Gidion tə Kura Njir Midiyan
7
1 Tsəɗakə mbudla, Jerubba'al nacha ngə Gidion ana dəhə nji inda kə'i cha tə ngya dzər tsədzəɗər ɓiti Harod. Njir Midiyan tə ngya təwa vwa nə mbwa nda nda ngya tə nda aku dakə ləhə dza dəgəl More. 2 Ngə Tlakə tə nar nyi nə Gidion, <<Nji ɗatə ɗang tsa ka, nda ma ya mərtə hya kura njir Midiyan, njir Isra'ila kwa nda bu kərnənda ənda ana dunamar kərnənda ngə nda kura njir dawa kənda. 3 Bəzəya nyi nə nji, <Kala ndə nda dza cha kwa tsamətlaɗə na ləvəra, cha ɓəl kyo ki.> >> Kəl nji 22,000 tə ɓələu, ngə nji 10,000 tə həyadza.4 Kəl ja Tlakə tə nar nyi nə Gidion, <<Ba'asaka nga nji ingə ɗatə ɗanghəu, ma'i na nda gwa nya ɓiti ya gwa ɗəmtsə nghə nji inda kwa ma'i kə'i ka. Ma ya na, <nji inənnə kwa ma'i kə'i ka,> nanda ngo ma'i, ma ya na, <nji inənnə do ma'i kə'i kə wa,> a da ndo ma'i wa.>>
5 Kəl ngə Gidion tə ma'i na nda gwa nya ɓiti. Ku nda ngə Tlakə tə nar nyi, <<Ɗəmbiya nji inda tə gətsə ɓiti na cha nda ga gi naɗə na kyara nda wi həya, ku huɗa nji inda tə uzhi ga mbutə nya nda tə ɓiti.>> 6 Nji 300 tə gətsə ɓiti ku cha nda ga sa. Dəhə həyadzər nji inda tə uzhi tə undya nda ka sa ɓiti.
7 Ngə Tlakə tə nar nyi nə Gidion, <<Ana nji 300 ingə tə sa ɓiti na cha nda inga, yo dləuya hi ba'a nə hi njir Midiyan ku cha hi. Ngyar alenya nji ingə nda təra sho ki kənda.>> 8 Ngə Gideon tə səu həyadzər njir Isra'ila ku laku kyo madləɓa kənda, kəl ja, nji 300 inda gəziya nda sərsum kənda ka papam kənda i'i.
Mbwar tsəmdzə njir Midiyan tsə'u səya man nda ku dakəu. 9 Aku vu'i nda tlakə tə nar nyi nə Gidion, <<Hya'atə ka yi pah njir Midiyan inga, aka yo nə nghə nda ku cha ka. 10 Macha ləvər kwa tə nghə tsa pah nda, ma'i səyo huɗa nda naka ana kadakaliya nghə Purah 11 hya səya himi da sənda nda kwa pəa. Ahir nga, hyo uya dunamar pah nda.>> Kəl Gidion ana kadakaliya nyi Purah tə təra səya tə mbwa nda nji inda tə tsəmtə dzə ti. 12 Njir Midiyan, Amalek, ana dəhə alenya nji inda təwa zədər pəchi kəl ləkələkə kura nda ku dakə nda wi ndzəkwa. Dləgwam kənda wi shishi'ua nya dəl, a nji do nau jigabiya wa.
13 Nda Gidion tə shili, kəl cha ngatə vanya ndə kwa dəkə shi'uni nyi nə bazhi nyi. Cha na, <<Ya shi'uni ənda gwazhilakə langlang tə təɗə səya ku pama mən ku mbwar tsəmdzə njir Midiyan, tə shili dəgə madləɓa na dunama ngə madləɓa nda tə dla ghərizhiu.>>
14 Ngə bazhi nyi nda tə ɓəlakə nyi, <<A vanya sə da shi'uni ngə təkər matsa katsakər Gidion zər Jowash ndər Isra'ila wa. Hyel nə nyi tə njir Midiyan ana dəhə ləvaləva kənda ku cha cha.>>
15 Nda Gidion tə ngatə shi'uni nda ana sə nda cha kari, cha hətə nyi səli nə Tlakəu. Ngə cha ɓəl ya da njir Isra'ila, ngə cha na <<Hya'atə ma! Tlakə nə mən tə njir Midiyan ana dəhə ləvaləva kənda ku cha mən.>> 16 Gidion tə təkəbiya nji 300 inda dzuku makərəu. Cha nə nyi tələm nə kala ndəu, ana giɗa jwajwa ana təkəsəu.
17 Ngə cha na, <<Ndzam ɗa ma, hya mər dəhə sənda yo məra, ma ya yi dzər mbwa nda nda tə nda, dəhə sənda ya məra hya mər wi nda. 18 Ma naya ana nji inda ea kə'iri tə mbəɗiya tələm, nahi ma'a hya mbəɗə nəkəhi mada təwabari, hya na na kurakə banghəu, <Aka Tlakəu ana aka Gidion!> >>
19 Gidion ana nji 100 tə yi dzər mbwa nda nda tə nda adala vu'i, ahir nja bəlatə njir ɓəla. Nda mbəɗiya tələm kənda ga huɓəya təm nda ku cha nda nda. 20 Dzuku makər inda tə mbəɗiya tələm ga huɓəya təm inda ku cha nda nda. Nda gəzəya təkəsə ku matsala nda ga gəzəya tələm nda ndo mbəɗə nda ku chisəma nda. Nda na na kurakə banghəu, <<Katsakər aka Tlakəu ana aka Gidion!>> 21 Kala ndə tə ta'i tangnda cha ti, nda ɓandə mbwa nda nji inda tə nda, dəhə njir Midiyan tə təra na hwi ndo ləla.
22 Nda nda mbəɗiya tələm 300 inda, ngə Tlakə tə gwazhiya kəra njir Midiyan nda ghəya gəga kərnənda na katsakər. Alenya ləvaləva tə təra na hwi yi Zerera ana Bet Shita ləhə dza Tabat. 23 Ngə nda nga njir Isra'ila hya'atə ku nyavi Naftali, Asha, ana Manasa, ngə nda gədlə njir Midiyan. 24 Ngə Gidion tə sə nji kya tə dəhə hə'i dəgəl Ifərem ga na, <<Səya ma hya pah njir Midiyan, hya ɓəla mbwa ingə biyatiya Dəl Urdən ana dlələm tsa'a hi Betbara tsa nda da dləgəlbiya.>>
Ngə nja nga dəhə njir Ifərem nda zəbiya datə lakur go Dəl Urdən dəhə ka nə dlələm i'i, tsa'a vu Betbara. 25 Ətsəu, nda səya njirawawa'a Midiyan mətləu Oreb ana Zip. Ngə nda tsəya Oreb kyo mə Oreb, Zip tsə'u nda tsəya nyi tangnda njo ɓəchi ɓitir anap nə Zip. Nda gədlə njir Midiyan ga shili na kəra ka Oreb na Zip nə Gidion biyatiya Urdən.