Dibora
4
1 Ahir tər Ehud njir Isra'ila tə ɓəla mər sə ɗimi tə lya Tlakə səkəu. 2 Ngə Tlakə tə ngyar Jabin təl Kan'ana nda səm təlkur ku mələm Hazor tə kura njir Isra'ila. Midala ləvaləva nyi nacha ngə Sisera, a vu Haroshet Haggoyim cha na ngya. 3 Ngə njir Isra'ila tə tiwi nə Tlakə ka cha vala nda, cha nənyi ɓwaɓwatə nə njir Isra'ila fa mətləkumnyi, aka charkaina taku nə lyang da tsa Jabin 900.4 Dibora mala Lapidot ndər mətakər cha, ya nacha ngə kwa mər nəuma nə njir Isra'ila ku bəji nda. 5 Cho maka ngya da kiɗa wur Dabino nda njo nga wur Dabino nə Dibora ku pama Rama ana Betel aku hə'i dəgəl nə Ifərem. Njir Isra'ila kwa maka gi da cha ka cha mərtə nda nəuma. 6 Ngə cha sə nja nga Barak zər Abinowam vu Kedesh a vu Naftali ga na, <<Hyel Tlakə nə njir Isra'ila kwa tsau nghə bar, <Ma'i ma ka nji 10,000 ku nyandəla Naftali ana Zebulun, ka nəu na nda gyatə dəgəl Tabor. 7 Naya tsə'u yo pətə tə Sisera midala ləvləva Jabin, ana charkaina taku nyi ka ləvaləva nyi i'i ya nya dəl Kishon, kəl ja, Tlakə kwa mərtə ko kura nda.> >>
8 Kəl Barak tə na, <<Macha mo ma'i naka, yo ma'i, kəl ja, macha a da mo ma'i wa, a da yo ma'i tsə'u wa.>>
9 Ngə Dibora tə na, <<Jiri yo ma'i tsa'a naka, kəl ja a səlir ma'i nə do ɗa ka nə nghə wa, aka Tlakə kwa tsau Sisera ku cha malakəu.>> Kəl Dibora tə təra yi Kedesh nanda na Barak. 10 Kəl Barak tə nga nyandəla Zebulun ana Naftali, nji 10,000 tə ma'i kə'i cha, Dibora tsə'u tə təra kə'i cha.
11 Heba, ndər Keni nyandəla Hobab, səlkənya Musa wurta ngyar alenya njir Keni, ga liya madləɓa nyi ləhə dza oak a vu Za'anannim nda ləhə dza Kedesh.
12 Nda nja nar nyi nə Sisera ənda Barak zər Abinowam təratə gyatə dəgəl Tabor, 13 Ngə Sisera tə tsəmtə dəhə ləvaləva nyi ana charkaina taku lyang inda 900 inda a nya dəl Kishon.
14 Kəl ngə Dibora tə nar nyi nə Barak, <<Ma'i! ənya ngə pəchi nda Tlakə tə nə nghə Sisera ku cha ka. Aka Tlakə kwa nəu na ka.>> Kəl ngə Barak tə səya kyatə dəgəl Tabor, ana nji 10,000 kwa nəu nyi. 15 Tlakə tə mərtə təwa Barak Sisera tə wi dəhə ka charkaina taku inda, ana dəhə ləvaləva nyi. Kəl ngə Sisera səya kyo charkaina taku nyi ga təra na hwi. 16 Kəl ja Barak tə gədlə charkaina taku nə pah inda ana ləvaləva inda tsa'a vu Haroshet Haggoyim. Nja kuɗənda dəhə ləvaləva Sisera ana katsakər, a mada ndə zhang da mbəɗə wa.
17 Kəl ngə Sisera tə hwi tanyi na hi yo madləɓa Jayel, mala Heba ndər Keni, aka ngya mənakə da ku pama təl Jabin ana təl Hazor ana ki Heba ndər Keni.
18 Jayel tə biya ga ɓə na Sisera ngə cha nar nyi, <<Anda tlakə ɗa, səgwa tang ku madləɓa, ngwa ka ləvər wa.>> Ngə cha gwa ku Madləɓa nda, ngə cha tulkənyi sər tula.
19 Ngə cha nar nyi, <<Hili kwa tə ɗa, maki ɗaɗa ɓiti.>> Ngə cha mbəɗiya salkam 'ua, ngə cha nə nyi cha sa cha ɓəla tulkənyi sər tula.
20 Ngə cha nar nyi, <<Ma vanya ndə tə shili jau nghə bəra, <A ndə da ku ngə ma?> Ka na, <A ndə da wa.> >>
21 Sisera həɗa ti, ngə hanyi tə hənda nyi, ngə Jayel mala Heba tə hətə məkukwa nə madləɓa ana matərka, ga yi, ga yi kukuwu nyi ku kəra cha, məkukwa nda tə bədziya kəra cha səya tsa'a ku hə'i, ngə Sisera tə tah.
22 Nda Barak kwa tərabiya nya madləɓa Jayel cho nəu Sisera, ngə Jayel tə biya ka cha ɓə na cha. Ngə cha nar nyi, <<Səgwa tangha yo char nghə ndə nə ko gwa'a na.>> Ngə cha nəu nyi gu madləɓa nda, ga la'a Sisera tə piya tətənyi, ana məkukwa nə madləɓa ku kəra cha.