Nyavi inda təwa Zədərpəchi tə Ɓəl kyo Ki Kənda i'i
22
1 Ngə Joshuwa tə nga dəhə nyandəla Roben, Gad ana mar nyandəla Manasa 2 ga nar nda, <<A nəubiya tə hi dəhə sə inda Musa mava Tlakə tə tsau hi bar, ya nəu tə hi nya ya ku dəhə sə inda ya tsau hi bar ni. 3 A hətə tə bəji 'ualəu nda a da hya taa ngyar ka zamən hi wa, kəl ja, a mərtə tə hi tlər inda Hyel Tlakən hi tə nə hi. 4 Sakan ja, manda Tlakə nə nyi tə ɓəlsar nə kə'i zamən hi wi nda cha mər alkawal, ɓəl ma ja kyo ki kə hi, atə hə'i nda Musa mava Tlakə tə nə hi biya təya Urdən. 5 Kəl ja, hya gəla, hya ɓəlati gadlagadla ana tsaubar nda Musa mava Tlakə tə nə hi, ənda: hya nyida Hyel Tlakən hi, hya ma'i ku laku nyi, hya ɓəlatə gadlagadla nyi, hya ləvər nyi, hya hətə nyi səli ana dəhə ɗufwa hi ana dəhə pya hi.>>6 Ngə Joshuwa tə səkə nda papa'akur ga wiɗənda nda, ngə nda ɓəl kyo ki kənda i'i. 7 Musa wurtə nə nyi hə'i vu Bashan nə mar nyandəla Manasa. Həyadzər mar nyandəla Manasa tsə'u, Joshuwa tə nə nda hə'i na nda ka zamə nyi biyatəya Urdən təwa təɗərpəchi. Nda Joshuwa tə səu nda ku laku kyo ki, ngə cha səkə nda papa'akur, 8 ngə cha nar nda, <<Ɓəl ma kyo ki kə hi i'i ana gəna 'ualəu, ana sərshishi ɗanghəu, ana azurfa, ana bəjingha, ana ndzəa, ana lyang, ba'a dzaki ɗanghəu, hya ki təkəya sə inda hya fa'aya tsa njir dawa kə hi ka zamən hi.>>
9 Aka ənga, ngə nyandəla Roben, Gad, ana mar nyandəla Manasa tə ɓəl kyo ki, ga ngyar njir Isra'ila vu Shilo a tə hə'i Kan'ana, ka nda ɓəl yi Giliyad hə'i nda nda fa'aki ni tang wi sənda Tlakə tə tsau nda bar təwa Musa.
10 Nda nyandəla Roben, Gad ana mar nyandəla Manasa tə dzəva Gelilot ləhə dzə Dəl Urdən a tə hə'i Kan'ana. Ngə nda hərəya dzəgana dəgaləu, gumaguma nya Dəl Urdən nda. 11 Nda njir Isra'ila tə ngatə ənda nda hərəya dzəgana ku ɓəlkər Kan'ana a vu Gelilot ləhə dzər Urdən təwa mətla hə'i njir Isra'ila, 12 ngə dəhə daɓədzər njir Isra'ila tə tsəmtə dzə vu Shilo ka ki pah nda.
13 Aka ənga, njir Isra'ila tə sə Finihas zər Eliyazar, pərist, ya tə hə'i Giliyad, ya da ka Roben, Gad ana mar nyandəla Manasa. 14 Njirawawa'a kuma, zhang ku kala nyavi tə ma'i kə'i Finihas. Kala ndə zhang gau cha ku kala dzuku ku nyavi njir Isra'ila.
15 Nda nda yi Giliyad, ya da Roben, Gad ana mar nyandəla Manasa, ngə nda nar nda, 16 <<Dəhə daɓədzər nji nda nə Tlakə tə na, <Ka mi hya mər chul nəna səɗimi nə Hyel njir Isra'ila? Kami hya shar nyi yi nə Tlakə ga tləya mwali təwa hərəya nyi dzəgana nə kərnəhya? 17 A səpəla'a Peyor da nji mən wa ya? Madangə a satə mən ɓwaɓwatə 'ual'ual tsa Tlakə təkəra səpəla'a kənda, ba'a tə bəji nə ənya, tsə'u ta man ku ɓwaɓwatə aka səpəla'a nda. 18 Sakan ja ya, hyo sha ba'a ngyar nəu Tlaka?
