Somsən tə Kisəkur
15
1 Ahir hanyi yiɗau, ku bəjir mər alkama, Somsən tə hətə zər kua ga təra ki usar mala nyi. Cha nar nyi nə adanya mala nyi nda, <<Yo gwa da mala ɗa.>> Kəl ja, adanya kwa nda da ngya nyi cha gwa wa.2 Cha nar nyi nə Somsən, <<Vəlvəl ya har ənda a da ko i nyi wa, nacha gwa'atə ya nə nyi nə bazhi ngha ka mala nyi. A məshikər nyi ngə da gumaguma nə nghə ma? Hətə nyi təvira mala ngha.>>
3 Ngə Somsən tə nar nda, <<Sakana, a tsə'u yo ɗa ndər bikə aka bwal nda yo tiya nyi nə njir Filisti wa, vəlvəl yo takasiya nda.>> 4 Ngə cha biya ga səya gakə 300 ga mbatə shiwa nda mətlə mətləu. Ngə cha mbatə təkəsə tə shiwa nda inda, 5 ga handzə nyi hu nə təkəsə inda ga wunda gakə inda go fa uhi njir Filisti. Təwa ənga, cha nginda uhi inda nja mbatə dəmadəma, ana inda tə ta'i, ana fa zaitun njir Filisti.
6 Nda njir Filisti tə jawa, <<Wa na mər sə na?>> Ngə nja nar nda, <<Somsən nga, sələkənya njir Timna, aka nja nə nyi mala nyi nə bazhi nyi.>>
Ngə njir Filisti tə gi nginda kwa nda ana ada nyi. 7 Ngə Somsən tə na, <<Mangə hya mər ənga, səmnda tə ya fəla, a yo ta'i wa kəl ya kibiya.>> 8 Ngə Somsən tə pah nda ga kuɗənda nji ɗanghəu. Ngə cha təra tanyi ga ki ngya tanyi ku tləl kyo mə Etam.
9 Ngə njir Filisti tə gi tsəmtə dzə vu Yahuda, ga yi pah njir Lehi. 10 Ngə njir Yahuda tə jawa, <<Mya gwa'atə hya shili pah ea?>>
Ngə nda wuma, <<Ea shili ka ea səya Somsən na, ea ki mərtə nyi wi nda cha mərtə ea nda.>>
11 Ngə njir Yahuda 3,000 tə təra yo tləl nda kyo mə Etam nda, ga nar nyi nə Somsən, <<A da ka zəndə ənda njir Filisti nə kwa səm təlkur təkəra mən ma? Minə mərtə ea kə əna?>>
Ngə cha wuma, <<Sənda nda mərtə ɗa ngə ya mərtə nda.>> 12 Ngə nda nar nyi, <<Ea shili ka ea mbiya nghə ea nə nghə nyi nə njir Filisti na.>> Ngə Somsən tə na, <<Səmnda ɗa ma fəla ənda a hyo tsəya ɗa na kərnəhi wa.>>
13 Ngə nda na, <<A dləukər tə ea, eo mbiya nghə kəl mbiya ngha, ba nə nghə nyi nə nda. A da eo tsəya nghə wa.>> 14 Nda tə Somsən yi Lehi, kəl njir Filisti tə hya'andə kurakə ndo ya kəra cha. Kəl ngə Shanguɗə Tlakə tə səya təkəra Somsən ga nə nyi dunama. Kəl sə'i nda nja mbiya nyi nə inda tə tlətlə wi pa'ua ngə nja handzə nyi hu'u, ga pəpə səya hu'i. 15 Ngə cha uya taɗər ɗihi vangaɓa kwara, ngə cha hətə ga kuɗənda nji 1,000 ni.
16 Ngə Somsən tə na,
<<Ana ɗihi vangaɓa kwara,
ya ɓutə nji wi kuɗəkuɗər kwara.
Ana ɗihi vangaɓa kwara,
ya tsəya nji 1,000.>>
17 Nda cha wurandə ɓwanya, ngə cha vakənda ɗihi vangaɓa kwara nda, ngə nja fəndzə nyi tləm nə mbwa nda Ramat Lehi. 18 Aka Somsən kwa ngatə hili ngə cha tiwi nə Tlakəu, ga na, <<A nə nyi tə kə nəna kura dəgal nə mava ngha. Sakanə ya, tsa'tsa'a tanyi ya tə na hili ya go cha njir Filisti, nji kəla tla bədzang inə ya?>> 19 Ngə Tlakə tə mbəɗiya vanya ka'u vu Lehi, ngə ɓiti tə zəbiya kwa. Nda Somsən tə satsi, ngə dunama nyi tə ɓəl shili, ngə cha zhivəra. Ngə nja fəndzə nyi tləm nə ka'ur ɓiti nda En Hakore, ya ba'a ənya tsəutanyi tangnda vu Lehi.
20 Somsən tə nəu na njir Isra'ila fa mətləkumnyi, ku bəji nda njir Filisti kwa səm təlkur təkəra nda.