Katə Mika
17
1 Vanya ndə da tləm nyi Mika hya'atə tə dəgəl hə'i Ifərem 2 tə nar nyi nə ama nyi, <<Azurfa shekel 1,100 nghə nda nja həltə nda ka shi'unda ndə təkər nda, naya nda həti, janə tsa ya.>>Ngə ama nyi tə na, <<Tlakə səkə nghə papa'akur zər ɗa!>>
3 Nda cha ɓəlandə azurfa shekel 1,100 nda nə ama nyi, ngə ama nyi tə na, <<Yo dzəviya alenya azurfa ɗa na nə Tlakəu, tsa shi'u nda da ɗa təkəra zər ɗa. Ngə cha nar nyi nə zər nyi, yo nə nghə alenya azurfa na, ka ɓatlətə katə ngə ni.>>
4 Kəl ngə cha ɓəlandə azurfa nda nə ama nyi, ngə ama nyi tə həbiya azurfa shekel 200 kwa, ga nə nyi nə yakə dlə na azurfa, ngə yakə nda tə dlətə katə ni. Ngə nja fiya ku ki Mika.
5 Vi katə da tsa Mika, ngə cha ɓatlətə efod ana alenya katəu, ga dzəviya zhang ku huɗa nguli shili nyi ka pərist. 6 A ku bəji nga təl da tsa njir Isra'ila wa, kala ndə kwa mər sə nda kəra cha har nyi.
7 Kəl vanya tlakala ndər Levi hya'atə vu Baitalami ku hə'i Yahuda, 8 tə ngyar mələm ka gwa'a mbwa nda cho ngya ti. Nda cha ku laku ngə cha shili ku ki Mika kya tə dəgəl nə hə'i Ifərem.
9 Ngə Mika tə jau nyi, <<Hya'atə ma ka?>> Ngə cha na, <<Ndər Levi ya hya'atə vu Baitalami ku hə'i Yahuda, yo gwa'a mbwa nda yo ngya tə na.>>
10 Ngə Mika tə nar nyi, <<Mi'i ngyata ma, ka ɗa ka ndər dəkə dəma na'a ana pərist ɗa, yo nə nghə shekel kum nə azurfa kala fa, ana lukutəu ana sərsuma.>> 11 Ngə ndər Levi nda tə dləukər cha ngya na cha, tlakala nda tsə'u tə ɗa wi zhang ku huɗa nguli shili nyi. 12 Kəl ngə Mika tə dzəviya ndər Levi nda ka pərist nyi, ya cha ngya ku ki nyi. 13 Ngə Mika tə na, <<Sakana a zəndə tə ya Tlakə kwa səkə ɗa papa'akur, mana ndər Levi nə ɗa tə ka pərist ɗa.>>