matsa a nə njir ki ndə zhang ma?>> 20 Kəl pərist nda tə mər hirgyaɗi. Cha hətə efod, vanya katə nə njir ki nda ana səlirma fiɗəfiɗə nda ga təra kə'i nji inda. 21 Ngə nda sha ga təra dəhə ka ngulisha'a kənda, sərshishi kənda ana dəhə səkənda.
22 Nda nda ɗa naɗə tsa ki Mika, ngə Mika tə nga nji inda na ngya ləhə dzə nyi, ngə nda shili ndo gədlə njir nyavi Dan. 23 Ndo nga nda na kurakə dzəgamdzəgaməu, ngə njir nyavi Dan tə sha ga nar nyi nə Mika, <<Mi gwa'atə ka mbəlatə chul njinə ka pah ea?>>
24 Ngə cha wuma, <<Aman hyo ɗana na <Mya ɗa? Ba'a hya fa'atə katə inda ya ɓatləti, ana pərist ɗa ga ma'ita hya? Mi sənda həya ɗa dza?> >>
25 Ngə njir nyavi Dan tə wum ga na, <<Ngwa ka da tsə ea wa, ma əngə wa nji hərtə nda ku pama ea kwa pah ngha, ya dəhə hi ka njir ki nghə hyo kuɗa.>> 26 Kəl ngə njir nyavi Dan tə ma'ita nda, nda Mika tə la'a a ndəɗənyi tə nda dunama, ngə cha ɓəl tanyi yo ki.
27 Kəl ngə nda fa'atə sə inda Mika tə ɓatlətə inda, ana pərist nyi, nda təra yi Layish, tangnda nji kwa ngya kənda gangkərtiyi ku piyarɗufu. Nda yi dla'a nda na katsakər ga nginda mələm kənda. 28 A ndə da tə nau mbəɗandə nda wa, aka naɗə nda tsa Sidon, ya a vanya mələm da nda bazhikur tə pama nda wa. Mələm nda ku dakəu, ləhə dza Bet Rehob.
Njir nyavi Dan tə ɓəla hərtə mələm nda ga ngyata nda tangnda. 29 Ahir tər Dan zər Jakop jival kənda, nda fəndzə nyi tləm nə mələm nda, Dan. 30 Njir nyavi Dan tə piya nyi katə inda nə kərnənda, kəl Jonatan zər Gashom, zər Musa, tə ɗa ka pərist kənda tsa'a ku bəji nda nja fa'atə nda ki mər mavakur. 31 Nda biyama na həsəli nə katə inda Mika tə ɓatlətə inda, madangə Madləɓa Həsəli nə Tlakə da vu Shilo.