Nja Zhabiya Mbandər vu Shekem
24
1 Ngə Joshuwa tə tsəmiya dəhə nyavi Isra'ila vu Shekem. Cha nga njirawawa'a, ka gau i'i, njir tla nəuma ana nji kwalkwala nə njir Israila, ya ngə nda shili huɗə Hyelləu.2 Joshuwa tə nar nyi nə nji inda, <<Janə sə nda Tlakəu, Hyel nə Isra'ila tə na, <Ɗəɗəməu ka jival kəhi, ma'a Tera adanya ka Ibrahim ana Nahor, tə ngya biya tə ya Dəl Yufretis, ga həsəli nə alenya hyel i'i. 3 Kəl ja, ya hətə Ibrahim adan hi hya'atə biya tə ya dəl nda ga nəu na cha tahə Kan'ana ga mərtə nyandəla cha ɗanghəu. Ya nə nyi Ishaku, 4 a nə Ishaku tsə'u ya nə nyi Jakop ana Isuwa. Ya nə nyi hə'i dəgəl dəgəl nə Isuwa, kəl ja, Jakop kə'i nguli nyi tə təra gwa Masar.
5 << <Ngə ya sə kə'i Musa ana Haruna, ngə ya nə nyi ɓwaɓwatə nə njir Masar təwa sə nda ya məra vu nda, ahir ənga, ya fa'abiya hi zəbiya. 6 Nda ya fa'abiya ka ajin hi zəbiya vu Masar, nda shili nya fa'a ya ngə njir Masar tə gədlənda ana charkaina taku ana njir dlə taku, tsa'a nya Fa'a Dəzəu. 7 Kəl ja nda tiwi ga gwa'a vala tsa Tlakəu, ngə Tlakə tə mərtə kutlə tə ɗa ku pama nda ana njir Masar, cha sanda nda ku fa'a. Kərnəhi la'atə sə nda ya mərtə nyi nə njir Masar. Ya ngə hya ngya tə dadil takə nə bəji 'ualəu.
8 << <Ya shili na hi tə hə'i njir Amori inda na ngya təwa zədərpəchi nə Urdən. Nda pah hi, kəl ja, ya mərtə hya kura nda. Ya kuɗənda nda man hi, ngə hya dləuya hə'i kənda. 9 Aku bəji nda Balak zər Zippor təl Mowab tə ɓatləya ka cha pah njir Isra'ila, cha gwa'a Bala'am zər Biyor ka cha shu'unda hi. 10 Kəl ja, ya ngyar səhimi da Bala'am, ngə cha səkə hi papa'akur vanyi təkəra vanyi, ngə ya mbəɗandə hi tsa cha.
11 << <Ngə hya dləgəlbiya Urdən ga shili vu Jariko. Njir mələm Jariko tə pah hi, tang wi nda njir Amori, Perizi, Kan'ana, Hiti, Girgash, Hivi ana Jebusi tə pah hi, kəl ja, ya gwa'atə hya kura nda. 12 Təvi hya yi, ya sətə sə nda gwa'atə nda wi kəɓanghəu, nacha gədlənda nda man hi, dəhə ka təl mətlə nə njir Amori inda tsə'u. A da nahi ngə tə mərtə na katsakər ndara laga kəhi wa. 13 Ngə ya nə hi hə'i nda a da hya sa ɓwaɓwatə ɓwaɓwatənyi wa, ana mələm inda a da na hya hərə wa, ngə hya ngya kwa ga səm ku fa anap ana zaitun inda a da nahya chi wa.>
14 <<Sakan ja, hya ləvər Tlakəu, hya həsəli nə nyi ku dəhə jirikur. Pəndama dəhə chul katə inda ajin hi tə həsəli nə nda biya tə ya Dəl Yufretis ana a vu Masar, hya həsəli nə Tlakəu. 15 Kəl ja, macha həsəli nə Tlakə da ɗa nəhi wa, ənya ba hya tabiya ndə nda hyo həsəli nə nyi, ndara katə ingə ajin hi tə həsəli nə nda biya tə ya Dəl Yufretis nda, ndara katə njir Amori, nda hi na ngya ku hə'i kənda. Kəl ja, naya ana dəhə ki ɗa, eo həsəli nə Tlakəu.>>
