Somsən ana Dalila
16
1 Vanya pəchi Somsən tə yi Gaza, tangnda cha la'a vanya zawar. Ngə cha gwa piya na cha. 2 Ngə nja nar nyi nə njir Gaza, <<Somsən tangna!>> Ngə nda ɓandə mbwa nda, ga mbuya nyi mwabu, ga səkə nyi həm hanyi biya nya lakur go mələm. Nda bəgə ta nda ɗiu əvu'i nda, a nda sha wa, ndo na nə kərnənda, <<Ma vi kwa wur məno tsəya nyi.>>3 Kəl ja, Somsən tə piya tanyi kəl adala vu'i, cha hya'atə ga yi ɓəlbiya nyaki lakur gu mələm, dəhə ka shimbal nyaki mətlə inda, ga kutlanda lyang nyaki ana dəhə mədlakəu. Ngə cha hətə tə patləka cha ga təra nə gyatə dəgəl nda kwa ndzam dzə na Hebron.
4 Ahir bəji kushiu, cha go i vanya mala aku dakə Sorek, tləm nyi Dalila. 5 Ngə njirawawa'a nə njir Filisti tə yada cha ga yi na, <<Macha ko nau shandə nyi kər nə Somsən cha char sə nda tə gwa'atə tə cha na chul dunama nga, ana ənda eo ɗana ndəɗə nyi dunama ea mbiya nyi, kala ndə ku pama ea kwa nə nghə shekel 1,100 nə azurfa.>>
6 Ngə Dalila tə nar nyi nə Somsən, <<Par ɗa tangnda dunama dəgal nghə nə ti ana ənda njo ɗana ndiya nghə dunama ba'a mbiya ngha.>>
7 Ngə Somsən tə na, <<Ma nja mbiya ɗa na taɗər dzəra laga məɗakə məɗəfa, tsə'u yo ɗa na dunama wa, yo ɗa wi kala ndəu.>>
8 Ngə njirawawa'a njir Filisti tə shili na nyi taɗər dzəra laga miɗakə məɗəfə nə Dalila, ngə cha mbiya nyi ni. 9 Alenya nji tə mbuta nda ku vi nda, Dalila tə səya ləla ga na, <<Somsən, janə njir Filisti təkəra ka!>> Kəl ja, cha tlətlənda dzəra inda wi bəratsən ngə nja handzə nyi hu'u. Aka ənga, a da nja zəndə mbwa nda dunama nyi tə wa.
10 Ngə Dalila tə nar nyi nə Somsən, <<Ka fiya ɗa ka ndə kəkəng, ga tliya ɗa gəzhi. Anda sakana, ka dəkar ɗa ənda njo ɗana mbiya ngha.>>
11 Ngə cha na, <<Ma nja mbiya ɗa na sə'i taɗə nda pa'a nja ta mər tlər ni, yo ɗa kəla dunama wi kala ndəu.>>
12 Ngə Dalila tə hətə sə'i taɗəu, ga mbiya nyi ni, ngə cha har kuraka cha ga na, <<Somsən, janə njir Filisti təkəra ka!>> Kəl ja Somsən tə tlətlənda sə'i nda tə cha wi ngə tə bəratsən.
13 Ngə Dalila tə nar nyi nə Somsən, <<Ba'a sakana gəzhi nə ko tla na'a. Par ɗa ənda njo ɗana mbiya ngha.>>
Ngə cha wuma, <<Ma ka daɓiya daldalər shishir kəra ya məɗəfə ingə na bəratsən ga ləmti, ga gəzəya na hafə i səu, yo ɗa wi kala ndəu.>> Nda cho hanyi, Dalila tə hətə daldalər shishir kəra cha məɗəfə inda 14 ga ləmtə ga gəzəya na hafə i səu.
Ngə cha har kuraka cha səkəu ga na, <<Somsən, janə njir Filisti təkəra ka!>> Ngə cha mə ku hanyi ga tətəsnda hafə i sə inda dəhə ka pa'ua nda.
15 Kəl ngə cha nar nyi, <<Aman ko ɗana na ko i ɗa ya a da əngə ku ɗəfwa kə wa? Makərkunya nda ko fiya ɗa ka ndə kəkəng ga ngyar par ɗa jirir sə nda tə mərtə nghə na dunama na.>> 16 Cha biyama na wendə nyi na ndza'avi ənya əzəkəu, tə nda ɗa Somsən həɗa tə kəɓət wi cho gwa'a tah.
