Yar Somsən
13
1 Njir Isra'ila tə ɓəla mər sə ɗimi nə Tlakəu, ngə Tlakə tə fəu nda ku cha njir Filisti fa fwaɗəkumnyi.2 Vanya ndər Zora da, tləm nyi Manuwa, hya'atə ku nyavi Dan, mala nyi mala kəla yah, cha ngya a zər da wa. 3 Kəl chama Tlakə tə chabiya nyi dzə nə mala nda ga nar nyi, <<Mala kəla yah ka, ya a zər da tsa kə wa, kəl ja, ko hətə huɗu ko yah zərsal. 4 Ka gəla ja, ngwa ka da sa ɓitir anap ndara sə nda kwa wendə ndə wa, ya ngwa ka səm kala sər həɗə wa, 5 aka ko hətə huɗu ko yah zərsal. Ngwa nja tsəkar shishi nyi na pyaɗakə wa, aka zər nga kwa ɗa dzəvədzəvənyi nə Hyel, fwatə tə pəchir yah nyi, nacha ngə Nazir, ya cho ghəya tlər dləuya njir Isra'ila ku cha njir Filisti.>>
6 Ngə mala nda tə yada sal nyi ga yi nar nyi, <<Ndəkə Hyel tə shili da ya. Huɗəma cha sər ləvəra, pabiya chama Hyel. A da ya jau nyi ndara hya'atə man cha wa, ya a da cha dəkar ɗa tləm nyi wa. 7 Kəl ja, cha nar ɗa, <Ko hətə huɗu ko yah zərsal. Aka ənga, ngwa sa ɓitir anap ndara sə nda kwa wendə ndə wa, ya ngwa ka səm kala sər həɗə wa, aka zər nga kwa ɗa ka Nazirit fwatə tə pəchir yah nyi tsa'a tə bəjir tə nyi.> >>
8 Ngə Manuwa tə pətlənya nə Tlakəu, cha na, <<Maki Tlakəu, yo gədi ngha, ngyar ndəkə Hyel ngə ka sə ngə shili da ea səkəu, ka cha shili dlədləɓətə ea ənda eo handə zər ngə njo yah nga.>>
9 Hyel tə ngatə pətlənya Manuwa, ngə chama Hyel tə ɓəla shili da mala nda ku bəji nda cha kwa takə ku fa, kəl ja, Manuwa sal nyi da tangnda tsa'a na cha wa. 10 Mala nda tə kusa ga ki nar nyi nə sal nyi, bəra, <<Ndə nda tə chabiya ɗa dzə haaɗa nda shiliti!>>
11 Kəl Manuwa tə hya'atə ga nəu mala nyi. Nda cha yi dza ndə nda ngə cha nar nyi, <<Nakə ngə tə ndər nə mala ɗa ya?>> Ndə cha, <<Ah naya nga.>>
12 Ngə Manuwa tə jau nyi, <<Ma ɓwanya nghə tə nyabiyadza, mi sə inda eo dlədləɓətə nyi nə zər nga? Mi tlər nya?>>
13 Ngə chama Tlakə nda tə wuma, <<Tuku mala nghə mər dəhə sə inda ya nar nyi inda. 14 A da cho səm kala chul sə nda nja mər na yayar anap wa, a da cho sa ɓitir anap ndara mbadla, ndara cha səm kala sər həɗə wa. Tuku cha mər kala sə inda ya nar nyi inda.>> 15 Ngə Manuwa tə nar nyi nə chama Tlakə nda, <<Eo i ka ngya kəl ea tagu nghə zər kua.>> 16 Ngə chama Tlakə tə wuma, <<Mada ya ta'i, a da yo səm sərsum nghə wa. Kəl ja, macha ko ɓatliya sər hatəmachi nə nginda, ba'a ka handa nə Tlakəu.>> Aka Manuwa a da zəndə ənda chama Tlakə nda wa.
17 Ngə Manuwa tə nar nyi nə chama Tlakə nda, <<Wa tləm nghə tsa'aka eo nə nghə səli ma ɓwanya nghə tə ɗa vəlvəla?>>
18 Ngə cha wuma, <<Mya gwa'atə ko jau tləm ɗa? Sər məngəl cha, a da njo nau ngabiya wa.>> 19 Ngə Manuwa tə hətə zər kua, tsa'a na ga'a nə sə uhiuhi, ga handa təmachi nə Tlakə kya tə vanya fafa. Ya kəl ngə Tlakə tə mər sə shinshin, kə'i Manuwa na mala nyi kwa ndzama. 20 Nda kyara hu'u kwa təra shi huɗamələ hya'atə tə dzəgana nda, ngə chama Tlakə nda tə təra shi huɗamələm ku kyara hu'u nda. Nda Manuwa ana mala nyi tə la'a ənga, nda uzhi səya hu'i ana huɗəma nda hu'i. 21 Manda a chama Tlakə nda da ɓəla chabiya kərnyi nə Manuwa ana mala nyi wa, ngə Manuwa tə ngabiya ənda chama Tlakə nda.
22 Ngə cha na, <<Vəlvəl mo kuɗa, aka ma la'a Hyel!>> 23 Kəl ja, mala nyi tə wuma, <<Macha Tlakə i tə cha kuɗənda ma, a da cho nda dləu hatəmachi nə nginda ana ga'a nə səuhiuhi ku cha ma, ndara cha char ma dəhə sə ina, ndara cha par ma sə'inə wa.>>