Somsən tə Hə Mala
14
1 Somsən tə təra səya Timna ga səya la'a kwamalakə kwa Filisti ki nda. 2 Nda cha ɓəl shili ku ki, cha nar nyi nə ada nyi ana ama nyi, <<A la'a tə ya malakəu kwa Filisti a ki Timna, yo i ka həbiya ɗa nyi ka mala ɗa.>>3 Ngə ada nyi na ama nyi tə nar nyi, <<A mala da nda pəlakər ko həbiya ku jul kəmən, ndara ku pama njikə mən ma? Tuku kəl ku pama njir Filisti, nji kəla tla bədzang ko hə ya?>>
Kəl ja, Somsən tə nar nyi nə ada nyi, <<Nacha yo i ka həbiya ɗa. Yo i nyi.>> 4 Njir yah nyi da zəndə ənda Tlakə ngə kwa nəu na Somsən wa. Aka Tlakə kwa gwa'a ənda cho ɗana pah njir Filisti. Aka nanda ngə kwa səm təlkur təkəra njir Isra'ila. 5 Ngə Somsən tə təra səya Timna kə'i ada nyi kə'i ama nyi. Nda nda ɗa ləhə dza fa anap njir Timna, kəl janə zər ləvari kwa ghərti ya kəra cha. 6 Ngə Shanguɗə Tlakə tə səya təkəra cha ga nə nyi dunama, ngə cha kutlau ləvari nda wi zər kua. Kəl ja, a da cha nar nyi sə nda cha mər nə ada nyi ndara ama nyi wa. 7 Ngə cha təra ga səya ɓwanya na kwa nda, ya kwa i nyi cha.
8 Ahir hanyi yiɗau, nda cha ɓəl səya ka cha həbiya kwa nda ka mala nyi, ngə cha tyati ka cha la'a ləvar nda cha tsəya nda. Macha yi kəl janə chiɗi mbau tə ləvakachi kwa, ana ma'a mwamwa. 9 Ngə cha tuɓutsə mwamwa chiɗi nda ku cha cha, cho wutə tə lakur ma'i. Nda cha həya njir yah nyi, ngə cha ɗa nda, nanda tsə'u nda wutənya. Kəl ja, a da cha dəkar nda ənda ku ləvari tətə ngə cha tuɓə mwamwa nda wa.
10 Ngə ada nyi tə təra ka cha, ka ga nda səya la'a kwa nda. Ngə Somsən tə ɓatliya ladər tangnda, aka sə nda nguli tlakala tə tsəl na mər nga. 11 Nda njir Filisti tə la'a nyi, ngə nda nə nyi nguli tlakala makərkumnyi ka nda ngya kə'i cha.
12 Ngə Somsən tə nar nda, <<Əngwa ya par hi vanya pəkətəu, ma ndə nda tə nau wum ku hanyi məɗəfə nə ladər na, yo nə nyi daura linə makərkumnyi, ana dzaki makərkumnyi. 13 Ma a da hya nau wum wa, kala ndə kwa na'a daura linən makərkumnyi ana dzaki makərkumnyi.>> Ngə nda na, <<Par ea pəkətə nghə ea ngati.>>
14 Ngə cha na,
<<Aku sə nda kwa səma, sərsum tə biya,
aku sə nda na dunama, sə nənəm tə biya.>>
Hanyi makərəu, a da nda nau wum wa.
15 Pəshir fwadəkunyi, ngə nda nar nyi nə mala Somsən, <<Pətəya sal nghə cha dəkəbiya ea pəkətə nga, ma'a əngə wa, eo nginda nghə dəhə ka njir ki ada ngha. Hya nga ea shili tangnə ka hya fa'aya ea ya?>>
16 Kəl ngə mala Somsən tə shili vakətə kərnyi tə cha na tiwi cho na, <<A da ko i ɗa wa! Vəlvəl a da ko nyida ɗa wa. Ka par nyi pəkətə nə njikə ea.>>
<<Ya a da ka dəkar ɗa wumwum nyi wa.>> Ngə Somsən tə wum nə nyi ga na, <<A da ya taa dəkə mada nə ada ɗa ndara ama ɗa wa, mya gwa'atə yo par ngha?>> 17 Cha biyama na tiwi ku dəhə hanyi məɗəfə nə ladər nda. Pəshir hanyi məɗəfəkunyi ngə cha dəkar nyi, aka cha biyama na wendə nyi. Ngə cha təra ga ki dəkar nyi nə njikə nda.
18 Təvi pəchi təɗə pəshir hanyi məɗəfəkunyi nda, njir mələm nda tə shili nar nyi,
<<Mi sə nda nənəm tə ndiya mwamwa?
Mi sə nda na dunama tə ndiya ləvara?>>
Ngə Somsən tə nar nda,
<<Macha a da hya nda mbatənya ka mala ɗa wa,
a da hyo nda nau wum pəkətə ɗa wa.>>
19 Təma Shanguɗə Tlakə tə səya təkəra cha ga nə nyi dunama. Ngə cha təra səya Ashkelon, ga səya kuɗənda nji makərkumnyi, ga fa'aya kwazhalɓi, ga nə nyi dzaki kənda nə nji inda tə wum pəkətə nda. Ngə cha ɓəl gyo ki ada nyi ana huɗatla. 20 Ngə nja nə nyi mala Somsən nda nə ndə nda ɗa ka bazhi pəshir hədzə nda.