11
1 Vanya ndə da na tləm nyi Jefta, ndər nau pa cha. Tləmər Ada nyi Giliyad, ama nyi tsə'u zawar. 2 Mala Giliyad tə yiyah nyi nguli shili, nda nda həa ngə nda gədlənda Jefta, nda na, <<A da ko fa'aki na kala sər adan ea wa, aka zər zawar ka.>> 3 Ngə Jefta tə hwi tanyi ga yi ngya vu Tob, tangnda dzuk nji pəla'apəla'a tə tsəmtə dzə ga nəu nyi.4 Səkardzə kushiu, nda njir Amon tə ghəya pah njir Isra'ila, 5 ngə njirawawa'a nə Giliyad tə ma'i ka nda ki ɓəlandə Jefta hya'atə vu Tob. 6 Nda nar nyi, <<Anda ka ɗa ka gavərma kəea, məna pah njir Amon.>>
7 Ngə Jefta tə nar nda, <<A da nahi nda tə ngya ɗa ga gədləbiya ɗa tsa ki ada ɗa ma? Mya gwa'atə kəl nda hya gu ɓwaɓwatə hyo dzugwa shili da ya?>>
8 Ngə njirawawa'a nə Giliyad inda tə nar nyi, <<Kəpal da wa, a ɓəl tə ea shili da kə sakana. Anda da ea mən ki pah njir Amon, ya ko ɗa ka gavərma təkəra dəhə nji inda na ngya vu Giliyad.>>
9 Ngə Jefta tə wuma, <<Ma ya ɓəl kə'i hi ga ki pah njir Amon ngə Tlakə tə na'a nda, vəlvəl ja yo ɗa ka gavərma kəhya?>>
10 Ngə njirawawa'a nə Giliyad tə wuma, <<Tlakə ngə tauli kəea, eo mər wi sə nda ka na.>> 11 Ngə Jefta tə təra kə'i njirawawa'a Giliyad inda, ngə nji inda tə fiya nyi ka gavərma ana ndər nəu na pah kənda. A vu Mispa a huɗə Tlakəu, Jefta tə ɓəla dəkə ɓwanya inda səkəu.
12 Kəl ngə Jefta tə sə changhabal ya da təl Amon na jawa, <<Mi tə pama mən nda tə gwa'atə hya shili pah hə'i kəea?>>
13 Ngə təl Amon tə wum nə changhabal Jefta inda ga na, <<Nda njir Isra'ila tə zəbiya vu Masar, nda dləuya hə'i ɗa fwatə vu Arnon tsa'a vu Jabbok, tsa'a nya Urdən, sakan ɓəlandə ɗa ma hə'i ɗa ku nyahəba.>>
<<Njir Isra'ila da dləuya hə'i Mowab ndara hə'i njir Amon wa. 16 Kəl ja, nda nda zəbiya vu Masar, njir Isra'ila tə nəu tahə dadil takəu gwa nya Fa'a Dəzəu ga yi Kadesh. 17 Ngə njir Isra'ila tə sə changhabal ya da təl Edom, cha na, <Nəea laku ea tərabiya tahə hə'i ngha,> kəl ja, təl Edom da səhimi wa. Ətsəu, nda sə yada təl Mowab ka nda tərabiya tahə hə'i nyi, ngə cha ngyari. Aka ənga njir Isra'ila tə ngya vu Kadesh.>>
18 <<Ahir nga, nda ma'i tahə dadil takəu, nda zhuli ga ɓandə hə'i Edom ana Mowab, nda tərabiya təwa zədərpəchi nə hə'i Mowab, ga ngya təwa vanya badlarma Arnon. A da nda gwa ku hə'i Mowab wa, aka Arnon ngə ɓəlkənyi.>>
19 <<Ngə njir Isra'ila tə sə changhabal ya da Sihon təl njir Amori, nda kwa mər təlkur vu Heshbon, ga nar nyi, <Əngwa ea tərabiya tahə hə'i nghə ya tə hə'i kəea.> 20 Kəl ja, Sihon da dləukər njir Isra'ila tərabiya tahə hə'i nyi wa. Cha tsəmtə dəhə nji nyi vu Jahaz ga pah njir Isra'ila.>>
