Tola tə ɗa ka Təl
10
1 Ahir tər Abimelek, kəl Tola zər Puwa, zər Dodo hya'atə ku nyavi Isaka, tə hya'atə ka cha dləuya njir Isra'ila. Cha ngya vu Shamir, tə hə'i nda tə dəgəl nə Ifərem. 2 Cha nəu na njir Isra'ila fa mətləkumnyi parnya makərəu, ngə cha tah, nja haɗəya nyi vu Shamir.Ja'ir tə ɗa ka Təl
3 Ahir Tola kəl Ja'ir ndər Giliyad, nda tə nəu na njir Isra'ila fa mətləkumnyi parnya mətləu. 4 Nguli shili nyi makərkumnyi, kala ndə kwa dlə kwara nyi. Ndo gəla mələm makərkumnyi tə hə'i Giliyad, inda njo nga Havot Ja'ir ba'a ənya. 5 Nda Ja'ir tə tah, nja haɗəya nyi vu Kamon.
Jefta
6 Njir Isra'ila tə ɓəla mər sə ɗimi tə lya Tlakəu. Nda həsəli nə Ba'al ana Ashtoret, ana katə njir Aram, katə njir Sidon, katə njir Mowab, katə njir Amon ana katə njir Filisti. Aka njir Isra'ila tə ngyar nəu nya Tlakəu, ga ngyar həsəli nə nyi. 7 Ngə huɗa Tlakə tə tla na nda, ngə cha ngyar njir Filisti ana njir Amon tə kura nda. 8 Ku fa nda cha wendə nda ga nə nyi ɓwaɓwatə nə njir Isra'ila inda təwa zədər pəchi nə Urdən ku Giliyad, hə'i njir Amori 9 Njir Amon tsə'u tə dləgəlbiya Urdən ka pah njir Yahuda, Banyami ana Ifərem, njir Isra'ila tə gwa ku ɓwaɓwatə gagaɗa. 10 Ngə njir Isra'ila tə tiwi nə Tlakəu nda na, <<A mərtə nghə tə ea səpəla'a, aka ea ngyar nəu Hyel eo həsəli nə Ba'al i'i.>>
11 Ngə Tlakə wum ga na, <<Nda njir Masar, njir Amori, njir Amon, njir Filisti, 12 njir Sidon, njir Amalek ana njir Mowab tə nə hi ɓwaɓwatəu, ya ngə hya tiwi na'a ka vala ya, a da ya dləuya hi ku cha nda ma? 13 Kəl ja, hya ngya ɗa ga həsəli nə alenya hyel, aka ənga a tsə'u yo dləuya hi wa. 14 Təra ma hya ki tiwi nə katə inda hya tabiya nda, ga nda dləuya hi ma hya gu ɓwaɓwatəu!>>
15 Kəl ja, njir Isra'ila tə nar nyi nə Tlakəu, <<A mərtə ea səpəla'a, mər dəhə sə nda ko i na ea, kəl ja, maki dləuya ea sakana.>> 16 Kəl ngə nda uchinda katə inda ga həsəli nə Tlakəu. Ngə Tlakə tə ɓəla go ɗəngha na ɓwaɓwatə nda njir Isra'ila kwa sa.