Abimelek
9
1 Abimelek zər Gidion tə təra yi Shekem ya kə njikə ama nyi, ga nar nda, 2 <<Jawar ma dəhə njirawawa'a Shekem, <Manə nga ndiya ɗa mənakə nə hya, nguli shili Jerubba'al dəhə məɗəfəkumnyi ɗa ka təl kəhi zəma, aa ndə zhang?> Hya ɗənghati, mashi kəhi ya.>>3 Ngə njikə ama nyi tə nar nyi ɓwanya nda cha pə nda nə njirawawa'a Shekem, ngə ɗufwa nda tə hətə Abimelek, aka nda na, <<Zamən ea nga.>> 4 Nda nə nyi shekel azurfa məɗəfəkumnyi hya'atə ku vi katə Ba'al-Berit, ngə Abimelek tə kinda njir tabwal nə ka nda nəu nyi. 5 Ngə cha yo ki ada nyi Jerubba'al ga yi kuɗənda zamə nyi inda məɗəfəkumnyi inda. Kəl nda Jotam adahir Jerubba'al tə mbəɗa, aka cha mbutanyi. 6 Kəl dəhə njirawawa'a Shekem ana njir Betmilo tə tsəmətədzə da kiɗa wu dəgaləu a dza shimbal a vu Shekem ka nda mbanda nyi kər nə Abimelek ka təl.
7 Nda Jotam tə ngatə ənga, ngə cha təra gyo kəra mə Gerizim ga nar nda na kurakə dzəgamdzəgaməu, <<Siyama himi da ya njir Shekem, tsa'aka Hyel kwa səhimi da hi. 8 Vanya pəchi wu i'i tə tsəmtə dzə ka nda dzəviya təl ka kərnənda. Nda nar nyi nə wur zaitun, <Ɗa ka təl kəea.>
9 <<Kəl ja, wur zaitun nda tə wuma, <Ya ngyar mal ɗa nda nacha njo həsəli nə katə i'i ana nji, ga ya təra ya ki mər təlkur təkəra alenya wu i'i ja?>
10 <<Kəl ngə wu inda tə nar nyi nə wur kanda, <Anda ka ɗa ka təl kəea.>
11 <<Kəl ja, wur kanda tə wuma, <Ya ngyar yah nguli gumaguma ya məsəɗakə na, ya ki mər təlkur təkəra alenya wu i'i ja?>
12 <<Kəl ngə wu inda tə nar nyi nə wur anap, <Anda ka ɗa ka təl kəea.>
13 <<Kəl ja, wur anap tə wuma, <Ya ngyar ɓitir anap ɗa, nda kwa nə nyi hirgyaɗi nə katə i'i ana nji, ya ki mər təlkur təkəra alenya wu i'i ja?>
14 <<A tə bata, ngə dəhə wu tə nar nyi nə wur shikəɗi, <Anda ka ɗa ka təl kəea.>
15 <<Ngə wur shikəɗi tə nar nyi nə wu inda, <Macha hyo gwa'a hya dzəviya ɗa ka təl kəhi, anda ma hya uya mbwar mbu da kiɗa shanguɗa ɗa, macha a da əngə wa, əngwa hu'u zəbiya ku lya wur shikəɗi cha nginda wu inda vu Lebanan.> >>
16 Ahir nga, Jotam tə biyama na ɓwanya cha na, <<Sakanə ja ya, ana ta zhang ngə hya mbanda nyi kər nə Abimelek ka təl kəhya? Sə mənakə ngə hya mərtə nyi nə Jerubba'al kə'i njir ki nyi ja? Nacha ngə wazəbar tlər nyi nda tsa'atsa'a na cha ja? 17 Hya ɗənghatə ənda ada ɗa tə pah tiya hi. Cha sənda pya cha ka cha dləuya hi ku cha njir Midiyan. 18 Kəl ja, ngə hya sha hyo mər dawa na njir ki ada ɗa, hya kuɗənda nguli shili nyi məɗəfəkumnyi kyo kəra mə zhang, ga mbanda nyi kər nə Abimelek zər kwatəra nyi cha ɗa ka təl təkəra njir Shekem aka cha zamən hi. 19 Macha a nda tə hya mərtə nyi mənakəkur nə Jerubba'al ana njir ki nyi ənya, kəl ba'a hya mər hirgyaɗi na Abimelek, ətsəu hya gwa'atə cha ɗa na hirgyaɗi. 20 Kəl ja, macha a da əngə wa, əngwa hu'u hya'atə tsa Abimelek nginda cha njir Shekem ana njir Betmilo, ətsəu hu'u hya'atə tsa njir Shekem ana njir Betmilo cha nginda Abimelek.>>
21 Ahir Jotam tə wurandə ɓwanya inga, ngə cha hwi tanyi yi Biyer, ga yi ngyata nyi hinda, aka cho ləvər Abimelek zamə nyi.
