Jefta ana Ifərem
12
1 Kəl njir Ifərem tə tsəmtə ləvaləva kənda, nda dləgəlbiya Dəl Urdən ga yi Zafon, nda nar nyi nə Jefta, <<Mya gwa'atə ka biya ki pah njir Amon a da ka nga ea wa? Yau, eo nginda nghə dəhə ka ki ngha.>>2 Ngə Jefta tə wuma, <<Naya ana nji ɗa tə go pah ɗimiɗimi ka njir Amon, madangə a nga hi tə ya, a da hya nau dləuya ɗa ku cha nda wa. 3 Nda ya la'a a da hyo vala ɗa wa, ngə ya sənda pya ya ga dləgəlbiya biya pah njir Amon, ngə Tlakə tə mərtə ya kura nda. Sakanə ya, mya gwa'atə hya shili ka pah ɗa ənya?>>
4 Kəl ngə Jefta tə nga njir Giliyad nda shili pah njir Ifərem. Ngə njir Giliyad tə kura nda aka njir Ifərem tə na, <<Nahi njir Giliyad njir tabwal hi ku hə'i Ifərem ana Manasa.>> 5 Njir Giliyad tə kwasə mbwa inda njir Ifərem kwa dləgəl dəl Urdən ti, kala bəji nda ndər Ifərem nda tə mbəɗə tə na, <<Əngwa ya dləgəlbiya biya,>> kəl njir Giliyad kwa jau nyi, <<Ndər Ifərem kə ya?>> Macha wum ga na <<A'a,>> 6 ndo na, <<Yau, na <Shibbolet.> >> Ma cha na, <<Sibbolet,>> aka a da cho nau nabiya tsa'atsa'a wa, ndo səya nyi ba'a tsəya nyi biya tə lakur gu Urdən nda. Njir Ifərem 42,000 nja tsəya ku bəji nda.
7 Jefta tə nəu na njir Isra'ila fa kwah. Ngə Jefta ndər Giliyad tə tah, ngə nja haɗiya nyi ku vanya mələm vu Giliyad.
Ibzan, Elon ana Abdon
8 Ahir Jefta tə tah, Ibzan ndər Baitalami tə nəu na njir Isra'ila. 9 Nguli shili nyi makərkumnyi ana ku'imahi'i nyi makərkumnyi. Cha ɗəunda ku'i nyi nə nji inda pa'a ku nyavi nyi, cha həbiya nyi ku'imahi'i makərkumnyi hya'atə ku nyavi alenya nji tsə'u nə nguli shili nyi inda ka mahi'i kənda. Ibzan tə nəu na njir Isra'ila fa məɗəfa. 10 Ngə Ibzan tə tah, nja haɗiya nyi vu Baitalami.
11 Ahir Ibzan tə tah, Elon ndər Zebulun tə nəu na njir Isra'ila fa kuma. 12 Ngə Elon tə tah, ngə nja haɗiya nyi tə hə'i Zebulun.
13 Ahir Elon tə tah, Abdon zər Hillel hya'atə vu Piraton, tə nəu na njir Isra'ila. 14 Nguli shili nyi fwaɗəkumnyi ana aji makərkumnyi, kwara inda ndo dlə məɗəfəkumnyi. Cha nəu na njir Isra'ila fa chisəu. 15 Ngə Abdon zər Hillel tə tah, ngə nja haɗiya nyi vu Piraton ku hə'i Ifərem, a ku hə'i nda kya tə dəgəl nə njir Amalek.