17 Aka ənga cha par nyi dəhə səu. Cha na, <<A pyaɗakə da taa tsəkar kəraya wa, aka Nazir ya, dzəvədzəvə nyi nə Hyel fwatə pəshir yah. Ma nja sənda shishir kəra ya, dunama ɗa kwa ngya ɗa, ya yo ɗa wi kala ndəu.>>
18 Manda Dalila tə la'a ənda par nyi tə cha dəhə səu, ngə cha sə yada njirawawa'a njir Filisti ga na, <<Anda ma sakan ja, a par ɗa tə cha dəhə səu.>> Kəl njirawawa'a njir Filisti tə ɓəl shili na azurfa ku cha nda. 19 Nda Dalila tə pətəu Somsən ku hanyi tə dza cha, ngə cha sənda daldalər shishir kəra cha məɗəfə inda, ga ghəya nə nyi ɓwaɓwatəu. Ngə dunama Somsən tə təkə na cha.
20 Ngə cha har kurakə ga na, <<Somsən, janə njir Filisti təkəra ka!>> Nda cha mə ga hya'atə ku hanyi, cha har bəra cho hya'atə na dunama wi nda cha tsəlna məra. Kəl ja, a da cha zəndə ənda Tlakə wurta ngya nyi wa.
21 Kəl njir Filisti tə səya nyi, ga chakubiya li ku kəra cha ga təra na cha yi Gaza. Nda mbiya nyi na dzəra ndzəa, nda fiya nyi ka ndər ha'a ku jarum. 22 Kəl ja, shishir kəra cha tə ghəya hə səkəu.
Tər Somsən
23 Ngə njirawawa'a njir Filisti tə tsəmtə dzə ka hatəmachi dəgal ana ladər nə katə kənda Dagon, ndo na, <<Katə kəmən nə mən tə ndər dawa kəmən Somsən ku cha mən.>>
24 Nda nji tə la'a nyi nda fal katə kənda ndo na,
<<Katə kəmən nə mən tə ndər dawa kəmən
ku cha mən, ndər kuɗə nji kəmən,
ndər səwa hə'i kəmən,
ndər kuɗə nji kəmən.>>
25 Ku bəji nda nda ku hirgyaɗi dəgal nda har kurakə ga na, <<Zəbiya nji na Somsən cha zəbiya mər sər gyaɗi nə mən.>> Ngə nda nga Somsən zəbiya ku jarum, cha zəbiya nə nda sər gyaɗi.
Nda nda ta'ində nyi ku pama shimbal i'i, 26 ngə Somsən tə nar nyi nə nji nda tə gəziya cha cha inda, <<Fiya ɗa tangnda yo nau tsəkar shimbal inda nja dəhə mbwa'alə ngə ni, ga ya dəhəndzə kərɗa.>> 27 Mbwa'alə nda nyitə dlaləu ana shili ka mahi'i, dəhə njirawawa'a njir Filisti tangnda, a kya tə kəra vi nda tsə'u shili ka mahi'i kwa ɗa 3,000 kwa ndzamə ənda Somsən kwa təla. 28 Kəl ngə Somsən tə pətlənya nə Tlakəu ga na, <<Yawa Tlakə Ndər Gyalkuru, ɗənghatə na ya. Yawa Hyel, na'a dunama zhaka zhang tanyi səkəu, ga ya kinda səkur təkəra njir Filisti a təkəra lya ya inə mətlə na.>> 29 Kəl Somsən tə gəziya shimbal mətlə inda kwa gəzə vi nda. Cha dəhəndzə kərnyi dzəri, chisəma cha tə vanyi matsala cha tə vanyi, 30 ngə Somsən tə na, <<Əngwa ya tə kə'i njir Filisti!>> Ngə cha mbəla na dəhə dunama nyi, kəl mbwa'alə nda tə dla səya kəra njirawawa'a njir Filisti ana dəhə nji inda ku nda. Təwa ənga cha kuɗənda nji ɗang ku bəjir tə nyi nda, ndiya matsa nda cha na pi.
31 Ngə kə'i zamə nyi ana ada nyi ana dəhə njir ki kənda tə təra ga yi hətə nyi. Nda yi hətə nyi ga ɓəl na cha shili ga haɗiya nyi ku pama Zora ana Eshtawol a ku hu Manuwa ada nyi. Fa mətləkumnyi Somsən tə nəu na njir Isra'ila.