22 Ahir Abimelek tə səm təlkur fa makərəu, 23 Hyel tə gwa'atə dawa tə gwa ku pama Abimelek ana njir Shekem, kəl njir shekem tə tliya nyi mwali nə Abimelek. 24 Hyel tə mər ənga ga nja kisəkur nguli Jerubba'al məɗəfəkumnyi inda nja kuɗənda inda, a tə Abimelek zamən nda ana njir Shekem inda tə vala nyi na kuɗə zamə nyi inda. 25 Aka dawa nda njir Shekem kwa mər na Abimelek, nda ɗəmtsə nji aka ga nda mbuya nyi laku nə Abimelek a kyo kəra dəgəl, nda fa'aya kala nji inda tərabiya banda, ngə nja yi nar nyi nə Abimelek.
26 Ngə Ga'al zər Ebed ana njir ki nyi tə təra yi Shekem, njir Shekem tsə'u tə dləukər na cha. 27 Nda təra kyo fa kənda i'i ka ɗəm anap ka nda ɓatlə ɓitir anapəu, nda mər ladər ku vi katə kənda. Nda səm ga sa, ndo ngəl Abimelek. 28 Ngə Ga'al zər Ebed tə na, <<Wa ngə Abimelek nga, nda tsa'aka kwa səm təlkur təkəra mən, namən njir Shekema? A da zər Jerubba'al ngə ma? A zebul ngə ndər vala nyi ma? Ka mi məno ɗa kəriwa nənya? Ɗa ma kəriwa nə jival kəhi Hamor, nacha nda tə dzuguya mələm kəmən. 29 Ma tə nda ɗa bəra naya nə gavərma nji ina, yo həbəya nyi ku təlkur, yo nar nyi nə Abimelek, <Tsəmtə dəhəkura ləvaləva ngha!> >>
30 Nda Zebul ngwamna mələm tə ngatə sə nda Ga'al zər Ebed tə na, huɗa cha tla gagaɗa. 31 Ngə cha sə nji ya da Abimelek tə ɗəwa, cha na, <<Janə Ga'al zər Ebed kə'i zamə nyi shili tə ku mələm ndo gwazhi kəra nji ka nda tliya nghə mwali. 32 Sakanə ja, naka ana nji nghə hya mbuya nda mwabu ku fa ingə vu'i. 33 Əmbudla ma pəchi kwa zədi, hya gwa dla'a mələm nda. Ma Ga'al kə'i nji nyi tə zəbiya ka pah ngha, kəl ba'a ka mərtə nda kala sə nda ko i ka mərtə nda.>>
34 Kəl Abimelek ana dəhə ləvaləva nyi tə biya vu'i nda, nda təkəbiya dzə ka dzuk ka dzuku ga mbuta nda ku sar fa ləhə dza Shekem. 35 Ga'al zər Ebed tsə'u tə biya ga ta'itanyi tə lakur gu ta mələm tsa'a na Abimelek kə'i ləvaləva nyi kwa zəbiya ku mbwar mbu kənda.
