Gidion
6
1 Njir Isra'ila tə ɓəla mər sə ɗimi tə lya Tlakəu, ngə cha ngyar njir Midiyan tə kwasə nda fa məɗəfa. 2 Aka njir Midiyan tə ndiya njir Isra'ila na dunama, tə gwa'atə njir Isra'ila tə hwi ga ki gwa'ar mbwar mbua, a mar dəgəl ana ku tləl ana ku ka'u. 3 Dəhə bəji nda njir Isra'ila tə tləka, kəl njir Midiyan, Amalek, ana alenya nya hya'atə təwa zədərpəchi kwa shili pah nda. 4 Ndo maka shili ɓutə dzə tə hə'i nda ba'a səwandə sə zwazwa hə'i nda, gwa tsa'a dza mələm Gaza, ya a da nda ngya nda na sə pipi mada zhang, ndara kətəng, ndara tla ndara kwara, nə njir Isra'ila wa. 5 Aka ndo maka shili na sərshishi kənda i'i ka madləɓa ɗanghə wi ndzəkwa. Dza'u nja nau jigabiya nda ndara dləgwam kənda, kəl ba'a nda səwandə hə'i nda. 6 Njir Midiyan tə mərtə njir Isra'ila tə ɗa na ɗali gagaɗa. Ngə njir Isra'ila tə tiwi nə Tlakəu.7 Nda njir Isra'ila tə tiwi nə Tlakə ka cha vala nda na njir Midiyan, 8 ngə cha sə tə nda ndər mətakər nda tə nar nda, <<Janə sə nda Tlakə tə na, Hyel njir Isra'ila, ya zəbiya na hi vu Masar, zəbiya ku hə'i mavakur. 9 Ya dləuya hi ku cha njir Masar. Ya ngə ya dləuya hi ku cha dəhə nji nda kwa səm təlkur təkəra hi, ya gədlənda nda ga nə hi hə'i kənda. 10 Ya nar hi tsə'u bəra naya ngə Hyel Tlakən hi, a da hyo həsəli nə katə njir Amori nə hi tə hə'i kənda nə wa. Kəl ja, a da hya nəu ɓwanya ɗa wa.>>
11 Chama Tlakə tə səya ngyata nyi tə kiɗa wur Oak nə Jowash ndər Abiyezer a vu Ofra, tangnda zər nyi Gidion kwa pi uhi tə mbu ku mbwar ɓəchə ɓitir anap, tsa njir Midiyan da la'a nyi. 12 Nda Chama Tlakə nda tə chabiyadzə cha na, <<Tlakə tsa'a na ka, sal ka.>>
13 Ngə Gidion tə nar nyi, <<Farbikə ɗa Tlakə ɗa, macha Tlakə tsa'a na ea ya, mya gwa'atə sə'inə kwa ɗa na ea? A ngatə tə ea ənda jival kəea tə nar ea bəra, <Tlakə nda fa'abiya nda zəbiya vu Masar.> Kəl ja sakana Tlakə ngya ea tə ga nənyi ea nə njir Midiyan.>>
14 Ngə Tlakə tə nar nyi, <<Hya'atə na dəhəkura dunama nghə ka dləuya njir Isra'ila ku cha njir Midiyan. Naya nə kwa sə ngha.>>
15 Ngə Gidion tə wum ga na, <<Aman yo ɗana nau dləuya njir Isra'ila? Janə jul kəea ngə kushiu ku nyandəla Manasa, ya naya ngə kushiu ku ki kəea?>>
16 Ngə Tlakə tə wuma, <<Yo nəu na ka, ya ko kuɗənda dəhə njir Midiyan, mada zhang da kwa həyadzə na pi wa.>>
17 Ngə Gidion tə wuma, <<Macha uya tə ya kwambiyakur tə lya ka, char ɗa sə nda kwa gwa'atə yo zəndə ənda təkəɗəu, nakə nə kwa ɓwanya na ya. 18 Maki ngwa ka təra wa, kəl ya shili na sər hatəmachi ga handa təmachi huɗə ngha.>>
Ngə Tlakə tə na, <<Yo səkə kəl ka ɓəl shili.>>
19 Gidion tə təra gu ki, ga gwa tlakənyi wulya təkəra zər kua, cha tagu, ga mərtə gwazhilakə kəla tləlam na upə zhizhi tasau zhang. Cha pəu kum nda ku tsəla, ana ɓitir kum nda ku təm, cha shili ni, nə Tlakə tə kiɗa wur Oak.
