Batəbatər ɓwanya Joshuwa
23
1 Ahir fa ɗang tə tərabiya, ngə Tlakə tə nə nyi ɓəlsar nə njir Isra'ila tsa njir dawa kənda, aku bəji nga, Joshuwa halti ya fa nyi ɗa tə 'ualə gagaɗa. 2 Ngə Joshuwa tə nga dəhə njir Isra'ila, njirawawa'a kənda, gau kənda i'i, njir tla nəuma kənda ana nji kwalkwala kənda ga nar nda, <<A hal tiya, ya fa ɗa ɗatə 'ualəu. 3 Nahi təkərnəhi la'a tə dəhə sə inda Hyel Tlakən hi tə mərtə nyi nə mələm inə tə dəbar kəhi, Hyel Tlakən hi ngə tə pah tə ya hi. 4 Ngwa hya da far wa, a nə nyi tə ya sərfa'aki nə dəhə nyavi kəhi, a təkəya hi tə ya dəhə mələm inda tə həyadza, mələm inda ya kwasa ku pama Urdən ana Fa'a Meditereniya təwa holma. 5 Hyel Tlakən hi, təkərnyi ngə kwa gədlənda nda man hi. Cho mbəlanda nda man hi, nahi tsə'u hyo dləuya hə'i kənda tang wi nda Hyel Tlakən hi tə mərtə hi alkawal.6 <<Hya ɗa na dunama, hya ɗa na sənam ka hya nəubiya dəhə sənda tsəftsəfnyi ku likatlikatə gadlagadla Musa, ngwa hya da tyatənda təwa chisəm ndara matsal wa. 7 Ngwa hya da daɓəkər kə'i jul nji inda tə həyadzə na ngya ku pama hi wa, ngwa hya da nga tləmər hyel kənda i'i ndara hya səmfəla na nda wa. Ngwa hya da həsəli nə nda ndara hya uzhi man nda pa'a wa. 8 Kəl ja, hya gəzəya Hyel Tlakən hi ɓaɓaləu wi nda hya məra tsa'a tə bəji na.
9 <<Tlakə tə gədlənda jul nji inda na dunama man hi, ba'a tə bəji na a vanya jul nji da tə nau ta'i man hi wa. 10 Ndə zhang ku pama hi kwa nau səmar nji dəbəu, aka Hyel Tlakə kwa pah tə ya hi, tang wi nda cha mər alkawal. 11 Aka əngə ja, hya gəla, hya nyida Hyel Tlakən hi.
12 <<Kəl ja, ma hya sha ga mbanya kə'i jul nji inda tə həyadzə ku pama hi, ga hə ku'i kənda ga daɓətəkər kə'inda, 13 hya zəndə təkəɗə ja, ənda Hyel Tlakən hi da kwa gədlənda nda man hi wa. A təvəra ənga ndo ɗa ka sər tləhi ana ləbam nə hi, ndo dəgə hi na wuɗa tə dagərya hi, ana shikəɗi ku lya hi. Əngə kwa ɗa na hi, kəl bəji nda hya da wur ku hə'i mənakə nə Hyel Tlakən hi tə nə hi na.
14 <<Sakana, ɗa tə ya ləhə nya hwa. A zəndə tə hi na dəhə ɗufwa hi ənda mada sə zhang ku alkawal Tlakə do ɓəl ya hi wa. A nyabiya tə nji dəhə alkawal a mada zhang da həya dzə wa. 15 Kəl ja, tang wi ngə nja nyabiya dəhə alkawal mənakə inga, əngə tanyi tsə'u Tlakə kwa shili na dəhə sə ɗimi nda cha na cho shili ni, kəl cha zhazhinda hi ku hə'i nda cha nə hi. 16 Ma hya ɓəlnda mbandər Hyel Tlakən hi, nda cha nəhi gadlagadla təkəri, ga ki həsəli nə alenya hyel i'i ga uzhi man nda, huɗatla Tlakəu kwa səya təkəra hi, ya kuskusəu hyo kuɗa aku hə'i mənakə nə nja nə hi na.>>