Miya Dibora ana Barak
5
1 Pəshi nda Dibora ana Barak zər Abinowam tə na miya nənna,2 <<Nda njir nəu na nji nə njir Isra'ila tə hətə məngya kənda,
ya njir Isra'ila tsə'u tə nəu nda,
falə ngya tə nə Tlakəu!>>
3 <<Siyama himi nahi təl i'i, ngatə ma nahi njir səm təlkur,
yo na miya nə Tlakəu,
yo falə Tlakəu na miya, Hyel njir Isra'ila.>>
4 <<Yawa Tlakəu, nda ka ngyar Seyir,
nda ka shili hya'atə ku hə'i Edom,
hə'i tə dzədzi, ɓiti tə pə səya kya huɗamələm,
ləmbəkə tə pənda ɓiti.
5 Dəgəl tə dzədzi mar Tlakəu, wi nda dəgəl Sinai tə dzədzi,
a mar Tlakəu, Hyel njir Isra'ila.>>
6 <<Aku bəjir Shamgar zər Anat,
aku bəjir Jayel, nja ngyar nəu laku mənakəu,
njir ma'i tə ma'i ku laku tirir nə takəu.
7 Njir mələm shiɗədə tsə'u da kwa nau pah wa,
nda ɓəl biyahi kəl nda naya, Dibora tə hya'ati,
kəl nda ya hya'atə wi ama ku Isra'ila.
8 Hyel tə tabiya taɗər njir nəu nji,
ngə pah tə shili nya mələm,
a ndər ləgə ndara masə da ku huɗa nji 40,000 inda wa.
9 Ɗufwa ya tsa'a na njir nəu na nji nə Isra'ila,
ana nji nda tə dləukər na ikur kənda,
falə ngya tə nə Tlakəu!>>
10 <<Nahi nda tə dlə taku pərtəu,
hya ghyata hi tə daɗari sirdi taku,
nahi nda kwa ma'i ku laku tsəu.
11 Ngatə ma kuraka njir na miya nya ka'ur ɓiti.
Ndo bəzə mafakər kurar Tlakəu,
ana kurar njir Isra'ila.>>
<<Kəl ngə njikə Tlakə
tə tərabiya nya mələm ndo na.
12 <Hya'atə Dibora, hya'ati!
Hya'atə ka na miya hya'ati!
Hya'atə Barakəu!
Səmar nji inda ka səya, nakə zər Abinowam.> >>
13 <<Kəl njir jiri inda tə həyadza,
tə shili da njirawawa'a kənda,
nji inda nə Tlakəu
tə səya da ya, a ɓatliya tə nda ka pah.>>
14 Alenya nji hya'atə vu Ifərem, nda hya'atə tə hə'i nda nə nyandəla Amalek,
ana nji hya'atə ku nyandəla Banyami tə nəu nda.
Wawa'ar ləvaləva hya'atə vu Makir tə səya,
njirawawa'a ləvaləva tə səya hya'atə ku nyandəla Zebulun.
15 Njir nəu na nji hya'atə ku nyandəla Isaka tsa'a nda ka Barak,
nda nəu hi nyi səya ku dakəu.
Kəl ja nyandəla Roben tə təkəbiya dza,
a da nda tatəkər tə sə nda nda kwa wa.
16 Mya gwa'atə nda ngyata nda ku huɗa kətəngha?
Ga nda səhimi da nga nə shili ku dangal ya?
Nyandəla Roben tə təkəbiyadza,
a da nda tatəkər tə sə nda nda kwa wa.
17 Nyandəla Gad tə ta'ita nda biyahir dəl Urdən.
Nyandəla Dan tsə'u ya, mya gwa'atə nda ngyata nda ku girgi ɓitya?
Nyandəla Ashir tə ngyata nda biya nya fa'a,
nda ngyata nda tə mbwar ta'i girgi ɓiti.
18 Nyandəla Zebulun tə sanda pya nda a nya pah,
əngə ma'a nyandəla Naftali.
19 A vu Ta'anak, a nya dəl Magido
ka təl ka təl tə shili pah,
ka təl Kan'ana tə pah,
kəl ja a da nda fa'atə azurfa ndara kwazhalɓi wa.
20 A ki huɗamələm sasəlga tə pəa,
aku laku kənda i'i ki huɗamələm, nda pah Sisera.
21 Dəl Kishon tə tsəkənda nda,
dəl ɗəɗəm Kishon nda.
Yawa pya ya, ɗa na dunama!
22 Kəl taku sisera kwa hwi,
njo ngatə kuraka pəlkwapəlkwa nda.
23 Chama Tlakə tə na,
<<Shi'unda njir mələm Meroz,
aka a da nda shili vala Tlakə
nja kura wawa'ar njir pah nə Kan'ana wa.>>
24 <<Kəl ja Hyel tə ngatə məsəɗakə na Jayel,
mala Heba hya'atə ku nyandəla Keni.
A ndiya tə cha ngatə məsəɗakə na cha
matsa dəhə alenya mahi'i
inda kwa ngya ku madləɓa.>>
25 <<Sisera tə gədi ɓiti, ngə Jayel tə nə nyi 'ua.
Aku kyawa gumaguma, cha shili na nyi 'ua.
26 Cha ha cha cha ga hətə məkukwa nə madləɓa,
ana matərka ku chisəma cha.
Cha dəgə Sisera, ga hubəya kəra cha,
ga bədzəya dihir kəra cha.>>
27 <<A dza hya Jayel pya cha tə biya,
cha dla hu'i, a tangnda cha səya kuraɓəu,
A dza hya cha pya cha tə biya,
tangnda cha dla ga tah.>>
28 <<Amanya Sisera tə ndzamə təwa kagapəu,
cha linghar təwa kagapə ga na,
<Mya gwa'atə charkaina taku nyi tə shivi tsa shila?
Mya gwa'atə a taku nyi i'i da shili ɗəɗəu wa?> >>
29 Ku'imahi'i nyi inda ndiya na dəma tə wum nə nyi,
ngə kərnyi tə biya ma na ənda atə vanyi atə vanyi,
30 <<Ndo gwa'a kar nda ndo təka, kar inda nja fa'aya ku pah,
kwamalakə zhang ndara mətlə nə kala ləvaləva,
lukutə nda njo ɗəl na kwaba 'ualəu aka Sisera,
dzaki inda nja pəgu aka kwar təl.>>
31 <<Maki Tlakəu! Dəhə njir dawa nghə nda kuɗa!
Kəl ja, njir nyida ngha nda mbəl wi pəchi.>>
Kəl hə'i tə uya piyarɗufu nə fa fwaɗəkumnyi.