21 <<Ngə Tlakəu, Hyel njir Isra'ila, tə nə nyi Sihon ana dəhə nji nyi nə njir Isra'ila ku cha nda, ngə nda kura nda. Njir Isra'ila tə dləuya dəhə hə'i njir Amori inda na ngya tə hə'i nda, 22 nda dləuya hə'i nda dəhəu, fwatə vu Arnon tsa'a nya Urdən.>>
23 <<Sakana mana Tlakəu, Hyel njir Isra'ila gədlənda tə njir Amori biyamar nji nyi Isra'ila ya, ko har wi ko nau dləuya tsa ea ya? 24 A da ko hətə sə nda Kemosh hyel nghə tə nə nghə ma? Əngə tsə'u dəhə sə nda Hyel Tlakən ea tə nə ea, eo fiya ka nə kəea. 25 Bəliya nakə tsa Balak zər Zipor təl Mowab ya? Taa cha kəpal ka njir Isra'ila ndara cha pah kə'i nda ya? 26 Fa 300 njir Isra'ila tə ngya səkənda vu Heshbon, Arower ana mələm shiɗədə inda tə ɓandi, ana mələm inda nya Dəl Arnon. Mya gwa'atə a da hya dləuya ku bəji nda wa? 27 A da ya zandə hi sə wa, kəl ja, janə ko zandə ɗa sə təwa pah ɗa. Ga Tlakə ndər nəuma, cha tlanda nəuma ənya ku pama njir Isra'ila ana njir Amori.>>
28 Kəl ja, təl Amon da səhimi da mafakə nda Jefta tə sətə nyi nda wa.
29 Kəl ngə Shanguɗə Tlakə tə səya təkəra Jefta. Cha dləgəlbiya Giliyad ana Manasa, ga tərabiya tahə Mispa nə Giliyad, hya'atə tangnda tsə'u cha təra ya kəra njir Amon. 30 Ngə Jefta tə səmda nyi fəla nə Tlakəu, cha na, <<Ma ka mərtə ya kura njir Amon, 31 kala sə nda zəbiya tangərma ku ki ɗa ka cha lali ɗa ku bəji nda yo ɓəl shili hya'atə tə mbwar pah ku hirgyaɗi nə kura, kwa ɗa nə Tlakəu, ya yo handa təmachi nə nginda ni.>>
32 Kəl ngə Jefta tə biya ka ki pah njir Amon, ngə Tlakə tə mərtə cha kura nda. 33 Cha kuɗənda nji ku mələm 20 fwatə vu Arower tsa'a ku ɓəlkər Minit, bətə yi Abel Keramin. Əngə njir Isra'ila tə kura njir Amon.
34 Nda Jefta tə ɓəl yo mələm nyi vu Mispa, ndə nda ghəya zəbiya ku ki nyi tangərma ka lali nyi nacha ngə kwa nyi, cho utsə cho tsa tamborin, nacha ngə wur zər nda tsa cha. Matsa kwa nda vanya zərsal ndara kwamalakə da tsa cha wa. 35 Nda cha la'a nyi, ngə cha tanda lukutə dzə nyi ga səya ləla, <<Kwawu! Kwa ɗa! A fəu ɗa təkə ku huɗatla ɗimiɗimi, aka a səmnda tə ya fəla nə Tlakə nda a yo nau ɓəliya wa.>>
36 Ngə cha ɓəlakə nyi, <<Ada! A wurtə ka səmnda nyi fəla nə Tlakəu. Mərtə ɗa wi sə nda ka mər alkawal, mana Tlakə mərtə tə ka kibiya ɗimikur nda nja mərtə nghə tə njir Amon, njir dawa ngha. 37 Kəl ja, yo gədi nghə sə zhang,>> cha na, <<Na'a hya mətlə ya təra gya tə dəgəl ya gi mər sə'ingu kə'i bazhiɗa, aka yo tə kəla ɗəuwa.>>