16 Təma ngə dəhə nji tə wuma, <<Hyella kanda ea ngyar həsəli nə Tlakəu, ka eo həsəli nə alenya katəu! 17 Hyel Tlakə na kərnyi ngə tə fa'abiya ea ka jival kəea vu Masar, zəbiya ku hə'i mavakur, ga mər dəhə sə shinshin inga tə lya ea. Cha ɓəlabiya ea ku ma'i kəea dəhəu, ana aku pama jul nji pampam nda ea ma'i ku huɗa nda. 18 Tlakə ngə tə gədləbiya njir Amori ka alenya jul nji inda na ngya ku hə'i na. Naea tsə'u eo həsəli nə Tlakəu, aka nacha ngə Hyel kəea.>>
19 Ngə Joshuwa tə nar nyi nə nji inda, <<A da hyo nau həsəli nə Tlakə wa. Hyel ndə Karti cha; Hyel cha tsə'u nda na sələkəkur. A cho far na mwali kəhi ana səpəla'a kəhi wa. 20 Ma hya ngyar Tlakə ga həsəli nə katə i'i, cho ngya hi ba'a shili na təmachi təkəra hi, ba nja far na hi pa'apa'a, madangə a char hi tə cha mənakəkur ɗakaɗa.>>
21 Kəl ja, ngə nji inda tə ɓəlakənyi nə Joshuwa, <<Abada! Eo həsəli nə Tlakəu.>>
22 Ngə Joshuwa tə na, <<Na hi ngə matauli təkərnəhi ənda a tabiya tə hi hyo həsəli nə Tlakəu.>>
Ngə nda ɓəlakənyi, <<Vələu, na ea ngə matauli.>>
23 Ngə Joshuwa tə na, <<Uchinda ma katə ingə ku pama hi inga, hya nənyi ɗufwa hi nə Tlakəu, Hyel nə Isra'ila.>>
24 Ngə nji inda tə nar nyi nə Joshuwa, <<Eo həsəli nə Tlakə nda Hyel kəea, eo nəu nya cha.>>
25 Pəshinda tanyi, Joshuwa tə mbandər kə'i njir Isra'ila vu Shekem, ngə cha tsəfəbiya nda gadlagadla ana tsaubar i'i. 26 Ngə Joshuwa tə tsəfəu sə ingə ku Likatkatə Gadlagadla Hyel. Ngə cha hətə hangəu dəgal ga fiya da kiɗa vanya wur tuma ləhə dza mbwa karti nə Tlakəu.
27 Cha nar nyi nə dəhə nji, <<Hangu na kwa ngya ka matauli təkəra hi. A ngatə tə cha dəhə ɓwanya inda Tlakə tə nar mən. Cho ɗa ka matauli təkəra hi tsa hi da ba'a tləya nyi gəzhi nə Hyel kəhi.>> 28 Ngə Joshuwa tə nar nyi nə nji nda təra, kala ndə kyatə mətla hə'i nyi.
Tər Joshuwa
29 Ahir sə'inga, Joshuwa zər Nun mava Tlakə tə tah, fa nyi 110. 30 Ngə nda haɗiya nyi tə babal nyi nda cha fa'aki ni vu Timnat Sera a ku hə'i dəgəl dəgəl nə Ifərem təwa vwa nə Mə Gaash.
31 Aku dəhə bəji nda Joshuwa na pi ti, njir Isra'ila tə nəu nya Tlakəu, ya nda biyama na nəu nya Tlakəu ahir tər Joshuwa aku bəjir njirawawa'a inda tə həyadza, inda kwa zəndə dəhə tlər inda Tlakə tə məra aka njir Isra'ila.
32 Ɗihi Yusufu nda njir Isra'ila tə hya'atə ni vu Masar tsə'u, nja haɗiya vu Shekem a tə babal nda Jakop tə ɗəlbiya tsa nguli Hamor, adanya Shekem təkəra azurfa 100. Babal nda tə ɗa ka sərfa'aki nyandəla Yusufu.
33 Eliyazar zər Haruna tsə'u tə tah, ngə nja haɗiya nyi vu Gibiya, nda nja nə nyi nə zər nyi Finihas aku hə'i dəgəl dəgəl nə Ifərem.