Zeba ana Zalmuna
8
1 Ngə nyandəla Ifərem tə jau Gidion, <<Mi nə ka mərtə ea əna? Mya gwa'atə a da ka nga ea nda ko təra ki pah ka njir Midiyan wa?>> Nda tsə Gidion 'ual'ualəu.2 Kəl ja, cha wum nə nda ga na, <<Mi ya mər ndiya matsa hya? A anap vaɗəvaɗə nə Ifərem da ndiya pa'akura fa anap Abiyezer ma? 3 Hyel tə gwa'atə hya kura Oreb ana Zip njirawawa'a njir Midiyan, mi ya mərtə ndiya nəkəhya?>> Nda Gidion tə par nda ɓwanya nga, ngə a huɗa nda zha tla wa.
4 Gidion ana nji 300 inda, madangə həɗa tə nda, nda biyama na gədlə njir Midiyan, tsa'a biya tiya Urdən. 5 Cha nar nyi nə njir Sukot, <<Nə nyi ma sərsum nə nji ɗa ina, aka a həɗa tə nda, ya tsə'u ta ea kwa gədlə ka Zeba ana Zalmuna, təl i'i nə njir Midiyan.>>
6 Kəl ja, njirawawa'a nə Sukot tə na, <<A hya taa səya ka Zeba ana Zalmuna wa, mya gwa'atə eo nə hi sərsuma?>>
7 Ngə Gidion tə wuma, <<Macha ənga, ma Tlakə tə mərtə ea kura Zeba ana Zalmuna, yo shili tətanda dza hi na wuɗa shikəɗi takəu.>>
8 Hya'atə tangnda cha təra yi Peniel ga yi gədi nda wi nda cha gədi njir Sukot nda, kəl ja, nda wuma wi nda njir Sukot tə wum nda. 9 Ngə cha nar nyi nə njir Peniel, <<Ahir ya kura ga ɓəl shili, yo shili dlanda jigəɗə na.>>
10 Nda ka Zeba ana Zalmuna yi Karkor dəhə kə'i ləvaləva kənda kwa ɗa 15,000, na nda ngə ləvaləva inda təwa zədərpəchi inda tə həyadza. A kuɗənda tə nji ləvaləva kwa ɗa 120,000. 11 Gidion tə nəu təwa laku dadil takə nda təwa zədərpəchi nə Noba ana Jogbeha, cha ghahəya ləvaləva njir Midiyan na pah. 12 Təl njir Midiyan inda, Zeba ana Zalmuna tə hwita nda, kəl ja, cha nəu nda ga səya nda dəhə nda kə'i ləvaləva kənda.
13 Ngə Gidion zər Jowash tə shili hya'atə tə mbwar pah, təwa lakur gwa nda njo nga Heres. 14 Gidion tə səya zər tlakala vu Sukot ga jau nyi, ngə zər tlakala nda tə tsəfəbiya nyi tləmər ka təl ka təl ana njirawawa'a Sukot məɗəfəkumnyi parnya məɗəfa. 15 Ngə Gidion tə shili da njir Sukot ga nar nda, <<Ja'inə kə'i Zeba ana Zalmuna nda hya pə ɓwanya həyatəvi na'a təkəra nda bəra, <A səya tə kə Zeba ana Zalmuna ya? Mya gwa'atə eo nə nyi sərsum nə nji həɗahəɗa nghə ina?> >> 16 Ngə cha səya njirawawa'a Sukot ga tlatə nda wuɗa shikəɗi takəu. 17 Cha huɓənda jigəɗə Peniel tsə'u ga kuɗənda shili mələm nda.
18 Ngə cha jau kə'i Zeba ana Zalmuna, <<Chul nji manə hya kuɗənda vu Tabora?>> Ngə nda wuma, <<Nji pabiya ngha, dəhə nda wi nguli təl.>>
19 Ngə Gidion tə wuma, <<Ka zamə ɗa inga, nguli ama ɗa. Səmnda tiya fəla na Tlakə nda na pi, macha nda tə hya ngya nda na pi, a yo kuɗənda hi wa.>> 20 Ngə cha sha ya kəra Jeter zə'ualə nyi ga na, <<Kuɗənda nda!>> Kəl ja, Jeter da tsəbiya katsakər nyi wa, aka zər cha ya cho ləvəra.
21 Ngə Zeba ana Zalmuna tə na, <<Anda, shili ka kuɗənda ea təkərngha, aka wi nda ndəu, əngə dunama nyi.>> Ngə Gidion tə hya'atə ga kuɗənda nda, ga fa'aya kar ɓatlə inda tə wulya dləgwam kənda i'i.
Efod nə Gidion
22 Njir Isra'ila tə nar nyi nə Gidion, <<Ɗa ka təl kəea, naka ana nyandəlaka, aka ka dləuya ea ku cha njir Midiyan.>>
23 Ngə Gidion tə nar nda, <<A yo ɗa ka təl kəhi wa, ya nguli ɗa do ɗa ka təl kəhi wa. Tlakə ngə kwa ɗa ka təl kəhi.>> 24 Cha na tsəu, <<Sə zhang tanyi yo gədi tsa hi, kala ndə cha na'a sər ha ku himi ku kwazhalɓi nda hya fa'aya.>> (Sər ha ku himi nə bəjingha, sər jival njir Midiyan nga.)
25 Ngə nda wuma, <<Vəlvəl eo nə ngha.>> Ngə nda səya sərtul kənda, kala ndə tə uchətə sər ha ku himi nda cha uya ku kwazhalɓi nyi, tə sər tul nda. 26 Tədəɓukura sər ha ku himi inda cha gədi nda kwa ɗa shekel 1,700, a da nja jiga kar ɓatla, sər ha da wulya, ka ləkutə lipəlalipəla inda ka təl ka təl nə Midiyan kwa ha, ndara sər ha tə wulya dləgwam kənda inda wa. 27 Gidion tə ɓatlətə katə na bəjingha ga fiya ku mələm nyi, Ofra. Dəhə njir Isra'ila tə ngyar nəu Hyel, ga təra yi nda ka həsəli nə katə nda. Sə ngə tə ɗa ka ləbam nə njir ki Gidion.
Tər Gidion
28 Ənga, njir Isra'ila tə kura njir Midiyan, a da nda zhaka har kər ka pah njir Isra'ila wa. Ku bəji nda Gidion na pi, hə'i nda tə ɗa na piyarɗufəu fa fwaɗəkumnyi.
29 Gidion zər Jowash tə ɓəl ya tə hə'i nyi ga yi ngya. 30 Nguli shili kərnyi məɗəfəkumnyi, aka mahi'i nyi ɗanghəu. 31 Kwatəra nyi nda na ngya vu Shekem tsə'u tə yiyah nyi zərsal, cha fəndzə nyi tləm Abimelek. 32 Gidion zər Jowash tə tah ku hal gumaguma, ngə nja haɗəya nyi ku hu ada nyi Jowash a vu Ofra nə nyandəla Abiyezer.
33 Nda Gidion tə tah, ngə njir Isra'ila tə ngyar nəu Hyel ga həsəli nə Ba'al. Nda ɓatlətə Ba'al Berit tə ɗa ka hyel kənda. 34 Nda ngyar həsəli nə Hyel nda tə dləuya nda ku cha njir dawa kənda inda tə ɓandə nda. 35 Ətsəu, madangə Gidion mərtə nda tə mənakəkur, nda ngyar mərtə nyi mənakəkur nə njir ki nyi.