20 Ngə chama Hyel tə nar nyi, <<Hətə kum nga ana gwazhilakə kəla tləlam nga, ka fiya ku gwarara, ka pəkər ɓitiɓitinyi.>> Ngə Gidion tə mər ənda. 21 Kəl ngə chama Hyel tə tsəkar kum nda ana gwazhilakə kəla tləlam nda ana zəwa nda ku cha cha nda, kəl hu'u tə biya ku mə nda ga nginda kum nda ana gwazhilakə nda. Kəl ngə chama Hyel nda tə sa tə lya cha. 22 Nda Gidion tə ngabiya ənda chama Hyel nda, ngə cha na, <<Kara naya ja Hyel Tlakə Ndər Gyalkuru! Ba na'a wurti, aka a la'a tə ya chama Tlakə li na li!>>
23 Kəl ja, Tlakə tə nar nyi, <<Piyarɗufu cha ngya tsa'a na ka! Ngwaka da ləvər wa. 24 Ngə Gidion tə hərtə dzəgana nə Tlakə tangnda ga nga mbwa nda Tlakə Ngə Piyarɗufu. Ba'a ənya dzəgana nda tangnda vu Ofra nə nyandəla Abiyezer.>>
25 Əvu'i nda tanyi Tlakə tə nar nyi, <<Hətə mətləkunya gyal tla fa məɗəfə ku dangal ada ngha. Ka huɓənda dzəgana katə Ba'al nə ada nghə nga, ka huhuɓənda katə Ashera ngə ləhə dzər nga. 26 Kəl ba'a ka hərtə dzəgana nda tə ɗa tsa'atsa'a nə Hyel Tlakə ngha a tə dəgəl na. Hətə gyal tla ka handa təmachi ana udzəm katə Ashera nda ka gəganda nda.>>
27 Ngə Gidion tə hətə mavi'i nyi wi nda Tlakə tə nar nyi. Kəl ja, aka cho ləvər njir ki nyi ana njir mələm, a da cha mər puchi wa.
28 Zəbiya mbudla nda nji tə hya'ati, kəl nda la'a a huɓənda tə nji dzəgana Ba'al, ga gəganda udzəm Ashera inda dzər nda, ya janə nja handa tə təmachi na mətləkunya gyal tla nda Gidion tə səya ku dangal ada nyi nda tə dzəgana nda.
29 Ngə nda jau kərnənda, <<Wa na mər səna?>> Nda nda gwa'a hyacha, ngə nda zəndəbiya ənda Gidion zər Jowash nda tə mər sə nda.
30 Ngə nda nar nyi nə Jowash, <<Zəbiya na ea zər nghə ea tsəya, aka cha huɓənda katə Ba'al, ga gəganda katə ashera nda dzər nda.>>
31 Kəl ja, Jowash tə nar nyi nə dlama nji inda kwa gwa'a tləmwali nə nyi nda, <<Hyo pah tə nyar Ba'al ya? Aa hyo gwa'a hya dləuya nyi ya? Kala ndə nda tə pah tə nya nyi, njo tsəya nyi mbudla zəkəu! Macha vəlvəl Ba'al hyel cha, cho nau dləuya kərnyi ma vanya ndə tə huɓənda dzəgana nyi.>> 32 Fwatə tə bəji nda Gidion tə huɓənda dzəgana Ba'al tə nda, nda fəndzə nyi tləm, <<Jerubba'al, nacha ngə, əngwa Ba'al dləuya kərnyi.>>
33 Dəhə njir Midiyan, Amalek ana alenya nji inda təwa zədər pəchi tə tsəmtədzə ga dləgəlbiya Urdən ga biya ngyata nda ku mbəta Jezrel. 34 Kəl Shanguɗə Tlakə tə səya təkəra Gidion, ngə cha mbəɗiya papam nga njir Abiyezer ka nda nəu nyi. 35 Cha sə changhabal ya da nyandəla Manasa mada amani, əngə ma'a nyandəla Zebulun ana Naftali, ngə nda tsəmtədzə ga nəu nyi.
36 Ngə Gidion tə nar nyi nə Hyel, <<Macha vəlvəl ko dləuya njir Isra'ila təwa ɗa wi nda ka mər alkawal, 37 yau, yo səya ul tə mbwar dəgə uhi, əmbudla zəkəu ma kuchikəpa tlə ti, ya hə'i ululə nyi, yo zəndə ənda ko dləuya njir Isra'ila təwa ɗa wi nda ka na.>> 38 Ya əngə sə nda tə ɗa. Gidion tə hya'atə vanya zəkə kaɗə mbudla, ɓitir kuchikəpa nda cha ɓəchibiya ku ul nda tə nyandə shala gwadəl.