<< <Ma hya tlə mwali nə Tlakə ənya, əzəkəu huɗa cho tla na dəhə njir Isra'ila. 19 Macha hə'i ngə hi tə ngə ɗatə hiɗahiɗa, ba'a hya shili tahi tə hə'i Tlakəu, tangnda madləɓa Tlakə ti, mən ngya kə'i hi. Kəl ja, ngwa hya da tlə mwali nə Tlakəu ndara a nə ea təwa hər dzəgana nə kərnəhi, matsa dzəgana Hyel Tlakən mən wa. 20 Aku bəji nda Akan zər Zera tə mər səpəla'a ya, a huɗatla ɗimiɗimi nə Tlakə da səya təkəra dəhə njir Isra'ila ma? A da kəl zhang tanyi nga tah aka səpəla'a nyi wa.> >>
21 Ngə nyandəla Roben, Gad ana mar nyandəla Manasa tə ɓəlakə nyi nə njirawawa'a nə nyavi njir Isra'ila ga na. 22 <<Ndər Gyalkur cha, Hyel cha! Tlakəu! Hyel Tlakəu! Ndər gyalkur zəndə cha! Ya njir Isra'ila tsə'u nda zəndi! Macha mwali ndara ngyar nəu nya Tlakə na, ngwa hya da ngya ea na pi ənya wa. 23 Macha ka ga ea shar nyi yi nə Tlakə nə ea hərəya dzəgana kəea, ana ka ga ea handa təmachi nə nginda ana nə səuhiuhi ndara ka ga ea ha təmachi daɓəkər kya ti, yau ga Tlakə cha tlanda ea nəuma na kərnyi.
24 <<Abada! Ea mər ənga aka eo ləvər tsa vanya pəchi nyandəla hi da ba'a nar nyi nə nyandəla ea, <Mi tə pama hi ka Tlakəu, Hyel njir Isra'ila? 25 Tlakə wurtə fiya Dəl Urdən ka gəl ku pama mən kə'i hi, nahi nyandəla Roben ana Gad. Aka ənga a mbaɗə kəhi da ku Tlakə wa.> A na ənga nyandəla hi kwa gwa'atə nyandəla ea kwa ngyar ləvər Tlakəu.
26 <<Nacha gwa'atə ea na, <A mən ɓatləya, mən hərəya dzəgana, kəl ja, a da ka hatəmachi nə nginda ndara alenya hatəmachi wa.> 27 Atəvira ənga, ga cha ɗa ka tauli ku pama mən ana zamin inda kwa nəuwahi, ənda eo həsəli nə Tlakə aku vi həsəli nyi ana sər hatəmachi nginda kəea, ana alenya hatəmachi. Ana ənga, a biyama, a nyandəla hi da kwa nau nar nyi nə nyandəla ea, <A mbaɗə kə hi da ku Tlakə wa.>
28 <<Ana tsəu, ea na, <Ma ndə nda nar ea sə inga, ndara a nə nyandəla ea, eo wumə nə nda eo na, la'a ma dzəgana nda ka jival kəea tə hərəya, məlməl na nə Tlakəu, a da aka hatəmachi nə nginda ndara alenya hatəmachi wa, kəl nda aka cha ɗa ka matauli ku pama mən.>
29 <<Hyella kanda, ea tlə mwali nə Tlakəu ea ngyar nəu nyi ənya, təwa hərə dzəgana ka hatəmachi nə nginda, hatəmachi nə səuhiuhi, ga'a paməpaməu, ana alenya hatəmachi, matsa dzəgana Tlakəu, Hyel kəmən nda ta'i mar madləɓa həsəli nyi.>>
30 Nda Finehas pərist ana njirawawa'a nə njir Isra'ila inda tə ɗa gau təkəra ka nyavi ka nyavi nə dəhə nyavi Isra'ila tə ngatə sə nda nyandəla Roben, Gad ana mar nyandəla Manasa tə na, ngə nda mər hirgyaɗi. 31 Kəl ngə Finehas zər Eliyazar nda pərist tə nar nyi nə kə'i nyandəla Roben, Gad ana Mar nyandəla Manasa bəra, <<Ənya, a zəndə tə ea, ənda Tlakə tsa'a na mən, aka a da hya shar nyi yi nə Tlakə ku hər dzəgana nda wa. Sakana a mbəɗandə tə hi njir Isra'ila tsa huɗatla Tlakəu.>>
32 Ngə Finehas zər Eliyazar, pərist, ana njirawawa'a inda tə hya'atə tangnda nda ɓə kə'i nyandəla Roben ana Gad a vu Giliyad nda, ga ɓəl yi Kan'ana ya da njir Isra'ila. 33 Njir Isra'ila tə mər hirgyaɗi na sə nda nda ngati ga fal Hyel. A na nda zhaka ndəra təkəra nyar ki pah nyandəla Roben ana Gad ka nda zhazhinda kala sə nda ku hə'i kənda wa.
34 Aka nyandəla Roben ana Gad tə fəndzə nyi tləm nə dzəgana nda, <<Matauli,>> aka nda na, <<Matauli na ku pama mən ənda Tlakəu, Hyel kəea cha ma'a na ea.>>