36 Nda Ga'al tə la'a nyi ngə cha nar nyi nə Zebul, <<La'a, jangə nji kwa səya kyo kəra məa!>> Ngə Zebul tə na, <<Lyakə ngo la'a wi nji, shanguɗa mə tanyi inga.>>
37 Kəl ja, Ga'al tə ɓəla ɓwanya ga na, <<La'a, jangə nji kwa səya kyo məa, janə vanya dzuku tsə'u kwa shili tahə təwa wur oak nə njir tsakəza.>>
38 Ngə Zebul tə nar nyi, <<Amanə ɓwanya bukər nda ka pə bəra, <Wa ngə Abimelek tsa'aka səm təlkur təkəra mən nda?> A nji inə nda ka həyatə ma? Ma'i ka biya pah nda ja!>>
39 Kəl ngə Ga'al tə nəu na njir Shekem nda biya pah Abimelek. 40 Abimelek tə gədlə nda, Ga'al tə hwi tanyi, ngə Abimelek tə nəu nyi biya nya lakur gu mələm, nji ɗang tə takasa. 41 Abimelek tə ngya vu Aruma, Zebul tsə'u tə gədlənda Ga'al kə'i zamə nyi ku Shekem.
42 Vanya zəkəu njir Shekem tə biya ga təra kyo fa kənda i'i, ngə nja nar nyi nə Abimelek. 43 Nacha tsə'u cha tsəmtə nji nyi ga təkəbiya nda ka dzuku makəu ga mbuya nda mwabu ku fa i'i. Nda cho la'a nji kwa zəbiya ku mələm, ngə cha zəbiya ka dla'a nda. 44 Abimelek ka dzuku inda kə'i cha tə kusa ga yi ta'ita nda nya lakur gu ta mələm. Kəl dzuku mətlə tə kusa təra ya kəra nji inda ku fa inda ga kuɗənda nda. 45 Abimelek tə pah pa'apəchi ga kwasə mələm nda ga kuɗənda njir mələm. Ngə cha nginda mələm nda ga wiɗənda wunə ti.
46 Nda nda ngatə ənga, ngə njirawawa'a inda na ngya ku jigəɗə inda vu Shekem tə təra na hwi gyo kəra jigəɗə nə mbwa'alə Elberit. 47 Nda Abimelek tə ngatə ənda njirawawa'a Shekem tsəmtə tə dzə tə mbwar zhang, 48 ngə cha təra gyo Mə Zalmon. Cha hətə kəm ga gəgatsə cha wua, ga dlakətə da wulya cha. Ngə cha nar nyi nə nji inda kə'i cha nda, <<Kusa ma hya mər sə nə hya la'a ya mər na.>> 49 Kəl dəhə nji inda tə gəgatsə cha wu ga nəu Abimelek. Ngə nda yi ɓundzə nyi nə bangu jigəɗə nda ga handzə nyi hu'u dəhə ka nji inda ku nda. Dəhə nji inda ku jigəɗə nə Shekem nda, kwa ɗa nji 1,000 shili ka mahi'i tə kuɗa.
50 Kəl ngə Abimelek tə təra yi ga yi ɓandə Tebez, ga kwasa. 51 Vanya jigəɗə da ku ta mələm nda nda nja hərtə ɓaɓaləu, ngə dəhə njir mələm nda shili ka mahi'i tə təra na hwi ya kwa. Nda haɗəndan nyavi təkəra kərnənda ga tərata nda gyo kəra jigəɗə nda. 52 Abimelek tə yi dza jigəɗə nda ga gwa'a cha gwa. Kəl ja, cha təra yi nya nyacha ka ga cha hakəu hu'u, 53 ngə vanya mala tə səu mangu ha'a ku kəra cha, ngə kəra cha tə huɓwa.
54 Ngə cha kusa nga zər tlakala nda kwa hə kar pah nə nyi, ga nar nyi, <<Tsəbiya katsakər nghə ka tsəya ɗa, tsa nda da na ənda, <Malakə nga tsəya ɗa.> >> Ngə tlakala nda dzavəu nyi katsakər nda ku ta cha, ngə cha tah. 55 Nda njir Isra'ila tə la'a Abimelek tə ti, ngə nda ɓəl kyo ki.